باعزى زاماننان بەرى كەلە جاتقان ميستيكالىق سەنىمدەردىڭ ءبىرى – سىنىق ايناعا قاراماۋ. بۇل سوناۋ كونە ريم سەنىم-نانىمىنان باستاۋ الادى. سىنعان ايناعا قاراعان ادامنىڭ جەتى جىل بويى جولى بولمايدى-مىس. سول سەبەپتى، ۇيدە سىنىق اينا ۇستاماۋ كەرەك دەپ سەندى. الدا-جالدا اينا سىنىپ قالعان بولسا، وعان تىكەلەي ەمەس، تۇسپالداپ كەلىپ، سىنىقتارىن قالتاشاعا سالىپ، سول كۇيىنشە تاستاۋ كەرەك ەكەن. ونداعى ماقسات – سىنىق اينادا الدەبىرەۋدىڭ بەينەسىنىڭ كورىنبەۋىن قامتاماسىز ەتۋ.

مۇنداي ىرىم شاريعاتتا نەگىزسىز بولىپ تابىلادى. ءار نارسەنى جامان ىرىمعا بالاپ، سوعان سەنىپ، ءجۇرىس-تۇرىسىن سوعان نەگىزدەۋ ءدىن تالىمىنە تەرىس. «جاقسى ءسوز – جارىم ىرىس» دەمەكشى، پايعامبارىمىز (س.ا.ۋ.) پەسسيميستىك كوڭىل-كۇي جانە پەسسيميستىك تۇسىنىك قالىپتاستىرار ىرىمداردان تىيىپ وتىرعان. ءار نارسە اللانىڭ قالاۋىنا بايلانىستى دەپ ۇيرەتتى. ونىڭ ورنىنا ومىرگە دەگەن قۇشتارلىقتى وياتار، ادامنىڭ ءۇمىتىن ارتتىراتىن سوزدەر، جاقسى جورامالدار ايتۋىمىزدى بۇيىردى.

مىسالى، «ساحيح بۋحاري» اتتى حاديستەر جيناعىندا كەلتىرىلگەن ءبىر حاديستە ارداقتى پايعامبارىمىز: «يسلامدا جامان ىرىمعا بالاۋ جوق(طِيَرَةٌ)، ەڭ جاقسىسى - "ءفا’ل" دەدى.(سوندا قاسىنداعىلار): «ءفا’ل دەگەن نە؟»، - دەپ سۇرادى. پايعامبارىمىز: «ول - اربىرەۋلەرىڭنىڭ ەستىگىلەرىڭ كەلگەن جاقسى ءسوز»، - دەدى[1].    

قورىتىندى:

سىنىق اينانىڭ ۇيدە تۇرۋىنىڭ شاريعات تۇرعىسىنان ەشبىر زيانى جوق. وعان بايلانىستى ايتىلعان ميستيكالىق ىرىمداردى - ادام فانتازياسىنان تۋىنداعان دۇنيە رەتىندە قاراعان دۇرىس. ەجەلدە اينالار وتە ءالسىز، اسا سىنعىش ءارى تىم قىمبات بولعان. سوندىقتان، تۇتىنۋشى حالىق اينانى ۇقىپتى ۇستاسىن دەگەن ويمەن ادەيى الگىندەي ىرىم ويلاپ شىعارىلعان بولۋى مۇمكىن. ايتسە دە، ۇيدە سىنىق اينا ءىلىنىپ تۇرسا، ونى باسقاسىنا اۋىستىرۋ مادەنيەتتىلىك جاعىنان دا، قولدانىسقا يكەمدى بولۋ جاعىنان دا ابزال.

يسلام.kz