ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جەمقورلىققا قارسى كۇرەس ۇلتتىق بيۋروسىندا اتىراۋ وبلىسىنىڭ بۇرىنعى اكىمى بەرگەي رىسقالييەۆ قۇرعان ۇيىمداسقان قىلمىستىق توپتىڭ ءىسى بويىنشا سوتقا دەيىنگى تەرگەۋ امالدارى اياقتالىپ، ءىس ماتەريالدارىمەن تانىسۋ باستالدى،  دەپ حابارلايدى Qamshy.kz اقپارات اگەنتتىگى ۆەدومستۆونىڭ باسپا ءسوز قىزمەتىنە سىلتەمە جاساپ.

«سوتقا دەيىنگى تەرگەۋ بارىسىندا بەرگەي رىسقالييەۆ پەن شەتەلدە جۇرگەن جاقتاستارىنىڭ جاساعان قىلمىستارىن دالەلدەيتىن جەتكىلىكتى ايعاقتار تابىلدى»،- دەلىنگەن حابارلامادا.

ايتا كەتەرلىك ءجايت، اعىمداعى جىلدىڭ 24 اقپانىندا ۇلتتىق بيۋرو باق-تا «كۇدىكتى رىسقالييەۆ، رىسقالي، ءالباقاسوۆ، جەلدىبايەۆ، ءىزباسار، سۇلەيمەنوۆ، جولماعامبەتوۆ، تەمىرالين جانە دانيەۆيچ  تەرگەۋ شاراسىن وتكىزۋ ءۇشىن 2018 جىلدىڭ 2 ناۋرىزى ساعات 10.00-گە دەيىن، قازاقستان رەسپۋبليكاسى، استانا قالاسى، سەيفۋللين كوشەسى، 37 مەكەنجايىندا ورنالاسقان سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ اكىمشىلىك عيماراتىنا كەلۋى ءتيىس» - دەگەن حابارلاما تاراتقان بولاتىن.

"ۇيىمداسقان قىلمىستىق توپتى قۇرىپ، وعان جەتەكشىلىك ەتۋ نەمەسە وعان قاتىسۋ"، "قىزمەتتىك جالعاندىق"، "لاۋازىمدىق وكىلەتتىكتى اسىرا پايدالانۋ"، "وزگەنىڭ سەنىپ تاپسىرىلعان مۇلكىن يەمدەنۋ مەن تالان-تاراجعا سالۋ"، "زاڭسىز جولمەن تابىلعان اقشا مەن وزگە دە مۇلىكتى زاڭداستىرۋ"، "جالعان كاسىپكەرلىك" سىندى قىلمىستىق كودەكستىڭ التى بابى بويىنشا سوتتالعان 22 ادامنىڭ بارلىعى جەكە ۇيىم باسشىلارى، اكىمنىڭ بۇرىنعى ورىنباسارلارى مەن لاۋازىمدى تۇلعالار بولاتىن.

بەرگەي رىسقالييەۆ اتىراۋ وبلىسىنىڭ باسشىسى بولعان كەزدە مەملەكەتتىڭ اسا ءىرى كولەمدەگى قاراجاتىن بىرنەشە رەت جىمقىرىپ، جەمقورلىق قىلمىستارىن جاساعان. قىلمىستىق ارەكەتتەردىڭ سالدارىنان مەملەكەتكە 70 ميلليارد تەڭگەدەن استام شىعىن كەلدى.