اليمۇحاممەد قۇتتۇمۇرات ۇلى وبلىس ورتالىعىنىڭ بىرنەشە ىقشام اۋدانىن تەكسەرىپ، قاراماعىنداعىلارعا قوزعالىس كوپ جول قيىلىستارىن رەتكە كەلتىرۋ، قالا ورتالىعىنداعى قوقىس جانە قۇرىلىس قالدىقتارى پروبلەماسى، سونداي-اق تۇرعىن ۇيلەردىڭ قاسبەتتەرىندەگى اقاۋلاردى جويۋ مەن جول جيەگىندەگى يەسىز جەر ۋچاسكەلەرىن كورىكتەندىرۋ ماسەلەلەرى بويىنشا ءبىرقاتار ناقتى تاپسىرمالار بەردى.
قالانى ارالاپ شىعۋ بارىسىندا قالا اكىمى قالاداعى اۆتوموبيل جولدارىندا كولىكتىڭ وتە كوپتىگىن اتاپ كورسەتىپ، قاراماعىنداعىلارعا قالانىڭ قوزعالىس كوپ جول قيىلىستارىنداعى قولدانىستاعى وڭ بۇرىلىستاردى كەڭەيتۋ جانە جاڭالارىن سالۋ جوباسىن ازىرلەۋدى تاپسىردى.
ءبىرىنشى كەزەكتە بايمۇحانوۆ – بەرعالييەۆ، بەيبارىس – اماندوسوۆ، بەيبارىس – قۇرمانعازى، تايمانوۆ – بەگەلدينوۆ، ۆلاديميرسكيي – عۇماروۆ كوشەلەرىنىڭ قيىلىستارى بەلگىلەندى.
اتالعان كوشە قيىلىستارىنىڭ ءبىرقاتارىندا بۇرىلىستاردىڭ بار ەكەنىن، الايدا ولاردىڭ ەنسىز بولۋىنان اۆتوكولىك يەلەرىنىڭ جولداردا مانيەۆر جاساۋى پروبلەما تۋعىزاتىنىن ايتا كەتكەن ءجون.
- وبلىس اكىمى وبلىس ورتالىعىنداعى جولداردا قاربالاس ساتتەردە اۆتوكولىك كەپتەلىستەرىن بارىنشا رەتكە كەلتىرۋدى تاپسىردى. ءبىرىنشى كەزەكتەگى مىندەت - قوزعالىس كوپ، ۇلكەن جول قيىلىستارىنداعى قوزعالىستى جەڭىلدەتۋ، اعىمداعى جىلدىڭ سوڭىنا دەيىن ءبىز وسى پروبلەمانى شەشۋگە ءتيىسپىز، - دەدى قاراماعىنداعىلارعا اليمۇحاممەد قۇتتۇمۇرات ۇلى.
سونىمەن قاتار قالا ورتالىعىندا قۇرىلىس قوقىستارىنىڭ جاتۋى مەن جەكە ۋچاسكەلەردىڭ قورشاۋلارىنىڭ، تۇرعىن ۇيلەردىڭ قاسبەتتەرىنىڭ جانە جاۋىندى كۇندەرى ادام وتە المايتىن بالشىققا اينالاتىن جول جيەكتەرىندەگى يەسىز جەر ۋچاسكەلەرىنىڭ كوزگە قوراش جاي-كۇيى قالا باسشىسىنىڭ رەنىشىن تۋدىردى.
- ءبىز قالا تۇرعىندارىن تازالىق ساقتاۋ مادەنيەتىنە ادەتتەندىرۋىمىز قاجەت. ءبىرىنشى كەزەكتە – قالانى تازالايتىن كوممۋنالدىق قىزمەتتەردىڭ جۇمىسىن كۇشەيتۋ كەرەك، سوڭعى ۋاقىتتا تۇرعىندار ءبىزدىڭ اتىمىزعا كوپتەگەن رەنىشتەر ءبىلدىرىپ جاتادى. ەكىنشىدەن – كاسىپكەرلەردى وزدەرىنىڭ ىرگەلەس اۋماقتارىن كورىكتەندىرۋگە، ۋچاسكەلەرىندەگى ەسكى، قيسايعان قورشاۋلاردى، قۇرىلىس قوقىستارىن، ارام شوپتەردى جويۋعا داعدىلاندىرۋ قاجەت. ۇشىنشىدەن – تۇرعىن ۇيلەردىڭ قاسبەتتەرىن جاقسارتۋ جانە جول جيەگىندەگى جەرلەردى، قالانى ءساندى، ەستەتيكالىق تۇرگە كەلتىرۋ قاجەت. وسىنىڭ بارلىعىن ءبىز اعىمداعى جىلدىڭ سوڭىنا دەيىن شەشۋىمىز قاجەت، - دەپ تاپسىرما بەردى اليمۇۋحاممەد قۇتتۇمۇرات ۇلى.
سونىمەن بىرگە قالا اكىمى گەولوگ اۋىلدىق وكرۋگىندە بولىپ، اپاتتى جاعدايداعى جاتاقحانانىڭ جاي-كۇيىمەن تانىسىپ، تۇرعىندارمەن اڭگىمەلەستى.
