وسىعان دەيىن الماتى وبلىسى سارقان اۋدانىنىڭ اكىمدىگىنىڭ سالدارىنان «سىروۆياتسكيي» شارۋا قوجالىعى جەر اۋماعىنان ايرىلىپ قالا جازداعان. بەلگىلى بولعانداي شارۋا قوجالىعى باسشىسىنىڭ ولىمىنەن كەيىن اۋداندىق جەر قاتىناستارى ءبولىمى ۋچاسكەنى يەسىز جەر دەپ تانىپ، ءۇشىنشى تۇلعاعا ۋاقىتشا جالعا بەرۋ تۋرالى قاۋلى شىعارعان، دەپ حابارلايدى Qamshy.kz اقپارات اگەنتتىگى. 

اتالمىش ماسەلە وبلىستىق كاسىپكەرلەر پالاتاسىنىڭ كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسىنىڭ كەزەكتى وتىرىسىندا قارالىپ، وندا كاسىپكەردىڭ جەسىر ايەلى نادەجدا سىروۆياتسكايا جەرگىلىكتى اتقارۋشى ورگاننىڭ ارەكەتىنە شاعىمدانعان.

كاسىپكەرلەر پالاتاسىندا مەملەكەتتىك ورگان ءىستىڭ ءمان-جايىن انىقتاماي، جەردى ۋاقىتشا پايدالانۋ قۇقىعىن ءۇشىنشى تۇلعالارعا بەرۋ تۋرالى اسىعىس شەشىم قابىلداعانىن اتاپ ءوتتى. سونىمەن بىرگە، ازاماتتىق كودەكس بويىنشا مۇرا مۇراگەرلىك اشىلعان ۋاقىتتان باستاپ التى اي مەرزىمىندە تاپسىرىلۋى ءتيىس.

«ماسەلە قارالعان سوڭ، كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل كەڭەسى  سارقان اۋدانىنىڭ جەر قاتىناستارى ءبولىمىنىڭ شەشىمى بويىنشا زاڭدىلىق پەن نەگىزدىلىكتى انىقتاۋ ءۇشىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنە ماتەريالداردى جولدادى»، - دەدى كاسىپكەرلەر پالاتاسىنىڭ ساراپشىسى دۋمان كەرىمبايەۆ.

دەپارتامەنت جەر ۋچاسكەسى بويىنشا ماتەريالدى قاراستىرۋ بارىسىندا سارقان قالاسىنىڭ اكىمى اپپاراتىنىڭ باس مامانى شارۋا قوجالىعىنىڭ باسشىسىنىڭ قايتىس بولعانى تۋرالى انىق ەمەس مالىمەت بەرگەنىن انىقتادى. بۇل ءوز كەزەگىندە نەگىزسىز شەشىمنىڭ شىعارىلۋىنا سەبەپ بولعان.

«جىبەرىلگەن بۇزۋشىلىقتار ءۇشىن سارقان اۋدانىنىڭ اكىمى اپپاراتىنىڭ باس مامانى «سوگىس» تۇرىندەگى تارتىپتىك جازاعا تارتىلدى. جەر ۋچاسكەسىن جشس-عا ۋاقىتشا جەر پايدالانۋعا بەرۋ تۋرالى قاۋلى الىنىپ تاستالىندى. جەر ۋچاسكەسى زاڭدى مۇراگەرلەرگە قايتارىلدى»، - دەلىنگەن الماتى وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى سەرىكباي نۇرعيسايەۆتىڭ رەسمي جاۋابىندا.