مۇحامەدجان تازابەك ءوزىنىڭ فەيسبۋك پاراقشاسىندا ق ر مادەنيەت ءمينيسترى تۋرالى "مايتالمان مينيستر" دەگەن جازبا جاريالاپتى. Qamshy اقپارات اگەنتتىگى ءوز كەزەگىندە وقىرمانعا بەرەر پايداسى مول دەگەن ماقساتپەن نازارعا ۇسىنۋدى ءجون سانادى.

"بۇگىن، استانا تورىندەگى ايتۋلى شارادا، ەكى مىڭ ادامنىڭ اراسىندا، دۇبىرلەتىپ دومبىرا تارتىپ وتىرعان مايتالمان ءمينيستردى كورىپ، كوڭىلىم ءسۇيسىندى.

يا، قازاقي قاسيەتتەرىمىز قايتا ورالدى. قانشا عاسىر تولارساقتان ساز كەشىپ ءجۇرىپ اڭساعان كۇنگە جەتتىك. بابالارىمىز تۇلپارىنىڭ تۇياعىمەن دۇبىرلەتكەن دۇنيە ءجۇزىن "ۇلتتىق دومبىرا كۇنى" دومبىرانىڭ ۇنىمەن كۇمبىرلەتتىك. جىل سايىن "التىن تۇلپار" الامان بايگەسىن، "قازاقستان بارىسى" كۇرەس دوداسىن كورمەسەك، كوڭىلىمىز كونشىمەيتىن دارەجەگە جەتتىك. ودان قالسا، ۇلتتىق سالت سانامىز بەن ءداستۇر-عۇرپىمىزدىڭ كونە كەرۋەنى دالامىزعا استاناداعى ايرىقشا ەتنو-اۋىل بوپ ورالدى. كەلۋشىلەر ساداق اتىپ، ۇلتتىق بۇيىم الىپ، ۇلتتىق سپورتتى تاماشالاپ، ۇلتتىق قولونەرمەن اينالىسىپ، ناعىز قازاق ەكەندىگىن شىنايى سەزىنە الاتىن ەتنو-اۋىل قالالىق قازاقتاردىڭ دەمالىس مادەنيەتىنە توڭكەرىس اكەلگەن ويىن-ساۋىق بولدى. كۇننەن كۇنگە ايتىستاي ءتول ونەرىمىزدىڭ ءقادىرى مەملەكەتتىك دەڭگەيدە كوتەرىلىپ، تاربيەلىك ءمانى زور جىر-تەرمەلەرىمىزدىڭ ناسيحاتى كۇشەيىپ، ءداستۇرلى ونەرىمىز قانات جايىپ كەلەدى. قازاقتىڭ مادەنيەت مايتالماندارى تەك مەملەكەت اياسىندا عانا ەمەس، جاھاندىق دەڭگەيدە دە ونەرىن كورسەتىپ، قازاق بالاسىن كۇللى الەمگە تانىتىپ جاتىر. ايتا بەرسەك، اتقارىلعان ىستەر ءتىزىمى تاۋسىلار ەمەس. مىنە، ناعىز رۋحاني جاڭعىرۋ! الايدا، اسقار تاۋدىڭ جەر بەتىندەگى كوزگە تۇسەتىن بيىكتىگىنەن جەر استىنداعى كوپشىلىك كورمەيتىن تەرەڭدىگى ۇلكەن بولاتىنى سياقتى، ۇلان-اسىر شارالاردىڭ ار جاعىندا تۇرعان اسىل ازاماتتار كوپ جاعدايدا كولەڭكەدە قاپ جاتادى. جوعارىدا اتاپ وتكەن، تىكەلەي ەلباسىمىزدىڭ تاپسىرماسىنان باستاۋ العان يگى شارالاردىڭ تولىق اتقارىلۋىن ءوز موينىنا الىپ، كۇندىز-تۇنى تىنىمسىز ەڭبەك ەتىپ جاتقان مادەنيەت ءمينيسترى ارىستانبەك مۇحامەديۇلىنا پايىمدى جۇرتتىڭ العىستان باسقا ايتارى جوق. ارىستان اعامىزدىڭ، وسىناۋ مادەنيەت ءىسىنىڭ سوقتىقپالى جولىندا قاڭقۋ سوزگە دە، كەلەڭسىز قارسىلىقتارعا دا توتەپ بەرىپ، ساياسي سىناقتارعا سىنباي، ۇلت مۇددەسى ءۇشىن توككەن تەرى پارىقسىز پەندەنىڭ عانا كوزىنە كورىنبەس. ەلگە دە رۋx بەرگەن، ەلباسىنىڭ دا العىسىن العان قىرۋار ەڭبەك ءوزىنىڭ تاريحي باعاسىن بيىك دارەجەدە الىپ جاتىر دەپ ويلايمىن. ەل ءۇشىن تۋعان ەرلەر مەن ەر تۋدىرعان ەل امان بولسىن! قازاقتىڭ تاۋەلسىزدىگى تۇعىرلى، تىنىشتىعى تۇراقتى، بەيبىتشىلىگى بەرەكەلى بولسىن!"