ءبىز تولەمىن اي سايىن ۋاقتىلى تولەپ ەلەكتر جارىعىن تۇتىنىپ وتىرعان قاراپايىم تۇتىنۋشىلاردىڭ ءبىرىمىز. اركىم ءوز ءىسىنىڭ مامانى، الايدا ۇيگە ساۋلە بەرىپ جاتقان جارىق قوندىرعىلارىنىڭ قىزمەتىن بىلە بەرمەيتىنىمىزدى مويىندايمىز. سوندىقتان دا جارىق ءسونىپ قالسا، سابىرمەن قاراڭعىدا وتىرا بەرەتىن قازاقپىز. 3 كۇن جارىق بولماسا دا، كەلگەن تولەماقىنى 30 كۇنگە تۇگەندەپ تولەي بەرەمىز. سەبەبى، جارىق جەتكىزۋگە مىندەتتى مەكەمەگە بارىپ، ءادىلىن ايتىپ، اقىڭدى اجىراتىپ الۋ مۇمكىن ەمەس.
مىنە، كۇنى كەشە ۇيدەگى ەلەكتر اقاۋلارىنىڭ بىرىنەن كاكىر شىعىپ، 3 كۇن بويى ۇيدە جارىق بولماي قالدى. ءوز بەتىمىزشە جوندەي المايمىز. ءومىر قىمبات! سوسىن تاۋەكەلگە بەل بۋىپ، ماڭدايشاسىنا «وڭتۇستىك قازاقستان وبلىسى (؟) «وڭتۇستىك جارىق ترانزيت» ج ش س تۇركىستان ەلەكتر جۇيەلەرى» دەپ جازىلعان مەكەمە ەسىگىن قاقتىق. شارۋامىزدى ايتا باستاعاننان-اق ءسوزىمىزدى سەلقوس تىڭداعان مامانداردىڭ ءبىرى: «سىزگە ءبىز كومەكتەسە المايمىز، ەلەكتريكتى كوشەدەن ءوزىڭىز تاۋىپ الىپ، جوندەتە بەرىڭىز» دەدى. «سوندا قالاي، - دەدىك ءبىز دە اڭ-تاڭ قالىپ، - تولەماقىنى سىزدەرگە تولەپ ءجۇرمىز عوي، قىزمەتتى سىزدەر كورسەتپەيسىزدەر مە سوندا؟». «ءبىز ءۇيىڭىزدىڭ ەسەپتەگىشىنە دەيىنگى ارالىققا عانا جاۋاپ بەرەمىز. ار جاعى ءوزىڭىزدىڭ پروبلەماڭىز!». اڭگىمە وسىمەن ءبىتتى. امال جوق، سول مەكەمەنىڭ وزىنەن ءبىر مونتەردى جالداپ، «اكە-كوكە» دەپ ارقاسىنان قاعىپ، اقشاسىن تولەپ، ۇيگە اپارىپ جوندەتىپ الۋعا ءماجبۇر بولدىق.
سوندا دەيمىن دە، پلوسكوگۋبسىيىن قايشىلاپ، «تولەماقىڭدى ۋاقتىلى تولەمەسەڭ جارىعىڭدى قىرقامىن!» دەپ قاقپا الدىنان شىقپاي، ۇركىتىپ-قورقىتاتىن دارداي مەكەمەنىڭ قىزمەتتىك نۇسقاۋىندا قاراپايىم حالىقتىڭ اجەتىن شىعارۋ قىزمەتىنىڭ قاراستىرىلماعانى ما؟ وندا اقشانى كىمگە جانە نە ءۇشىن تولەپ ءجۇرمىز؟ ايىنا ءبىر مارتە ەسىككە اكەلىپ قىستىرىپ كەتەتىن تولەماقى تۇبىرتەگىن تاسىعانى ءۇشىن بە؟

بەكجىگىت سەردالى