دەپۋتات قايرات قۇدايبەرگەن Facebook پاراقشاسىندا «اقكەنت» تۇرعىن ءۇي كەشەنى جانىندا اعاشتىڭ تۇبىنەن تابىلعان 5 جاستاعى دىنمۇحاممەدتىڭ جاعدايى تۋرالى جازدى.

«بۇگىن تاڭعى 9-دا «بالالارعا ارنالعان شۇعىل مەديسينالىق كومەك بەرۋ ورتالىعىنا»  5 جاستاعى دىنمۇحاممەدتىڭ جاعدايىن ءبىلۋ ءۇشىن باردىم. اتا-اناسىمەن كەزدەستىم. اۋرۋحانانىڭ باس دارىگەرى قۇسايىنوۆ اباي زاكىر ۇلى بالانىڭ دەنساۋلىعى تۋرالى ايتىپ بەردى. بالانىڭ ساۋىعىپ كەتۋى 50-دە 50. كەشە ول ءۇشىنشى دەڭگەيلى كومادا بولدى، بۇگىن ەكىنشى دەڭگەيىندە. 3، 5 جانە 7 كۇندەر وتە اۋىر جانە ءقاۋىپتى. قاتتى سوققىدان  بالانىڭ ءبىر جاق باس سۇيەگى ىشكە قاراي كىرىپ كەتكەن. دارىگەرلەر سوققىدان كەيىنگى قاندى ىسىك پەن باس سۇيەكتىڭ سىنىقتارىن الىپ تاستادى. سوققىدان دىنمۇحاممەدتىڭ ميى ىسە باستادى. ەڭ ۇلكەن ءقاۋىپ تە وسى.  دارىگەرلەر قولدان كەلگەنشە تىرىسىپ جاتىر، ءبىراق جاعداي اۋىر.

ءبىز سەن ءۇشىن دۇعا ەتەمىز، بالاقاي. قىلمىسكەر جاقىن ۋاقىتتا ۇستالادى دەپ ۇمىتتەنەمىن! مەديكتەر مەن قۇقىققورعاۋ ورگاندارىنا العىس بىلدىرەمىن» دەپ جازدى دەپۋتات.

ەستەرىڭىزگە سالا كەتەيىك، ادامدار اعاشتىڭ تۇبىنەن توسەنىشكە ورانعان 5 جاستاعى بالانى بايقاعان. دىنمۇحاممەدتى كولىك قاعىپ كەتكەن. كولىك جۇرگىزۋشىسى بالانى قاعىپ كەتكەننەن كەيىن اعاشتىڭ تۇبىنە توسەنىشكە وراپ قالدىرىپ كەتكەن. ءقازىر تەكسەرۋ جۇمىستارى جۇرگىزىلىپ جاتىر.

بۇعان دەيىن دەپۋتات پوليسيا قىلمىسكەردىڭ كىم ەكەنى انىقتاعانىن جازعان.