قازاقستاندىق رەجيسسەر قانات بەيسەكەيەۆ ءوزىنىڭ يراندا ۇستالعانى جايلى ايتىپ بەردى. بۇل تۋرالى رەجيسسەر Telegram-داعى پاراقشاسىندا جازعان.

ءتۇسىرىلىم توبىمەن بىرگە تاياۋ شىعىس ەلىنە بارعان قانات بەيسەكەيەۆتى قايتپاق بولعاندا اەروپورت قىزمەتكەرلەرى دوسى ەكەۋىن ۇستاپ، سومكەسىن تەكسەرۋ بارىسىندا كۆادروكوپتەردى بايقاعان.

«نۇرسۇلتان ەكەۋمىزدى پوليسيا بولىمشەسىنە اپاردى. ادىلەتتى چەكينگ جاساۋعا جىبەرگەنبىز، سونىڭ ارقاسىندا ۇستالعان جوق»، - دەدى قانات بەيسەكەيەۆ.

رەجيسسەر مەن دوسىن پوليسەيلەر ءۇش ساعات بويى تەرگەگەن ەكەن. اقىرى قانداي شەشىم قابىلدارىن بىلمەگەن پوليسيا ەكەۋىن بوساتىپ جىبەرەدى. تەك بەيسەكەيەۆتى بۇدان وتكەن قيىندىق كۇتىپ تۇردى.

«ءبىز گەيتكە قاراي جۇيتكىدىك. ال ول جەردە ءبىزدى پوليسيادان دا لاۋازىمدى قىزمەتكەرلەر كۇتىپ تۇردى – ۇلتتىق قاۋىپسىزدىك قىزمەتكەرلەرى. قايتادان بولىمشەدەن ءبىراق شىقتىق، سومكەلەرىمىزدى تەكسەردى. ىشىندە Macbook Pro، ايپاد جانە تۇسىرىلىمگە قاجەتتى جابدىقتار بولدى. ولار ءبارىن تاركىلەدى»، - دەپ جازدى رەجيسسەر.

بۇعان قوسا ولاردىڭ قولىندا يراندا جۇمىس ىستەيتىن قازاقتىڭ امانات حاتى بولعان ەكەن. كونۆەرت ىشىندە نە بار ەكەنىن ەكەۋى بىلمەگەن. قاۋىپسىزدىك قىزمەتكەرلەرى ونى دا اشىپ قارادى، كونۆەرت ىشىنەن ءجۇز دوللارلىق كۋپيۋرالار شىقتى.  

«يراندىق چەكيستەر اقشانى قايتارىپ بەردى. ال تۇسىرىلىمگە قاجەتتى زاتتاردى الىپ قالدى»، - دەيدى بەيسەكەيەۆ.

قازىرگى ۋاقىتتا رەجيسسەر الماتىدا. جاعدايى دا قالىپتى.

قانات بەيسەكەيەۆتىڭ ۇستالعانى جايلى اقپارات 22 ماۋسىمدا شىققان. PR-مامانى الىشەر ەلىكبايەۆ رەجيسسەردىڭ مىڭ دوللار كولەمىندەگى جابدىقتارىنىڭ تاركىلەنگەنىن حابارلاعان بولاتىن.