استانادا ەلدى ەلەڭ ەتكىزگەن ءتورت جاس انانىڭ ولىمىنە قاتىستى ساراپتاماعا  شەتەلدىك ماماندار ارالاسۋدا. يزرايلدەن ارنايى ەلورداعا كەلگەن دارىگەرلەر قالاداعى جاعدايمەن ءجىتى تانىسىپتى. ازىرگە بۇل وقيعانىڭ ناقتى قورتىندىسى تەك 20-تامىز كۇنى بەلگىلى بولماق. ال اناسىنان قاپيادا ايىرىلىپ قالعان ءتورت ءسابيدىڭ جاعدايى قالاي؟ دارىگەرلەر ءالى ەسىن جيماعان نارەستەگە قاتىستى قانداي بولجام جاساپ وتىر؟ بۇل تۋرالى ەۋرازيا ءبىرىنشى ارناسى حابارلايدى.

سۇيگەن جارىنان كوز جازىپ قالعان ساپار ءامىرتاي ەكى ايدان بەرى №1 پەريناتالدىق ورتالىقتا جاتقان پەرزەنتىنىڭ دەنساۋلىعىنا الاڭداۋلى. سەبەبى، نارەستە 50 كۇننەن بەرى ەسىن جيماپتى. ازىرگە دارىگەرلەر بالانى ءۇش ساعات سايىن تاماقتاندىرىپ، جورگەگىن اۋىستىرۋعا رۇقسات بەرگەن. ءبىراق، قىز بالانىڭ ساۋىعىپ كەتۋىنە قاتىستى ەشقانداي بولجام جاساي الماي وتىر،- دەيدى. 

«ءقازىر وعان ەشقانداي دارىلەر ەشتەڭە ەگىپ جاتقان جوق. ويتكەنى وسى پەريناتالدى بولنيسانىڭ گلاۆ ۆراچتارى دا، ەشقايسىسى دا وزگەرىس بولادى دەپ، قاشان ويانادى، نە ىستەيتىندەرىن ولار ءالى بىردە-بىر ءسوز ايتقان جوق. قاسىمىزعا ەشقايسىسى كەلگەن جوق. مىسالى داجە يزرايلدەن كەلگەن ماماندار ءبىرىنشى ءتىرى ادامدى ويلاۋ كەرەك قوي، بالانى ويلاماي، كوز جۇمعان انالاردى عانا ويلاپ، سونىمەن عانا كەلىسىپ، مۇندا كەلىپ ءجۇر» - دەيدى مارقۇم بولعان كەلىنشەكتىڭ كۇيەۋى ساپار ءامىرتاي.

ال قوعامدىق دەنساۋلىق ساقتاۋ باسقارماسى  ءبىرىنشى بالانىڭ نيەۆرولوگيالىق پاتالوگيامەن ءالى پەريناتالادىق ورتالىقتا جاتقانىن راستايدى. ونىمەن قوسا، اناسىنان كوز جازىپ قالعان تاعى ءبىر ءبۇلدىرشىننىڭ جاعدايدى اۋىر ەكەن. ازىرگە ولاردىڭ قاشان ۇيلەرىنە شىعارىلاتىنى بەلگىسىز. 

«جالپى سابيلەردىڭ جاعدايىنا كەلەتىن بولساق، ءبىرىنشى  كوز جۇمعان جاس انانىڭ نارەسەتەسى نيەۆرولوگيالىق پاتولوگيامەن ءالى  پەريناتالدىق ورتالىقتا جاتىر. ونىڭ ءحالى  ورتاشا اۋىر. ەكىنشى جانە ءتورتىنشى ءسابي ۇيىنە شىعارىلعان. ال ءۇشىنشى بالا ءالى №1 پەريناتالدىق ورتالىقتا. ونىڭ ءحالى ورتاشا، تۇراقتى دەسەك بولادى. ەكى ءسابي دە دارىگەرلەردىڭ ءجىتى باقىلاۋىندا» - دەيدى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا. 

ەلوردادا بوسانۋ كەزىندە كوز جۇمعان ءتورت ايەلدىڭ ءولىمىن يزرايلدەن كەلگەن ماماندارى دا زەرتتەپ كورگەن. ولاردىڭ بولجامىنشا جاڭا بوسانعان كەلىنشەكتىڭ تورتەۋىن دە امان الىپ قالۋ مۇمكىن ەمەس ەكەن. سەبەبى، جاس انالاردىڭ ءبارى پوتالوگيامەن تۇسكەن. 

«وكىنىشكە قاراي ونى الدىن الۋ مۇمكىن بولمادى. ءتىپتى، ءبىزدىڭ ەلدە تۋرا وسىنداي جاعدايعا تاپ بولۋشى ەدىك. سوندىقتان دا الداعى ۋاقىتتا مۇنداي جاعداي قايتالاباس ءۇشىن الدىن الۋ شاراسىن قولعا العان ءجون» - دەيدى شەتەلدىك ساراپشى ناتاليا مەلەح-حەدۆات (يزرايل).

ايتا كەتەيىك، جىل باسىنان بەرى ەلىمىزدە 31 ءسابي دۇنيە ەسىگىن اشا سالا، انادان جەتىم اتانعان. سوڭعى جاعداي كۇنى بۇگىن عانا اقمولا وبلىسىندا تىركەلدى. مۇندا 25 جاستاعى جۇكتى كەلىنشەك دارىگەرلەردىڭ سالعىرتتىعىنان كوز جۇمدى. بۇگىندە اتالمىش وقيعاعا بايلانىستى سوت  مەديسينالىق تەكسەرۋ جۇمىستارى جۇرگىزىلۋدە.

"دارىگەرلەردىڭ قولىنان سول بالا ءولىپ وتىر.  سەبەبى قان كەتىپ، ءبىر كەشتە ەكى ناركوز بەردى. ىلعي جاس مەديكتەر وتىرادى. كومپيۋتەردەن بەت المايدى. ەشقاشان ەشكىمدى قولىنا الىپ ەمدەمەيدى. ءوزىمىز ءۇش كۇننەن بەرى ءوزىمىز بىلمەي وتىرمىز ساپ-ساۋ ءجۇرىپ قالاي ورتامىزدان كەتىپ قالعانى» - دەيدى مارقۇمنىڭ اناسى ايشا بەيسەنبايەۆا.

«الەم بويىنشا جۇكتىلىك پەن بوسانۋ كەزىندەگى ءتۇرلى كەلەڭسىز جاعدايلاردىڭ الدىن الماعان ءۇشىن كۇن سايىن 830  ايەل  كوز جۇمادى ەكەن. مامانداردىڭ ايتۋىنشا، انالار ءولىمىنىڭ 75 پايىزى جوعارعى قان قىسىمى، بوسانۋ كەزىندەگى قان كەتۋ مەن ءتۇرلى جۇقپالى ينفەكسيالاردىڭ اسەرىنەن بولادى. سوندىقتاندا كەز كەلگەن ايەل جۇكتىلىگىنە اسا مۇقيات بولعان ابزال، دەيدى ولار».