«اقكەنت» تۇرعىن ءۇي كەشەنى جانىندا اعاشتىڭ تۇبىنەن اۋىر حالدە تابىلعان 4 جاستاعى مۇحاممەد اسكاروعلى ەسىمدى بالانى ءوز اكەسى باسىنان تاسپەن ۇرىپ، اعاشتىڭ تۇبىنە تاستاپ كەتكەن، دەپ حابارلايدى Qamshy.kz اقپارات اگەنتتىگى الماتى قالالىق ءىىد باسپا ءسوز قىزمەتىنە سىلتەمە جاساپ.

قىلمىستىق ءىستى تەكسەرگەن پوليسەيلەر 4 جاستاعى بالانى كولىك قاعىپ كەتپەگەنىن انىقتادى.

«جول اپاتىنىڭ كۋاگەرىمىن دەگەن قىز مۇحاممەدتى كولىك قاعىپ كەتكەنىن كورگەنىن ايتقان. كەيىن بۇل اقپارات جالعان ەكەنى انىقتالدى. «كۋاگەردىڭ» ايتقاندارى تەرگەۋ جۇمىستارىنىڭ ناتيجەسىمەن قابىسپاعان. بەينە باقىلاۋدان ەشقانداي جول اپاتى بولماعانى انىقتالدى. بالانىڭ جاراقاتى دا جول اپاتىنىڭ سالدارىنان ەمەس ەكەنى بەلگىلى بولدى.

تەرگەۋ توبى باسقا دا نۇسقالاردى قاراستىردى. بەينە باقىلاۋدى تەكسەرۋ بارىسىندا مۇحاممەدتىڭ اكەسى بالاسىن قولىمەن جەتەكتەپ كەلە جاتقانى انىق كورىندى. بىرنەشە مينۋتتان كەيىن بالانى ادام جوق جەرگە كىرگىزىپ، وعان قاتتى اشۋلانىپ باسىنان تاسپەن ۇرعان. وقيعا ورنى ءجىتى تەكسەرىلىپ بالانى ۇرعان تاس تابىلدى»، - دەيدى الماتى قالالىق ءىىد وكىلى سالتانات ازىربەك.

مۇرات اسقاروعلى ءوز كىناسىن مويىندادى.

«تاڭ اتپاستان ءىشىپ العان ەدىم. ول قاتتى مازاسىزداندى. مەن تاستى الدىم دا باسىنان ۇردىم. بارلىق قازاقستاندىقتاردان، پوليسيادان كەشىرىم سۇرايمىن. مەن جازانى وتەۋگە ءازىرمىن»، - دەيدى بالانى اكەسى.

الماتى قالالىق ءىىد مالىمەتىنشە، جالعان كۋاگەرلىك بەرگەن قىز دا جاۋاپكەرشىلىككە تارتىلادى.  جالعان كۋاگەرلىك ەتكەندەرگە قىلمىستىق جاۋاپكەرشىلىك قاراستىرىلعان.