فرانسيانىڭ جاڭا پرەزيدەنتى فرانسۋا وللاند پەن سوسياليستىك پارتيا مۇشەلەرىنەن قۇرىلعان جاڭا مينيسترلەر كابينەتى العاشقى ءماجىلىسىن وتكىزىپ، نەگىزگى شەشىمدەرىن قابىلدادى، دەپ حابارلايدى حابار تەلەارناسى.

ولار وزدەرىنىڭ جالاقىسىن 30 پايىزعا ازايتىپ وتىر. جاڭا ۇكىمەت ەكونوميكانى قايتا قۇرۋ جانە ەۋروپا ەلدەرىنىڭ قارجىلىق داعدارىسىن شەشۋ باعىتىندا بۇرىنعى ۇكىمەتتەن وزگەشە ساياسات ۇستاناتىنىن جاريالاعان بولاتىن. پرەزيدەنت وللاند فرانسيادا الەۋمەتتىك سالالارعا جۇمسالاتىن قارجىنى بۇدان ءارى ازايتۋدى قالامايدى. وللاند ەۋروپالىق وداق ەلدەرىندە قارجى ۇنەمدەۋگە باعىتتالعان جالپىەۋروپالىق شارت قۇرلىق ەلدەرىندە ەكونوميكالىق ءوسىمدى تەجەپ وتىر جانە ونى وزگەرتۋ كەرەك دەگەن ۇيعارىمدا. بۇگىن ول ەۋروپانىڭ ەكونوميكالىق ستراتەگياسى تۋراسىنداعى پىكىرلەرىن گەرمانيا، مەن ۇلىبريتانيا جانە يتاليا سونداي-اق، ەۋروپالىق وداقتىڭ باسقا ەلدەرىنىڭ باسشىلارىمەن بولاتىن تەلەفون ارقىلى سۇحباتتارىندا تۇسىندىرمەك. ەۋروپاداعى داعدارىس ماسەلەسى اپتانىڭ سوڭىندا اقش-تا باستالاتىن ۇلكەن سەگىزدىك ءسامميتىنىڭ باستى تاقىرىبى. فرانسيانىڭ جاڭا ۇكىمەتى ەل بيۋدجەتىن تەڭگەرۋ، ياعني شىعىس بولىگى مەن كىرىس بولىگىن تەڭ ۇستاۋ ساياساتىن جۇرگىزبەك. دەگەنمەن، قازىرگى داعدارىس كەزىندە بۇل وڭايعا تۇسپەيدى، دەپ حابارلايدى Associated Press اگەنتتىگى. ال جاڭا مينيسترلەر كوپ نارسەدەن ءۇمىتتى.

«ءبىر جاعىنان قوبالجىپ تۇرسام، ەكىنشىدەن بويىمدا قاناعات سەزىمى بار. رەسپۋبليكا پرەزيدەنتى مەن پرەمەر-مينيسترى جاقىن كۇندەرى حالىقارالىق دەڭگەيدەگى كەزدەسۋلەرگە قاتىسىپ، داعدارىستى ەڭسەرۋ ماسەلەرىمەن اينالىسادى. ال ءبىز بولساق، بىردەن جۇمىسقا كىرىسۋىمىز كەرەك. الدىمىزدا كوپ مىندەت تۇرعان شىعار، دەگەنمەن، ازىرگى باعدارلاما ايقىن»، - دەيدى مەملەكەتتىك رەفورمالار جانە قوعامدىق قىزمەت ءمينيسترى مەريليز لەبرانشۋ.

دەرەككوز: bnews.kz