قۇرمانعازى اتىنداعى ۇلتتىق كونسەرۆاتوريانىڭ توڭىرەگىندەگى داۋدىڭ دابىراسى باسىلماي تۇر. سەبەبى مەملەكەتتىك ءاۋديتتىڭ تەكسەرۋ اكتىلەرى بويىنشا اقىلى قىزمەتتەر مەن ستيپەنديالاردان 200 ملن تەڭگەدەن استام قارجى قولدى بولعان. وقۋ ورنىنىڭ رەكتورى، بەلگىلى پيانينوشى ءجانيا اۋباكىروۆانىڭ جەمقورلىققا تىكەلەي قاتىسى بار دەيدى ارىپتەسى.

بيىل 24 مامىردا مادەنيەت مينيسترلىگى كونسەرۆاتوريادا جۇرگىزگەن تەكسەرىس ناتيجەسىن الماتىداعى قۇقىق قورعاۋ ورگاندارىنا تاپسىردى.

جاقىندا كونسەرۆاتوريانىڭ قارجى جانە ەكونوميكالىق ماسەلەلەر جونىندەگى پرورەكتورى بوتاكوز كوپبايەۆانىڭ مالىمدەمەسى جەلىدە قىزۋ تالقىعا ءتۇستى. ول وقۋ ورنىنداعى زاڭسىز ارەكەتتەردى اشكەرەلەپ، رەكتورى ءجانيا اۋباكىروۆاعا ءبىرقاتار ايىپ تاققان. ال ءجانيا اۋباكىروۆا پرورەكتوردىڭ ءسوزىن جاپقان جالا، جاققان كۇيە دەپ، ات-تونىن الا قاشىپ وتىر.

بوتاكوز كوپبايەۆا قارجى جانە ەكونوميكالىق ماسەلەلەر جونىندەگى پرورەكتور لاۋازىمىنا 2017 جىلدىڭ 2 مامىرىندا ءجانيا اۋباكىروۆانىڭ شاقىرتۋىمەن تاعايىندالعان. «ۆرەميا» گازەتىنە بەرگەن سۇحباتىندا ول جۇمىسقا كەلگەن كۇننەن باستاپ تۇسىنىكسىز جاعدايعا تاپ بولعانىن ايتادى.

بوتاكوز كوپبايەۆا كونسەرۆاتورياعا قۇجات جۇزىندە جۇمىسقا قابىلدانعان، ءبىراق ءىس جۇزىندە مۇلدە قىزمەت اتقارمايتىن ونداعان ادامنىڭ ەسىمىن تاپقان. باس بۋحگالتەر جۇمىستان كەتكەن سوڭ «1س» باعدارلاماسىنا كىرىپ، كەيبىر قىزمەتكەرلەردىڭ ەسەپشوتىنا اي سايىن جالاقىدان بولەك قوماقتى قاراجات ءتۇسىپ وتىرعانىن اڭعارادى. وزگە ەسەپشىلەردەن ماسەلەنىڭ ءمان-جايىن سۇراستىرعاندا، ولار اقشانى كارتادان العان سوڭ باس بۋحگالتەر جۇماعۇلوۆاعا بەرىپ وتىرعاندارىن مويىنداپتى. ءتىپتى، رەكتور ءجانيا اۋباكىروۆانىڭ كومەكشىسىنىڭ شوتىنا دا تۇسىنىكسىز اقشا اۋدارىمدارى جاسالعان.

پرورەكتور وسىلايشا بانك كارتالارى ارقىلى 77 ميلليون تەڭگە قاراجاتتىڭ قۇمعا سىڭگەن سۋداي جوعالىپ كەتكەنىن انىقتاعان. مۇنداي جاعداي سوڭعى ءۇش جىلدا تۇراقتى قايتالانعان. بۋحگالتەرلىك ەسەپتەگى قاتەلەر، اقىلى قىزمەتتەن تۇسكەن قاراجاتتىڭ بوتەن ەسەپشوتتارعا ءتۇسۋى، مامانداردىڭ جۇمىستان تۇسىنىكسىز سەبەپتەرمەن بوساتىلۋى، ەڭ سوراقىسى، كونسەرۆاتورياداعى بىلىقتاردىڭ بەتى اشىلا بەرگەندە بوتاكوز كوپبايەۆانىڭ سوققىعا جىعىلىپ، اۋرۋحاناعا ءتۇسۋى جاعدايدى ۋشىقتىرىپ جىبەرگەن.

بوتاكوز كوپبايەۆا وزىنە جاسالعان قاستاندىققا ءجانيا اۋباكىروۆانى كىنالايدى. الايدا ءجانيا اۋباكىروۆا قولاستىنداعى ماماننىڭ سوققىعا جىعىلعانىن سول كۇنى-اق قارجى ءمينيسترى باقىت سۇلتانوۆقا حابارلاپ، مۇنىڭ كونسەرۆاتورياداعى قۇجاتتارمەن بايلانىستى بولۋى مۇمكىن ەكەنىن ەسكەرتىپتى.

25 مامىردا رەكتور ۇزاق ۇنسىزدىكتەن كەيىن بوتاكوز كوپبايەۆانىڭ وزىنە تاققان ايىپتارىنا الەۋمەتتىك جەلىدە جاۋاپ بەردى. ايتۋىنشا، كوپبايەۆا  2017 جىلدىڭ ماۋسىم ايىنىڭ اياعىندا باس بۋحگالتەردىڭ جۇمىسىنان زاڭ بۇزۋشىلىقتاردى بايقاعان.

«كوپبايەۆا جۇرگىزگەن تەكسەرىستىڭ بارلىعىن ءوزىم باقىلاپ وتىرمىن. ىىد-گە، ىىم-گە ونىڭ سوققىعا جىعىلعانىن مەن حابارلادىم. بۇرىنعى باس بۋحگالتەردىڭ جۇمىسىنان تابىلعان ولقىلىقتاردى تۇزەتۋ ءۇشىن تاۋەلسىز اۋديتورلىق كومپانيالار مەن مەملەكەتتىك مەكەمەلەرگە دە ءوزىم حابارلاسقان بولاتىنمىن»، - دەپ جازدى اۋباكىروۆا.

رەكتوردىڭ سوزىنشە، كوپبايەۆا جۇمىس بارىسىندا ارىپتەستەرىمەن ءتىل تابىسا الماعان. ال قىزمەت بابىمەن استاناعا بارعان ساپارىنان كەيىن مينيسترلىك تاراپىنان پرورەكتوردىڭ اتىنا شاعىمدار تۇسكەن.

قوس تاراپتىڭ بىر-بىرىنە تاعىپ وتىرعان ايىپتارى مەملەكەتتىك مەكەمەدەگى كوپ بىلىقتىڭ بەتىن اشىپ بەردى. بوتاكوز كوپبايەۆا جەلىدە جاريا تۇردە شىندىق ىزدەپ شىرىلدايدى. مەملەكەتتىك مەكەمەلەردە قاراجاتتىڭ قالاي جىمقىرىلاتىنى جونىندە اشىق جازادى. ال ءجانيا اۋباكىروۆا اقتالىپ الەك. بۇل ەلىمىزدىڭ مادەنيەت سالاسىندا بولىپ جاتقان العاشقى ايتىس-تارتىس ەمەس. مەملەكەت قارجىسىنىڭ ۇرلانۋى، قۇيتىرقى جولدارمەن ماقساتسىز جۇمسالۋى ادەتتەگى نارسەگە اينالىپ بارادى.