ەگەر دە مەن ءبىلىم ءمينيسترى بولسام، وندا:

 مەملەكەتتىڭ ءبىلىم سالاسىن ەڭ جوعارعى دەڭگەيگە جەتكىزۋ ءۇشىن ۇستازدار قوعامنىڭ بەدەلدى تۇلعاسى بولۋى جولىندا ەڭبەك ەتەر ەدىم. (ۇستازداردىڭ جەلىلىك ماركەتينگتە ىستەپ، كوسمەتيكا، كيىم-كەشەك ساۋدالاۋىن توقتاتامىن)؛

دامىعان مەملەكەتتەردىڭ جالپى ورتا، نەگىزگى ءبىلىم بەرۋ ورىندارىنا ۇستازداردى تاجىريبە الماسۋعا ءجيى جىبەرىپ، ەلەكتروندى نۇسقاداعى جۋرنال-كۇندەلىك، «بىلىملەند» سەكىلدى جۇيەلەر مەن ديستانسيوندى جەكەلەگەن كونكۋرستاردىڭ پەداگوگتارعا ءتيىمدى-تيىمسىز تۇستارىن انىقتاي وتىرىپ، پەداگوگيكالىق كەڭەس قۇرۋ ارقىلى كەز-كەلگەن شەشىمدى ورتاقتاسا قابىلداعان بولار ەدىم؛

مەكتەپتەردى اتتەستاتتاۋ، ءتۇرلى سالالاردان كەلەتىن تەكسەرۋلەردى پاراسىز وتكىزۋدى تالاپ ەتەر ەدىم؛

جاڭا تەحنولوگيا، رەسۋرستار، مۋلتيمەديالىق كابينەتتەر، تاجىريبەلىك-لابوراتوريالىق جابدىقتال­عان وقۋ كابينەتتەرىن جاراقتاندىرۋعا ءبىرىنشى كەزەكتە قارجى ءبولىپ، ونىڭ تالان-تاراجعا تۇسپەۋىن، ايقىن ماقساتتارعا جۇمسالۋىن قاداعالاپ وتىرار ەدىم؛

اسكەري قىزمەتكەرلەر سەكىلدى مۇعالىمدەردىڭ بارلىعىن دەرلىك ءبىرىڭعاي فورما كيۋىن جانە ۇستاز­عا ءتان بەلگىلى ءبىر شەندەر (كادەت كورپۋستارى سەكىلدى) بەرۋدى قولعا الار ەدىم. (ءقازىر قاي ءمۇعالىمنىڭ قانداي لاۋازىمدا ەكەنىن ايىرۋدان قالدىق)؛

زەينەتكە 50 جاستان شىعارىپ، ولارعا شەتەلگە جولداما بەرۋدى كاسىپوداقتارعا مىندەتتەر ەدىم. ياعني زەينەتكەر مۇعالىمدەردى اۆتوماتتى تۇردە ترەنەرلىك كۋرستاردى جۇرگىزۋگە، جاس مامانداردى ۇيرەتۋگە جىبەرگىم كەلەدى. (ارينە، ءوز قالاۋىمەن. بىردەن زەينەتكە كەتكەن ۇستازدىڭ ديپرەسسياعا شالدىعىپ، بەينەتىنىڭ زەينەتىن كورە الماي كەتىپ جاتقاندىعىن بايقاپ ءجۇرمىن. بۇل – ۇلكەن قيانات)؛

قاعازباستىلىقتان قۇتىلۋدىڭ جولىن قاراستىرىپ، ءبىر سىنىپقا ەكى سىنىپ جەتەكشىسىن ءبىرى تاربيەگە، ەكىنشىسى بىلىمگە جاۋاپ بەرەتىندەي ەتىپ تاعايىنداعان بولار ەدىم؛

كەڭەستىك زامانداعىداي بالالاردى ەڭبەكپەن تاربيەلەۋدى قايتا جانداندىرار ەدىم. ويتكەنى ءقازىر بالالار ەڭبەككە ەرتە ارالاسپاعاندىقتان ءالجۋاز، ىسكە ەبى جوق كۇيدە قالىپتاسىپ جاتىر.

جاس مامانداردىڭ ءبارىنىڭ پايىزى تومەندەتىلگەن، ءبولىپ تولەۋگە مۇمكىندىك بەرىلەتىن پاتەرمەن قامتىلۋىن قولعا الار ەدىم. ولاردىڭ الاڭسىز جۇمىس جاساۋى ءۇشىن بالاباقشالار سالدىرىپ، نەسيە الۋىنا توسقاۋىل جاسار ەدىم. (وكىنىشكە قاراي، بۇگىنگى تاڭدا نەسيە ءمۇعالىمنىڭ وتباسىن قۇرۋىنا، ۇستازدىق بەدەلىنە، جۇمىس بارىسىنا ءوز كەسىرىن تيگىزۋدە)؛

مەكتەپ ديرەكتورلارىنىڭ جاس مامانداردى جۇمىسقا الۋ ءۇشىن پارا تالاپ ەتۋىن توقتاتىپ، لاۋازىمدىق مىندەتتەرىنەن وزگە دە جۇمىستارعا مويىن بۇرعىزباستاي ەتىپ، ياعني ۇستازدار جەرگىلىكتى باسقارۋ ورگاندارىنا ەمەس، تەك ءبىلىم مينيسترلىگى مەن ءبىلىم بولىمدەرىنە عانا باعىنۋىن قاداعالايتىن ەدىم؛

ءار مەكتەپتەگى سانى بار، ساپاسى جوق ورىنباسارلاردى ازايتىپ، تەك ادىستەمەلىك كومەك بەرەتىن باسشى مەن ادىستەمەلىك كابينەت مەڭگەرۋشىسىن عانا قالدىرار ەدىم؛

مەكتەپتەردىڭ بارلىعىن دەرلىك ءبىر اۋىسىمعا اۋىستىرىپ، ەكىنشى اۋىسىمدا ۇستازداردى تاجىريبە الماسۋ، دايىندالۋ، سپورتتىق ويىندار، باسسەين، ديسكوتەكا، كلاسسيكالىق بي، حيپ-حوپ سياقتى فيزيكالىق دايىندىقتارىن شىڭداي تۇسەتىن سپورت تۇرلەرىنە باعىتتايتىن ەدىم؛

وقۋشىلاردىڭ بىركەلكى مەكتەپ كيىمىن ۇلتتىق ناقىشتا تىكتىرتەر ەدىم؛

اتا-انانىڭ مۇعالىمدەرگە بەيبەرەكەت تالاپ قويۋىن توقتاتىپ، بالاسىنىڭ ۇستازدار بەدەلىن اياق استى ەتۋىن توقتاتۋ ارقىلى تاربيەنىڭ نەگىزگى بولىگىن اتا-انانىڭ وزىنە جۇكتەر ەدىم؛ 

ەڭ نەگىزگى ۇستانىمىم: ساباقتىڭ ەڭ باستى قۇرامىنىڭ ۇلتتىق-رۋحاني پەداگوگيكامەن ۇشتاسۋىن قالىپتاستىرا وتىرىپ قۇرىلۋىنىڭ نەگىزگە الىنۋىن مىندەتتەيتىن ەدىم. ۇلتتىق ويىن، يماندىلىق، تاريح، ونەر، باسقا تىلدەر مەن زاماناۋي تەحنيكادان بۇرىن، ىلگەرى وقىتىلۋىنا ءمان بەرىپ، ءوز انا ءتىلىن جەتە مەڭگەرگەننەن كەيىن عانا وزگە تىلگە بەت بۇرۋدى تالاپ ەتەر ەدىم؛ 

الەۋمەتتىك جاعدايدى ايتپاي كەتۋگە بولماس. ساعات سانىن 15-16 ساعات جاساي وتىرىپ، ستاۆكالىق ايلىق جالاقىنى ءمۇعالىمنىڭ ەڭبەگى مەن وتىلىنە قاراي جىل سايىن ارتىپ وتىرۋىن قاداعالار ەدىم.

سوڭعى جىلى اكتۋالدى باس اۋرۋى بولعان اتتەس­تاسيانى مۇمكىندىگىنشە توقتاتىپ، ۇستازدىڭ بەدەلىن تۇسىرەتىن بىردەن-بىر وسى ماسەلەنى تۇبىرىمەن جويار ەدىم.

قازىرگى تاڭدا «قارىن اشىرىپ» جۇرگەن ءبىرقاتار ماسەلەلەردى مەن وسىلاي شەشەر ەدىم. ال ءسىز مينيستر بولساڭىز قانداي ارەكەتتەردى قولعا الار ەدىڭىز؟ 

اۆتورى:بوتاگوز الىمبايەۆا

دەرەككوز: zamana.kz