ق ر قورعانىس جانە اەروعارىش ءوندىرىسى ءمينيسترى بەيبىت اتامقۇلوۆ بايقوڭىر عارىش ايلاعى «ازاماتتىق بولۋى مۇمكىن» دەگەن اقپاراتقا جاۋاپ بەردى.
«ءيا، بايقوڭىردان رەسەي اسكەرىن تۇگەل شىعارۋ ماسەلەسىنىڭ تالقىلانىپ جاتقانى راس. الايدا ەكىجاقتى كەلىسىم ءالى بولعان جوق، تەك وسى باعىتتاعى جۇمىس جالعاسىپ جاتىر»، - دەدى مينيستر ءماجىلىس پارلامەنتىنىڭ ۇزىلىسىندە.
سونىمەن قاتار، اتامقۇلوۆ مۇنداي شەشىمنىڭ قازاقستان ءۇشىن ءتيىمدى ەكەنىن دە ايتتى. ماسەلەن رەسەي ساربازدارى بايقوڭىردان كەتەر بولسا، وندا عارىش ايلاعىنان مول تابىس تابۋعا بولادى ەكەن. سەبەبى بۇگىندە جەر سەرىكتەرىن ۇشىرا الماي جاتقان مىڭداعان كومپانيالار بار.
وسىلايشا، 2018 جىل بايقوڭىر تاريحىنداعى اسكەري پاراقتىڭ جابىلىپ، ونىڭ باسقاشا قىرىنان دامۋىنا اكەلەتىن تابىستى جىل بولماق دەپ بولجايدى مينيستر.
