پاۆلودار وبلىسىندا 12 جاسار قىزعا ازعىندىق جاساماق بولعان ەر ادام قۇرىقتالدى. 39 جاستاعى كۇدىكتى وقۋشىنى ليفت ىشىندە زورلاۋعا ارەكەتتەنگەن، دەپ جازادى Qamshy.kz اقپارات اگەنتتىگى ktk.kzء-تىڭ مالىمەتىنە سۇيەنىپ.

وقيعا تاپا-تال تۇستە ەكىباستۇز شاھارىنداعى تۇرعىن ۇيلەردىڭ بىرىندە بولعان. ونداعى بەينەباقىلاۋ كامەراسىنا ءتۇسىپ قالعان مىنا كادرلاردا مەكتەپتەن قايتىپ كەلە جاتقان وقۋشى قىزدىڭ دۇكەنگە كىرگەنى بايقالادى. جەتكىنشەكتى اڭدىعان كۇدىكتى دە وسىندا تايراڭداپ ءجۇر. كەيىن ۇيىنە قاراي بەت العان وقۋشىنىڭ سوڭىنان پودەزگە بىرگە ەرىپ كىرگەن. اقىرى ليفت ىشىندە قىزدى شەشىندىرۋگە ارەكەتتەنىپتى. ەسىك اشىلعان ساتتە قاشىپ قۇتىلعان جەتكىنشەك مۇنى بىردەن اناسىنا ايتىپ بەرگەن ەكەن. كۇدىكتى بولسا، وقيعا ورنىنان دەرەۋ ءىزىن سۋىتقان. دەسە دە، پوليسەيلەر كوپ ۇزاماي 39 جاستاعى ەكىباستۇزدىقتى قولعا ءتۇسىردى.

بايان ماعزۇموۆا، پاۆلودار وبلىسى ءىىد باسپا ءسوز حاتشىسى:

-كامەلەتكە تولماعانعا قاتىستى ازعىندىق ارەكەت جاساۋعا وقتالعان دەگەن كۇدىكپەن 39 جاسار ەر ادام انىقتالىپ ۇستالىندى. قازىرگى كەزدە وسى فاكت بويىنشا قىلمىستىق ءىس قوزعالىپ، سوتقا دەيىنگى تەرگەۋ جالعاسۋدا. سوت ساراپتامالارى تاعايىندالدى. ال كۇدىكتى ۋاقىتشا قاماۋ يزولياتورعا قاماۋعا الىندى.