الماتىنىڭ مەدەۋ اۋدانىنا قاراستى الاتاۋ ىقشاماۋدانىنا ەندى جاڭا اۆتوبۋستار قاتىنايدى. بۇعان دەيىن جولاۋشى تاسىمالداپ كەلگەن قوعامدىق كولىكتەرگە شاعىم كوبەيگەن سوڭ، اۋدان بيلىگى جاڭا شاعىن اۆتوبۋستار بولگەن.

12 مىڭعا جۋىق حالىق تۇراتىن الاتاۋ ىقشاماۋدانىنىڭ تۇرعىندارى ەندى قالاعا جايلى ءارى جاڭا اۆتوبۋسپەن قاتىنايدى. كوپتەن بەرى كوكەيدەگى ماسەلەسى شەشىلمەگەن حالىقتىڭ جانىنا قوعامدىق كولىك جەتىسپەۋشىلىگى قاتتى باتقان. ال بۇعان دەيىن قاتىناپ كەلگەن №417 اۆتوبۋستىڭ تەحنيكالىق جاعدايى ناشار بولعاندىقتان جولاۋشىلار تاراپىنان شاعىم كوبەيىپ كەتكەن. تۇرعىنداردىڭ ءوتىنىشىن ەسكەرگەن اكىمشىلىك 9 شاعىن اۆتوبۋستى ىسكە قوستى.

«بۇگىن مەدەۋ اۋدانى اكىمشىلىگى جولاۋشىلار كولىگى باسقارماسىمەن بىرلەسىپ، 417ء-شى باعىتتى №117ء-شى باعىتقا اۋىستىرىپ جاتىرمىز. بۇگىنگى تاڭدا تاسىمالداۋشى كومپانيا – «سامات ترانس» ج ش س مەملەكەتتىك سۋبسيديا ارقىلى العان اقشامەن جاڭادان 9 اۆتوبۋس الىپ، ءتيىستى باعىتقا قوسىلدى»، – دەدى الماتى قالاسى مەدەۋ اۋدانى اكىمى ورىنباسارىنىڭ مىندەتىن اتقارۋشى بەرىك سولتانبايەۆ.

اۆتوبۋستاردى جاڭارتۋعا 96 ميلليون تەڭگە جۇمسالىپ، 30 ادام جاڭا جۇمىسپەن قامتىلعان. ەندى №117 باعىتتاعى جاڭا اۆتوبۋس الاتاۋ ىقشاماۋدانىنان «ساياحات» اۆتوۆوكزالى ارالىعىندا جولاۋشىلار تاسىمالدايدى. قوزعالىس جيىلىگى 14-15 مينۋتتى قۇرايدى. ال قوعامدىق كولىكتەردەگى جولاقى قۇنى ادەتتەگىدەي، «وڭايمەن» تولەنىپ، بارلىق جەڭىلدىكتەر ساقتالادى دەيدى اۆتوپارك باسشىسى.

«قالاىشىلىك باعىت بولعاندىقتان، بارلىق جەڭىلدىكتەر ساقتالادى. 75 جاستان اسقان زەينەتكەرلەر تەگىن جۇرەدى. ستۋدەنتتەر مەن وقۋشىلار ءۇشىن جولاقى قۇنى 40 تەڭگە، جالپى جولاۋشىلار ءۇشىن «وڭاي» كارتاسى بويىنشا 80 تەڭگە. جول قۇنىن سمس-تولەم بويىنشا دا تولەۋگە بولادى»، – دەپ ءتۇسىندىردى تاسىمالداۋشى كومپانيا باسشىسى ورازبەك سابدەنوۆ.

ال جاڭا اۆتوبۋستاردىڭ قوسىلعانىنا ەلدى مەكەن تۇرعىندارى ءدان ريزا. ەندى جايلى اۆتوبۋستا ەشقانداي قيىندىقتار تۋىندامايدى دەپ سەنەدى. 

«بۇرىنعى اۆتوبۋستار ەسكى، ەسىك-تەرەزەسى جاقسى جابىلمايتىن، سۋ، قار كىرىپ كەتەتىن، ەدەنى تەسىك بولاتىن. ەندى ول اۆتوبۋستاردان قۇتىلىپ، مىناداي جاڭا اۆتوبۋستار كەلگەنىنە قۋانىپ جاتىرمىز»، دەيدى جولاۋشىلار.

ءبىز سوزگە تارتقان جولاۋشىلاردىڭ ءبىرى: «مەن وسى جەردە 1994 جىلدان بەرى تۇرامىن. بۇرىن ءبىز «ساياحاتتان» بيلەت الىپ جۇرەتىنبىز. اۆتوبۋستار ءجيى جۇرمەي قالاتىن، باسقا دا جول ماشاقاتى كوپ ەدى» دەسە، ەندى ءبىرى: «بۇگىنگى كۇن الاتاۋ ىقشاماۋدانىنىڭ تۇرعىندارى ءۇشىن كوپتەن كۇتكەن قۋانىشتى كۇن بولدى. اۆتوبۋس تۋرالى ارمانىمىزدىڭ ورىندالعانى قاتتى قۋانتتى.مەن وسى اۋداندا 40 جىلدان استام ۋاقىتتان بەرى تۇرامىن، اۆتوبۋس قيىندىعىن ءبىر ادامداي كورىپ كەلە جاتىر ەدىم. ەندى ول ماسەلە دە شەشىلدى»، – دەپ، قۋانىشتى كوڭىل كۇيىمەن ءبولىستى.

جاڭا اۆتوبۋستار ەرتەڭنەن باستاپ جولاۋشىلار تاسىمالداي باستايدى. ايتا كەتەيىك، №117 شاعىن اۆتوبۋس تاڭعى 5:45-تەن، كەشكى 20:30-عا دەيىنگى ۋاقىت ارالىعىندا قاتىنايدى.