9 مامىر كۇنى تاڭەرتەڭ ادەتتەگىدەي وسكەمەندەگى وزەن ۆوكزالىنىڭ ماڭىنا قالا تۇرعاندارى جينالا باستادى.  سوڭعى بىرنەشە جىل كولەمىندە  ەرتىس جاعالاۋىمەن شەرۋ تارتىپ، اتالارىنىڭ سۋرەتتەرىن كوتەرىپ شىعۋدى ادەتكە اينالدىرعان قالالىقتار  بيىل دا «ماڭگىلىك پولك»  دەپ اتالاتىن جيىنعا كەلدى. ورىسشاسى «بەسسمەرتنىي پولك» بولعان سوڭ ءبىز ونى «ماڭگىلىك پولك» دەپ قازاقشالادىق، الايدا، كوشەنىڭ كولدەنەڭىنە ءبىراق جەتەتىن ۇزىن پلاكاتتا بۇل «داڭق پولكى» دەپ جازىلىپتى. قانداي پولك بولسا بۇل اكسيانىڭ  ەكىنشى دۇنيەجۇزىلىك سوعىستا شەيىت بولعان بوزداقتاردى ەسكە الۋعا باعىتتالعانى بەلگىلى. ەڭ باستىسى بۇل اكسيا سوڭعى جىلدارى بۇقارالىق سيپات الىپ، شەرۋگە ەڭكەيگەن قاريادان ەڭبەكتەگەن بالاعا دەيىن قاتىساتىن بولىپ ءجۇر.

ۇيىمداستىرۋشىلاردىڭ ايتۋىنشا، بيىلعى شەرۋگە دە 10 مىڭنان استام ادام جينالعان. تاڭەرتەڭگى ساعات 10-00 شاماسىندا وزەن ۆوكزالىنان قوزعالعان قالىڭ جۇرت ەرتىس جاعالاۋىمەن داڭق مەموريالىنا قاراي بەت تۇزەدى.

كولوننانىڭ باسىندا شقو مادەنيەت باسقارماسىنىڭ ۇرلەمەلى اسپاپتار ءانسامبلى سالتاناتتى اسكەري اۋەندەر ويناپ، اكسياعا ەرەكشە  كوڭىل-كۇي  بەرىپ كەلە جاتتى. سونىمەن قاتار وبلىستىق ءىىد، تجد سياقتى مەملەكەتتىك قۇرىلىمدار مەن اكىمدىك قىزمەتكەرلەرى دە شەرۋدە ساپ تۇزەدى.

قالا تۇرعىندارىمەن بىرگە مەرەكەلىك شاراعا وبلىس اكىمىنىڭ ءبىرىنشى ورىنباسارى ەرلان ايمۇقاشيەۆ، وبلىس اكىمىنىڭ ورىنباسارى اسەم ءنۇسىپوۆا، قالا اكىمى قۋات تۇمابايەۆ باستاعان وبلىس جانە قالا باسشىلىعىنىڭ وكىلدەرى دە الدىڭعى قاتاردان كورىندى.وبلىستىق مەشىتتىڭ باس يمامى ەرمەك قاجى تاسبولات ۇلى مەن وسكەمەن قالاسىنىڭ ەپيسكوپى امفيلوحيي شەرۋ ساپىندا بولدى.

وسكەمەندىكتەر سلاۆسكيي جاعالاۋىنىڭ بويىمەن قوزعالدى، جول بويى شەرۋشىلەر سانى تولىعىپ، كوبەيە ءتۇستى. سۋرەت كوتەرگەن حالىقتىڭ باسى سترەلكاعا جەتكەندە اياعى وزەن ۆوكزالىنان ەندى عانا جىلجىعان بولاتىن.

وسكەمەن قالاسىنىڭ تۇرعىنى ازامات ىدىرىشيەۆ ءوزىنىڭ اتاسى احات ىدىرىشيەۆتىڭ ەرلىگى تۋرالى ايتىپ بەردى. اتاسى 1941-1945 جىلدار ارالىعىندا سوعىسقا باستان اياق قاتىسقان ەكەن.

-اتام بەرلينگە دەيىن بارىپ، بۇكىل ەۋروپانى  جاياۋ شارلاپ قايتىپتى. ونىڭ ەرلىگىن ءبىز جانۇيامىزبەن ماقتان تۇتامىز. جىل سايىن  اتامىزدىڭ سۋرەتىن كوتەرىپ وسى شەرۋگە قاتىساتىن بولىپ ءجۇرمىز. ۇلىمنىڭ دا ەسىمى  احات. مىنە ونىڭ كەۋدەسىندەگى مەدالدار سول اتامىزدان قالعان. ەندى ۇلكەن اتاسىنىڭ مەدالدارىن كىشكەنتاي احات تاعىپ ءجۇر،-دەپ ازامات ءوز ۇلىنىڭ كەۋدەسىندەگى مەدالداردى كورسەتتى.