قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭمەن كوشىرۋ جوسپارىنا سايكەس جاڭا مىندەتتەر جۇكتەلدى. بۇل تۋرالى پارلامەنت سەناتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«ەلباسى نۇرسۇلتان ءابىش ۇلى نازاربايەۆتىڭ «قازاق ءتىلى ءالىپبيىن كيريلليسادان لاتىن گرافيكاسىنا كوشىرۋ تۋرالى» جارلىعىن ىسكە اسىرۋ بويىنشا مينيسترلىك ءبىرقاتار جۇمىستار اتقارۋدا. اتاپ ايتقاندا، مەملەكەت باسشىسىنىڭ اتالعان جارلىعى نەگىزىندە قازاق ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانە ونىڭ جانىنداعى جۇمىس توپتارىنىڭ جوسپارلارى بەكىتىلدى. وسى باعىتتا ءبىرقاتار شارالار قولعا الىندى»، - دەدى مينيستر.
ارىستان مۇحامەدي ۇلىنىڭ ايتۋىنشا، جاڭا ءالىپبيدىڭ ەملە ەرەجەلەرى كەڭ تۇردە تالقىلانىپ، ونىڭ تۇجىرىمداماسى ماقۇلداندى. وسى تۇجىرىمدامانىڭ نەگىزىندە كوپشىلىك قولدانىسىنا ەنەتىن ەملە ەرەجەلەر تاياۋ ۋاقىتتا دايىن بولادى.
«بۇل باعىتتا مينيسترلىك جانىنان شايسۇلتان شاياحمەتوۆ اتىنداعى «ءتىل-قازىنا» ۇلتتىق-عىلىمي تاجىربيەلىك ورتالىعى قۇرىلدى. ورتالىقتىڭ قىزمەت اياسى كەڭەيىپ، قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭمەن كوشىرۋ جونىندەگى ءىس-شارالار جوسپارىنا سايكەس جاڭا مىندەتتەر جۇكتەلدى»، - دەپ اتاپ ءوتتى ق ر مادەنيەت جانە سپورت ءمينيسترى.
بۇل رەتتە يننوۆاسيالىق IT تەحنولوگيالاردى قولدانا وتىرىپ، بالالار مەن ەرەسەكتەرگە ارنالعان ونلاين-قوسىمشالار، ەلەكتروندىق نۇسقاداعى وقۋ كۋرستارىن ازىرلەۋ؛ لاتىن گرافيكاسىنا ماتىندىك قايتا كودتاۋشىعا ارنالعان كونۆەرتەر باعدارلاماسىن جانە IT قوسىمشاسىن ازىرلەۋ؛ قازاق ءالىپبيىن لاتىن گرافيكاسىنا اۋىستىرۋدىڭ نەگىزگى اسپەكتىلەرى تۋرالى ازاماتتاردى اقپاراتتاندىرۋ دەڭگەيىن انىقتاۋ بويىنشا الەۋمەتتانۋشىلىق زەرتتەۋلەر جۇرگىزۋ؛ قازاق ءالىپبيىن لاتىن گرافيكاسىنا كوشىرۋ بويىنشا ءتۇسىندىرۋ جۇمىستارىن جۇرگىزۋ ءۇشىن بەينە بلوكتار ازىرلەۋ ەسكەرىلگەن.
سونىمەن بىرگە، ا. مۇحامەدي ۇلى ورتالىقتىڭ عىلىمي الەۋەتى ارتىپ كەلە جاتقانىنا توقتالىپ ءوتتى. بۇگىنگى تاڭدا مۇندا عالىمدار مەن بىلىكتى ماماندار تارتىلدى. ءقازىر ۇلتتىق عىلىم اكادەمياسىنىڭ اكادەميگى، 2 عىلىم دوكتورى، 6 عىلىم كانديداتى جۇمىس جاساۋدا.
ايتا كەتەيىك، مينيسترلىك قازىرگى كەزەڭدە جاڭا الىپبيگە كوشۋ بارىسىندا اتقارىلىپ جاتقان جۇمىستاردى بايانداۋ، ءتۇسىندىرۋ، ادىستەمەلىك كومەكتەر كورسەتۋ ماقساتىندا ءتيىستى عىلىمي شارالار جۇرگىزدى. وعان ۇلتتىق كوميسسيا جانە جۇمىس توپتارى مۇشەلەرى، پارلامەنت دەپۋتاتتارى،ەلىمىزدىڭ جەتەكشى لينگۆيست عالىمدارى قاتىستى.
