«شاش ال دەسە باس الىپ» نەمەسە «جونگە سال دەسە تەزگە سالىپ وتىراتىن» شەنەۋنىكتەر مەن ماماندار بىزدە كوبەيگەن ۇستىنە كوبەيىپ بارا جاتىر. مىنە، «استانا-پاۆلودار» جولىن جاڭعىرتۋ جۇمىسىن جوبالاعان ماماندار دا سولاردىڭ ءبىرى بولىپ، ەرەيمەنتاۋ اۋدانىنداعى ولەڭتى اۋىلدىق وكرۋگىنا قارايتىن قورجىنكول ستانساسىنىڭ تۇرعىندارىنا 11 اي بويى جوسىقسىز قىساستىق جاساپ وتىر.

بۇل تۋرالى ماجىلىستەگى حالىقتىق كوممۋنيستەر فراكسياسى اتىنان ۇكىمەت باسشىسى مەن باس پروكۋرورعا قايرىلۋعا ءماجبۇر بولعان دەپۋتات ايقىن قوڭىروۆ جاريا ەتتى. جول سالۋ جۇمىستارىمەن ۇلانعايىر جەردى قازىپ، قوپارىپ جاتقاندار ماگيسترالدىڭ بويىنداعى ەلدى مەكەندەر تۇرعىندارىنىڭ مال ايداۋىنا، جايىلىم مەن سۋعا جەتۋىنە كەدەرگى جاساپ وتىرعان كورىنەدى. سونىمەن بىرگە بۇل جۇمىستاردىڭ ۇشى-قيىرى جوق، مىنە 11 اي بولعان، ءالى دە بىتەتىن ءتۇرى جوق. سونىڭ كەسىرىنەن تۇرعىندار مالدارىن جايىلىمعا شىعارۋ ءۇشىن، جەم-شوپ دايىنداۋ ءۇشىن 50 شاقىرىمداي جەردى اينالىپ وتۋگە ءماجبۇر ەكەن. وسىنى كورىپ وتىرعان جەرگىلىكتى شەنەۋنىكتەر قولدارىنان قايران بولماي، اسپانعا قارايتىن كورىنەدى. حالىقتىڭ زارىنا جوعارعى جاق قۇلاق تۇرەتىن ەمەس. سوندىقتان تۇرعىندار دەپۋتاتتارعا قايرىلىپتى. ال دەپۋتاتتار جوعارىدا ايتقانىمىزداي جوعارى باسشىلىققا ساۋال جولداپ، ماسەلەنى شەشۋدى ءوتىندى. ولاردىڭ «سەن سالار دا مەن سالار» قىلماي قانشاما حالىقتىڭ اشۋ-ىزاسىن تىياتىن شەشىم قابىلدانار دەگەن ءۇمىتى بار.

س.ەلەۋ، ساراپشى