بۇگىن اقپارات جانە كوممۋنيكاسيالار ءمينيسترى داۋرەن ابايەۆ حالىققا ەسەپ بەرۋ كەزدەسۋىن وتكىزىپ، وزدەرىنىڭ 2017 جىلى اتقارعان جۇمىستارى مەن الداعى جوسپارلارىن ءبولىستى، دەپ حابارلايدى Qamshy.kz اقپارات اگەنتتىگى.
بايانداما بارىسىندا مينيستر مامىردىڭ 6-سى كۇنى اقپارات جانە كوممۋنيكاسيالار مينيسترلىگىنىڭ قۇرىلعانىنا 2 جىل تولعانىن اتاپ ءوتتى. وسى ارالىقتا مەملەكەتتىك سەكتوردىڭ اقپاراتتىق جۇمىس ساپاسى ارتىپ، ونداعان تاراۋلاردىڭ ورنىنا ءبىرىڭعاي رەسپۋبليكالىق مەدياجوسپار قابىلدانعان. مەملەكەتتىك اقپاراتتىق تاپسىرىستىڭ ساپاسىن ارتتىرۋ ءۇشىن دە بىرنەشە نورماتيۆتىك باستامالار قالىپتاسىپ وتىر.
– مىسالى، مەملەكەتتىك اقپاراتتىق تاپسىرىس زاڭ بويىنشا مەملەكەتتىك ساتىپ الۋدان الىنىپ تاستالدى. الايدا، ارنايى قاعيدا قابىلداندى. وسىلايشا، باق-تى ىرىكتەۋ ۇدەرىسى قوعامدىق ۇيىمداردىڭ اشىق باقىلاۋ مۇمكىندىگىن قالىپتاستىردى. ال مەملەكەتتىك اقپاراتتىق تاپسىرىسقا جوعارى تالاپقا ساي ب ا ق وكىلدەرى عانا قاتىسا الادى، – دەدى داۋرەن ابايەۆ.
تاعى ءبىر ايتا كەتەرلىگى، 2017 جىلى ەلىمىزدە مەملەكەتتىك اقپاراتتىق تاپسىرىس اياسىندا 40 سەريال تۇسىرىلگەن. بۇل – 2016 جىلعى جاعدايدان 2 ەسە ارتىق كورسەتكىش. ونىڭ بىرەگەيلەرىن ءوز ەلدەرىندە كورسەتۋ قۇقىعىن قىرعىزستان، رەسەي، جۇڭگو، ت.ب. كورشى مەملەكەتتەر ساتىپ العان. سونداي-اق، ەلىمىزدە تەك قازاقستاندىق كوركەم جانە دەرەكتى فيلمدەر كورسەتەتىن «ەلارنا» تەلەارناسى اشىلىپ، وتاندىق تەلەارنالاردى ونلاين رەجيمدە كورۋگە مۇمكىندىك بەرەتىن Galam.tv جوباسى جاڭارتىلعان. وعان قوسا، اقپارات جانە كوممۋنيكاسيالار ءمينيسترى بيىلدان باستاپ ايماقتارداعى انولوگتىق حابار تاراتۋدى كەزەڭ-كەزەڭىمەن توقتاتاتىنىن ايتتى.
– 2018 جىلدىڭ سوڭىنا دەيىن ماڭعىستاۋ، جامبىل، وڭتۇستىك قازاقستان وبلىستارى تولىق سيفرلىق تەلە جانە راديوحابار تاراتۋعا كوشەدى. ال وزگە ايماقتار سيفرلىق حابار تاراتۋعا 2020 جىلدىڭ سوڭىنا دەيىن اۋىسادى. سونىمەن قاتار، Otau tv وتاندىق سپۋتنيكتىك وپەراتورىن دامىتۋ ماقساتىندا جاڭا Otau+ اقىلى پاكەتىن ىسكە قوسۋدى جوسپارلاپ وتىرمىز. ونىڭ قۇرامىندا شەتەلدىك ءتۇرلى جانردا بەلگىلى 14 تەلەارنا بولادى. Otau+ تاماشالاعىسى كەلەتىندەر ايىنا 500 تەڭگە تولەيدى، – دەدى داۋرەن ابايەۆ.
Cونىمەن قاتار، اقپارات جانە كوممۋنيكاسيالار مينيسترلىگى تاراپىنان «اشىق ۇكىمەت» جوباسىنا ەرەكشە نازار اۋدارىلاتىنى دا ايتىلدى. داۋرەت ابايەۆتىڭ سوزىنشە، اشىق دەرەكتەر پورتالى ارقىلى ەل ازاماتتارى الداعى ۋاقىتتاردا 2 مىڭ 800-گە جۋىق دەرەككە قول جەتكىزە الادى ەكەن. بۇل كورسەتكىش ارتا ءتۇسۋى دە ءتيىس جانە اتالمىش پورتالدا 25 مىڭ نورماتيۆتىك قۇقىقتىق اكت پەن ءدال سونداي كولەمدەگى بيۋدجەتتىك باعدارلامالاردىڭ جوبالارى ورنالاساتىن بولادى.
– كەز كەلگەن ازامات مەملەكەتتىك ورگانداردىڭ ءبىرىنشى جەتەكشىلەرىنىڭ بلوگپلاتفورماسى ارقىلى ءوزىن قىزىقتىرعان سۇراقتارعا جاۋاپ تاۋىپ، اشىق ديالوگ پورتالى ارقىلى ينتەرنەت-كونفەرەنسيالارعا قاتىسا الادى. بۇل قۇرالداردىڭ بارلىعى ەل تۇرعىندارى مەن مەملەكەت اراسىنداعى كوپىردى نىعايتۋ ءۇشىن قولعا الىنىپ وتىر، – دەدى مينيستر جانە ەلىمىزدىڭ اقپاراتتىق نارىعىن ىنتالاندىرۋ ماقساتىندا ءوتىپ جاتقان يميدجدىك ءىس-شارالارعا دا توقتالىپ ءوتتى.
– بيىل تەليەۆيزياداعى جۋرناليستەر اراسىندا «تۇمار» بايقاۋى ەكىنشى رەت ءوتتى. بۇل شارا قازاق تەليەۆيزياسىنىڭ 60 جىلدىعى اياسىندا ۇيىمداستىرىلدى. وسى جىلدىڭ ماۋسىم ايىندا، ياعني ب ا ق قىزمەتكەرلەرىنىڭ كاسىبي مەرەكەسى قارساڭىندا «ۇركەر» پرەمياسى سالتاناتتى تۇردە تابىستالادى. سونىمەن قاتار، قازاقستاندىق ب ا ق ءۇشىن Astana Media Week اپتاسىن وتكىزۋ داستۇرگە اينالدى. «رۋحاني جاڭعىرۋ» باعدارلاماسى اياسىندا مينيسترلىك «قازاقستاننىڭ 100 جاڭا ەسىمىن» دە جۇزەگە اسىرۋدا. اشىق داۋىس بەرۋ ناتيجەسىندە، ءوز ەڭبەكتەرىمەن ۇلكەن الەۋمەتتىك تابىسقا جەتكەن ەلىمىزدىڭ جاڭا ەسىمدەرى بەلگىلى بولدى. وتكەن جىلدىڭ 1 جەلتوقسانىندا ولار ەلباسىمەن كەزدەستى. وسى ورايدا، «100 جاڭا ەسىمنىڭ» قوعامعا پايدالى جوبالارى مەملەكەتتىڭ قولداۋىنا يە بولاتىنىن اتاپ وتكىم كەلەدى، – دەدى داۋرەن ابايەۆ.
بايانداما بارىسىندا زورلىق-زومبىلىق كورگەن نەمەسە باسقا دا قۇقىق بۇزۋشىلىقتاردان زارداپ شەككەن بالالاردى قورعاۋ ماقساتىندا، ولاردىڭ بەت-الپەتى مەن بالاعا قاتىستى اقپاراتتاردى جاريالاۋعا تىيىم سالىنعانى ايتىلدى. بالالاردى ينتەرنەتتەگى دەسترۋكتيۆتى اقپاراتتاردان قورعاۋ ءۇشىن دە وتكەن جىلى مينيسترلىك بايلانىس وپەراتورلارى جانە «بولاشاق» قاۋىمداستىعىمەن بىرلەسە وتىرىپ، ءبىلىم بەرۋ ينتەرنەت جوباسىن ىسكە قوسقان. بۇل جوبادا بالالارعا ارنالعان ءقاۋىپسىز ينتەرنەت-سەرۆيستەر، تانىمدىق جانە ويىن تۇرىندەگى باعىتتار قاراستىرىلعان 3 مىڭ 500-دەن استام سايت بار ەكەن. بۇدان بولەك، مەملەكەتتىك ورگاندار مەن ۇيىمدارعا ەندى كوپشىلىك شوعىرلانعان جەرلەردە تەك وتاندىق ارنالاردى كورسەتۋ قاجەتتىلىگى تۋرالى مىندەتتەمە بەلگىلەنگەن.
ەسەپتىك باياندامادان كەيىن اقپارات جانە كوممۋنيكاسيالار مينيسترىنە ونلاين-رەجيمدە بايلانىسقا شىعىپ وتىرعان ايماقتاردىڭ تۇرعىندارى مەن زالداعى جۇرت بىرنەشە سۇراق قويدى. ەندى سولاردىڭ ىشىندەگى ەڭ ماڭىزدىلارىنا توقتالىپ وتسەك...
ب ا ق وكىلدەرىنىڭ ءبىرى مينيستردەن باسپانامەن قامتۋ باعدارلامالارى اياسىندا جۋرناليستەردىڭ جەكەلەي قاراستىرىلۋ-قاراستىرىلماۋى جونىندە سۇرادى.
– ەلىمىزدەگى بۇقارالىق اقپارات قۇرالدارىنىڭ 95 پايىزى – جەكەمەنشىك كومپانيالاردىڭ ەنشىسىندە. سول سەبەپتى، جەكەمەنشىك ب ا ق باسپانامەن قامتۋ ماسەلەسىن وزدەرى شەشۋى ءتيىس. مىسالى، مۇعالىمدەردىڭ بارلىعى بيۋدجەتتىك قىزمەتكەرلەر دەسەك، جۋرناليستەردىڭ باسىم بولىگى بۇل ساناتقا جاتپايدى. ال ءبىز ءار ۆەدومستۆوعا باعىنىشتى ۇيىمنىڭ باسشىسىنا وسى ماسەلەنى قويامىز. بۇل ماسەلە ءبىر جەردە شەشىلەدى، ەندى ءبىر جەردە شەشىلمەي جاتادى. ءبىر جەردە جاتاقحانا بار دەگەندەي. ەگەر ۆەدومستۆوعا باعىنىشتى ۇيىمداردىڭ باسشىلارى ماعان ۇسىنىسپەن كەلسە، ءبىز ولاردى مىندەتتى تۇردە قولدايمىز. سوندىقتان ب ا ق جەتەكشىلەرىنەن ۇسىنىستار كۇتەمىن، – دەدى داۋرەن ابايەۆ.
كەلەسى سۇراق ۇيالى بايلانىس وپەراتورلارىنا قاتىستى بولدى. وعان جاۋاپ بەرگەن ءمينيستردىڭ ايتۋى بويىنشا، قازاقستاندىقتار ۇيالى تەلەفوندارىن 2018 جىلدىڭ اياعىنا دەيىن تىركەپ ۇلگەرۋى كەرەك. ويتپەگەن جاعدايدا، وعان 2019 جىلدىڭ 1 قاڭتارىنان باستاپ قىزمەت كورسەتىلمەيتىن كورىنەدى.
مينيستر بايانداماسىندا دا، سۇراق-جاۋاپ كەزىندە دە ەلدەگى ينتەرنەت ينفراقۇرىلىمىن دامىتۋ بارىسىن باسا ايتتى. ونىڭ سوزىنشە، «سيفرلىق قازاقستان» مەملەكەتتىك باعدارلاماسى اياسىندا، بۇگىندە جىلدامدىعى جوعارى ينتەرنەتتى 13 ميلليون تۇرعىن پايدالانادى. تارقاتىپ ايتقاندا، تۇرعىن سانى 10 مىڭنان باستالاتىن ەلدىمەكەندەر 3G، ال 50 مىڭنان جوعارى تۇرعىنى بار ەلدىمەكەندەر 4G بايلانىس ستاندارتىمەن قامتىلعان. ال بىلتىر ەلىمىزدەگى بارلىق اۋدان ورتالىعى بايلانىستىڭ 4-بۋىنىمەن قامتاماسىز ەتىلىپتى. مينيسترلىكتىڭ ەندىگى مىندەتى – اۋىلدىق جەرلەرگە كەڭ جولاقتى ينتەرنەت جەتكىزۋ. مۇنى مەملەكەتتىك-جەكەشەلىك سەرىكتەستىك باعدارلاماسى ارقىلى جۇزەگە اسىرۋ جوسپارلانعان.
– ول ءۇشىن جوبا اياسىندا 2021 جىلعا دەيىن 2 ميلليوننان استام تۇرعىنى بار 1 مىڭ 249 ەلدىمەكەندى جىلدامدىعى جوعارى ينتەرنەتپەن قامتيمىز. جىلدامدىعى جوعارى ينتەرنەت اۋىل شارۋاشىلىعىن سيفرلاندىرۋ، ءبىلىم بەرۋ مەن مەديسينا سالاسىنىڭ ساپاسىن ارتتىرۋ، سونداي-اق، مەملەكەتتىك قىزمەت كورسەتۋ سالاسىن دامىتۋ سىندى اۋىلداعى كەشەندى ماسەلەلەردى شەشەتىن بولادى، – دەدى اقپارات جانە كوممۋنيكاسيالار ءمينيسترى داۋرەن ابايەۆ.
پىكىر قالدىرۋ