«دوم» قايىرىمدىلىق قورىنىڭ ديرەكتورى،  قوعام قايراتكەرى، اكتريسا    ارۋجان سايىننىڭ پىكىرىنشە، قازاقستانداعى بالالار ءۇيىن 7-8 جىلدىڭ ىشىندە بوساتۋعا بولاتىن كورىنەدى دەپ حابارلايدى tengrinews.kz ءتىلشىسى.

 تەلەجۇرگىزۋشى ارۋجان سايىننىڭ سوزىنە سۇيەنسەك، بۇگىنگى تاڭدا قازاقستاندعى 196 ينتەرناتتا  شامامەن 11 مىڭ بالا  تاربيەلەنۋدە.  جىل سايىن مەملەكەت اتا-اناسىنان ايىرىلعان تاستاندىلاردىڭ ەسەبىنە 8 ملرد. تەڭگە بولەدى. سوندا ءاربىر بالاعا ورتا ەسەپپەن شامامەن 1 ملن.  تەڭگەدەن كەلەدى.

     سوندىقتان،  ارۋجان  حانىم  بالالار  ءۇيىنىڭ ازايۋى  ءۇشىن  ءتۇرلى  ۇسىنىستار جاساپ  وتىر.

  «الدىمەن،   بارلىق كەمشىلىكتەردى  ەسەپكە الا وتىرىپ، اسىرەسە   قارجىلاندىرۋ جاعىن جاقسىلاپ ويلانىپ، ساراپتاما جاساۋ كەرەك. مىسالى،  ءبىر وتباسىدا ءسابي اۋرۋ بولىپ تۋىلدى دەلىك. ول وتباسىنىڭ نەمەسە جالعىزباستى انانىڭ پاتەرى نەمەسە اقشاسى جوق. مۇنداي جاعدايدا ءنارەستە ءوز  ۇيىندە تاربيەلەنە بەرسىن، ءبىراق مەملەكەت قارجىنى سول وتباسىعا ءبولسىن.  دەگەنمەن  بۇل جەردە دە تاعى ويلانىپ، جاعدايدى انىقتاۋ قاجەت»،- دەدى ارۋجان سايىن.

   ونىڭ ايتۋى بويىنشا، 2010 جىلدىڭ 8 ناۋرىزىنا قارسى ەلباسىمەن كەزدەسۋ بارىسىندا بالالار ۇيىندە تاربيەلەنىپ جاتقان سابيلەردىڭ جاعدايى تۋرالى ماسەلە  كوتەرىلگەن.  سونداي-اق، ەلىمىزدە بۇل  جايتقا  زاڭ جاعى دا    اسا  ءمان  بەرىپ  وتىر.  ماسەلەن، بۇرىن بالالار ۇيىندەگى تاربيەلەنۋشىلەر جايلى اقپاراتتى اشىق كۇيىندە جاريالاۋعا بولمايتىن  ەدى،  ال  جاڭا  «نەكە مەن وتباسى» كودەكسىنىڭ قابىلدانۋىنا بايلانىستى، اكە-شەشەسىنىڭ قاراۋىنسىز قالعان بالالاردىڭ سۋرەتتەرىن قورسەتىپ، اتى-جوندەرىن جانە تۋعان كۇندەرىن كورسەتۋگە بولادى.

    سونىمەن  قاتار،  «2012 جىلدىڭ شىلدەسىنەن باستاپ، «دوم» قايىرىمدىلىق قورى جانە ءبىلىم جانە عىلىم مينيسترلىگىنىڭ  بالالار قۇقىعىن قورعاۋ كوميتەتىنىڭ بىرىگۋىمەن  «بالالاردىڭ ماعلۇماتى تۋرالى ونلاين-بانكى» جوباسى  ىسكە قوسىلدى. قازىرگى تاڭدا ونلاين-بانك بازاسىندا 2000-عا  جۋىق بالانىڭ اقپاراتى تۇر. شىندىعىندا،  ول جەردە قازاقستانداعى بارلىق  تاستاندى بالالاردىڭ مالىمەتى بولۋى كەرەك»،- دەدى. بۇل  جۇيە  ─ جەتىم  بالا اسىراپ  الۋشى  قايىرىمدى  جاندارعا  ارنالعان  ەڭ  ءتيىمدى،  ءارى  ناتيجەلى  ءىس. سەبەبى،  بالا اسىراپ  العىسى  كەلگەن كەز-كەلگەن ادام  وسى ونلاين-بانكينگكە  كىرىپ،   كاتولوگ  ارقىلى  وزىنە  ۇناعان  بالانى  تاڭداپ  الا  الادى.   بۇل  جاڭا  جۇيەنىڭ  ناتيجەسى  دە  جامان  ەمەس.   بالالار ۇيىندەگى تاربيەلەنۋشىلەر تۋرالى اقپارات ورنالاسقان ونلاين-بانكتىڭ ارقاسىندا  جارتى جىلدىڭ  ىشىندە بالالار ۇيىنەن  55 بالا اسىراپ الىنعان. بانك ۇيىمداستىرۋشىلارى  ايماقتىق دەپارتامەنتتەردەن بالالار جايلى اقپاراتتار مولىراق بەرسە  دەگەن  نيەتتە.   

 ارۋجان حانىمنىڭ ايتۋىنا قاراعاندا،  بالالار ءۇيىنىڭ ازايتۋ  الەۋمەتتىك شارالار سانىن كوبەيتۋ كەرەك كورىنەدى. «ايالى الاقان»، «دوروگا دوموي» سىندى الەۋمەتتىك باعدارلامالار قاتارىن كوبەيتىپ، الەۋمەتتىك روليكتەردى كوپتەپ ءتۇسىرىپ، ناسيحات امالدارىن جۇرگىزۋ قاجەت. وسىنداي  شارالار تۇراقتى  تۇردە جۇرگىزىلەر بولسا،  بولاشاقتا  جەتىمدەر  ءۇيى ازاياتىن  بولادى»،- دەگەن سەنىمدە.  ─ ءبىر  قۋانتارلىق جايت،   2005 جىلمەن سالىستىرعاندا،   الماتىداعى بالالار ۇيىندە تاربيەلەنۋشىلەر سانى  قازىرگى تاڭدا  الدەقايدا از. سوعىس كەزىندە اتا-اناسىنان ايىرىلعان بالالاردى تۋىستارى، اعايىندارى اسىراپ الاتىن ەدى. ءبىزدىڭ حالقىمىزعا «بالالار ءۇيى» دەگەن تۇسىنىك ءالى دە جات. سونى تىپتەن الىپ تاستاۋىمىز قاجەت»،- دەيدى.

 ءتۇيىن:  بۇگىنگى  بەزبۇيرەكتىك پەن  قاتىگەزدىك  جايلاعان  قوعامدا  جەتىمىن قازاق  جىلاتپاسا  ەكەن.  «ءار -  قازاق مەنىڭ  جالعىزىم»  دەيتىن ازاماتتار  بولسا، جەتىمدەردى   جەبەي  ءجۇرىپ،  رۋحاني جانە  ماتەريالدىق  كومەك  كورسەتسە  يگى ەدى.  سەبەبى  كوزدەرى  جاۋدىرەگەن  قارادومالاق  قازاق  بالالارى  جەتىمدىك كۇيىن  كەشىپ، تاستاندى  اتانۋى  – ۇلتتىڭ  سۇيەگىنە تاڭبا.