ق ر دەنساۋلىق ساقتاۋ ءمينيسترى ەلجان ءبىرتانوۆ الماتىعا ۇشىپ باردى، دەپ حابارلايدى 24.kz.

اۋەجايدان تۇسە سالعان بەتتە ات باسىن تالعارعا بۇرعان ەلجان امانتاي ۇلى قالاداعى ورتالىق اۋرۋحانانىڭ جاي-كۇيىمەن تانىسىپ، ناۋقاستاردىڭ جاعدايىن ءبىلدى. سوڭعى 2 كۇندە تالعار قالاسىندا 300-گە جۋىق ادام جەدەل جاردەم شاقىرتقان. سولاردىڭ ىشىندە تەك 30-ى عانا اۋرۋحاناعا جەتكىزىلگەن ەكەن. وسى تۇستا مينيستر اۋرۋحانا قىزمەتكەرلەرىنە قاتاڭ ەسكەرتۋ جاساپ، ناقتى تاپسىرمالار جۇكتەدى.

«ەسكى جۇيە بويىنشا جۇمىس جاساۋدى توقتاتۋ كەرەك. «دەنساۋلىق» مەملەكەتتىك باعدارلاماسىندا ءبارى جازىلعان. سوندىقتان دارىگەرلەر ناۋقاستى ارى-بەرى جىلجىتپاي بارلىق قاجەتتى ينتەنسيۆتى تەراپيانى وسى جەردەن بەرۋ كەرەك»، - دەگەن مينيستر مەنينگوكوكك ينفەكسياسىن جۇقتىرىپ قايتىس بولعان 5 جاسار بالا مەن 19 جاستاعى قىزدىڭ ولىمىنە قاتىستى ماسەلە بويىنشا ءقازىر دەنساۋلىق ساقتاۋ كوميتەتى ساراپتاما جۇرگىزىپ جاتقانىن جەتكىزدى. جانە كىنالىلەردىڭ بارلىعى زاڭ بويىنشا جاۋاپقا تارتىلاتىنىن ەسكەرتتى.

«جالپى ەلىمىزدە مەنينگيتكە قارسى شارالار حالىقارالىق ستاندارتتارعا سايكەس جۇزەگە اسىرىلىپ جاتىر. ءبىراق حالىققا ءتۇسىندىرۋ جۇمىستارى تىم باياۋ. سوندىقتان قوعامدا وسىنداي الاڭداۋشىلىق تۋىپ وتىر»، - دەگەن سالا باسشىسى ەندى الماتى قالاسى مەن قاسكەلەڭدەگى ارۋحانالاردى ارالاۋدى جوسپارىنا ەنگىزدى.

ەلجان ءبىرتانوۆ، ق ر دەنساۋلىق ساقتاۋ ءمينيسترى:

- بۇرىن جاعدايدا تەك عانا گازەت بولعان. ودان كەيىن گازەت پەن تەليەۆيدەنيە بولعان، ودان كەيىن ينتەرنەت پورتالدار، ءقازىر الەۋمەتتىك جۇيەلەر، فەيسبۋك، تۆيتتەر سونىمەن ءقازىر حالىقتا اقپارات كوپ. كوپ جاعدايدا دۇرىس تۇسىنبەيدى. ارينە ارنايى ماماندىق ءبىلىمى بولماعاننان كەيىن تىكەلەي وسىنداي جاعدايدا سىزدەردى مازالايدى. ءبىز تۇسىنەمىز. قازىرگى كۇندەردە جۇمىستاردى دۇرىستاپ ۇيىمداستىرىپ مامانداردى قولداپ، مەن كورىپ وتىرمىن بۇكىل مۇمكىندىكتەر بار.