بۇعان دەيىن وسكەمەندەگى «ۆوستوچنيك-3» باۋباقشا قوعامداستىعىنا قاراستى ساياجايداعى قازاق تىلىنە قاتىستى جاعدايدى جازعان ەدىك. قازاق تىلىندە اقپارات تاراتىپ، جينالىستى، ءىس-قاعازداردى قازاق تىلىندە جۇرگىزۋدەن باس تارتىپ وتىرعان قوعامداستىق باسشىسى شۋشاننيكوۆ گ.پ-گە حابارلاسقان ەدىك.

شۋشاننيكوۆ گ.پ قازاق ءتىلى تۋرالى ماسەلە قوعامداستىق جينالىسىندا قارالىپ، اۋدارماشىعا قارجى بولىنبەيدى دەگەن شەشىمگە كەلگەنىن ايتادى. Qamshy.kz اقپارات اگەنتتىگى تەگىن اۋدارما جاسايتىن اۋدارماشى تابۋدى ءوز موينىنا الدى. كوپ ۇزاماي، وسكەمەندەگى ساياجايدا ماسەلەمەن تانىسقان دارحان امانتاي ۇلى ەسىمدى كاسىبي اۋدارماشى تەگىن اۋدارما جاساپ بەرۋگە دايىن ەكەنىن ايتىپ، رەداكسيامىزعا حابارلاسقان ەدى. ءوزى قوستانايدا تۇرادى. قازاق ءتىلىنىڭ كوسەگەسىن كوتەرىلۋىنە ءوز ۇلەسىن قوسۋ ءۇشىن حابارلاسقان ازاماتقا ريزا بولدىق. الايدا كوپ ۇزاماي قۋانىشىمىز سۋ سەپكەندەي باسىلدى. سەبەبى شۋشاننيكوۆ تەگىن اۋدارما جاسايتىن كاسىبي اۋدارماشى تاپقانىمىزدى، وعان ەلەكتروندى تۇردە اۋداراتىن قاعازداردى جىبەرىپ تۇرۋ عانا كەرەك ەكەنىن ايتىپ ەدىك، شۋشاننيكوۆ شوشىپ ءتۇستى.

ينتەرنەت جوق ەكەنىن جانە قاعازداردى اۋدارماعا جىبەرىپ وتىرۋ ونىڭ قۇزىرەتىنە جاتپايتىنىن ايتىپ ەندى باسقاشا سايرادى. سونداعى تاپقان سىلتاۋى – ينتەرنەت جوق ەكەن، مىس.

قوعامداستىق ق ر ءتىل تۋرالى زاڭىن تولىق ورىنداۋى ءۇشىن ولارعا تەگىن اۋدارما جۇمىسىمەن اينالىساتىن اۋدارماشى جالداپ، ينتەرنەتپەن قامتاماسىز ەتىپ، اۋدارماشىعا قۇجاتتاردى جىبەرىپ وتىراتىن حاتشى تاۋىپ، ونىڭ جالاقىسىن اي سايىن تولەپ وتىرۋ كەرەك پە سوندا؟

زاڭنىڭ اتى زاڭ. زاڭعا مويىنسىنۋ ءاربىر ازاماتتىڭ مىندەتى ەمەس پە؟! قارجىنىڭ جوقتىعى وزگەلەردى تولعاندىرماۋى قاجەت. قاراپايىم عانا مىسال، حالىق زاڭ بويىنشا كوممۋنالدى قىزمەتتىڭ اقىسىن تولەۋ كەرەك. ونى تولەمەسە سۋسىز، جارىقسىز قالدىرادى. تۇرعىننىڭ اقشاسى بار ما، جوق پا ەشكىمدى قىزىقتىرمايدى. تولەۋ كەرەك پە، كەرەك. بۇل دا سول سەكىلدى دۇنيە ەمەس پە؟