«31 ارنا»  قازاقتىڭ ءيىسى بۇرقىراپ شىعاتىن تەلەارناعا اينالدى. ءقازىر ارنا كونتەنتىنىڭ 60-70 پايىزى قازاق تىلىندە. قولىمىزدان كەلگەنشە قازاق تىلىندەگى باعدارلامالاردىڭ سانى مەن ساپاسىن ارتتىرۋعا كۇش سالىپ جاتىرمىز. بىرىنشىدەن، بۇل تەلەارنا – ءبىزدىڭ كوزقاراسىمىز بەن ومىرلىك ۇستانىمدارىمىزدىڭ كورىنىسى. ەكىنشىدەن، كوممەرسيالىق ارنا بولعاندىقتان، تۇتىنۋشى ءۇشىن كۇرەستى توقتاتۋعا ءبىزدىڭ قاقىمىز جوق. جىل سايىن قازاقستانداعى قازاقتاردىڭ سانى 2-3 پايىزعا ارتىپ كەلەدى. ەلىمىزدەگى كورەرمەندەردىڭ باسىم بولىگى – قازاقتار. ال قازاققا اقپاراتتى قازاقشا ۇسىنباعاندا قاي تىلدە ۇسىنامىز؟ ءۇشىنشى سەبەپ – زاڭ. بۇقارالىق اقپارات قۇرالدارىنىڭ تىلىنە قويىلاتىن تالاپ ەلىمىزدىڭ ەكى بىردەي زاڭىندا كورىنىس تاپقان: ق ر «ءتىل تۋرالى» زاڭىندا جانە «تەلەراديو حابارلارىن تاراتۋ تۋرالى» زاڭىندا. مەملەكەتىمىز ءبىر ورىندا تۇرعان جوق، ەكونوميكالىق الەۋەتى دە، دەموگرافيالىق قۋاتى دا ارتىپ كەلەدى. مەملەكەتتىك ءتىلدىڭ دامۋى دا سول قارقىنعا ساي بولۋى كەرەك. سوندىقتان ۇكىمەت حالىقتى ۇركىتىپ-قورقىتپاي، قىسىم جاساماي، قازاق ءتىلىنىڭ قولدانىس اياسىن ساتىلى تۇردە كەڭەيتۋ باعىتىن ۇستانىپ وتىر. پروگرەسكە قول جەتكىزۋدىڭ ادىس-تاسىلدەرى مەملەكەتتىڭ دامۋ مودەلىنە قايشى كەلمەۋى كەرەك. ءبىز وسى قاعيدانى باسشىلىققا الا وتىرىپ، قازاق ءتىلىنىڭ الەۋەتىن كوتەرۋگە، ءقازاقتىلدى كورەرمەننىڭ قاتارىن ارتتىرۋعا ۇلەس قوسىپ كەلەمىز. قازاقپەن بيزنەس جاساۋعا بولاتىنىن دا قولىمىزدان كەلگەنشە دالەلدەدىك دەپ ويلايمىن.

(باعدات قوجاحمەتوۆتىڭ "تۇركىستان" گازەتىندەگى سۇحباتىنان)