بيىل الماتىنىڭ 20 مەكتەبىندە روبوتوتەحنيكا سىنىپتارى اشىلدى. جىل اياعىنا دەيىن ءبىلىم وشاقتارىنىڭ 30 پايىزىندا تىڭ تەحنولوگيالارمەن جابدىقتالعان كابينەتتەر پايدا بولماق. ال كەلەسى جىلى 100 ءبىلىم وشاعىندا وقۋشىلار قۇلتەمىر قۇراستىرۋدىڭ قىر-سىرىن مەڭگەرە الادى.    

ەستۋ قابىلەتى ناشار بالالارعا ارنالعان №1 ارنايى مەكتەپ-ينتەرناتىندا روبوتوتەحنيكا سىنىبى وتكەن جىلى ءوز جۇمىسىن باستاعان. الايدا، بالالاردىڭ جاڭا سالانى تولىق مەڭگەرۋىنە قۇرال-جابدىقتار جەتكىلىكسىز بولعان كورىنەدى. دەسە دە، ءبىلىم وشاعىندا قۇلتەمىر قۇراستىرۋدى ۇيرەنەمىن دەۋشىلەر ءۇشىن ۇيىرمەلەر جۇمىس ىستەپتى. وعان 7 جاستان 15 جاس ارالىعىنداعى بالالار قاتىسىپ ءجۇر.

«روبوتوتەحنيكا بالالاردىڭ ءوي-ورىسىن، زەيىنىن دامىتىپ، جان-جاقتى بولىپ وسۋىنە ىقپال ەتەدى. روبوتوتەحنيكانى مەڭگەرۋ ءۇشىن بىزگە مامانداندىرىلعان باسقا مەكتەپتەردەن وقۋشىلار كەلىپ وقىپ جاتىر. وقۋشىلار بىر-بىرىمەن تانىسى، دوستاسىپ تا جاتادى. بالالار بىر-بىرىنەن كوپ نارسە ۇيرەنىپ،بىلگەندەرىن ءبولىسىپ، الدارىنا بيىك ماقساتتار قويىپ ۇيرەنەدى»، – دەيدى الماتى قالاسى №1 ەستۋ قابىلەتى ناشار بالالارعا ارنالعان ارنايى مەكتەپ-ينتەرناتىنىڭ ءمۇعالىمى لاۋرا مونتانايەۆا.

ۇستازدار قاۋىمىنىڭ ويىنشا، يننوۆاسيالاردى ەنگىزۋ جانە ءاربىر وقۋشىمەن جەكە جۇمىس جاساۋ ءادىسى ءبىلىم ساپاسىن ارتتىرىپ، جاستار اراسىندا جاڭاشىل كوزقاراستى دامىتۋعا سەپتىگىن تيگىزەدى. بيىل قالادا 20 مەكتەپتە روبوتوتەحنيكا سىنىپتارى اشىلعان. سونىڭ ىشىندە، اتالمىش مەكتەپ-ينتەرنات وسى تىزىمگە ەنگەن العاشقى ءبىلىم وشاعى.

«بالالار روبوتوتەحنيكانى مەڭگەرۋدى جاقىندا باستاسا دا، ەكى ۇلكەن جارىسقا قاتىستى. قاراعاندىدا وتكەن حالىقارالىق سايىستا باعىن سىنادى. ودان كەيىن الماتىدا وتكەن جارىسقا قاتىستى. جەتكىنشەكتەردىڭ تىڭ تەحنولوگيانى مەڭگەرۋگە قۇلشىنىسى جوعارى»، – دەدى الماتى قالاسى №1 ەستۋ قابىلەتى ناشار بالالارعا ارنالعان ارنايى مەكتەپ-ينتەرنات ديرەكتورى الەكساندرا دنيشيەۆا.

ءبىر روبوتوتەحنيكا سىنىبىن قۇرۋ ءۇشىن مەملەكەت بيۋدجەتىنەن 6 ميلليون تەڭگە بولىنەدى. جىل سوڭىنا دەيىن قالاداعى مەكتەپتەردىڭ 30 پايىزىندا تىڭ تەحنولوگيامەن جابدىقتالعان كابينەتتەر اشىلىپ، وعان قاجەتتى قۇرال-جابدىقتار الىنباق. ال كەلەسى جىلى الىپ شاھارداعى ءبىلىم وشاقتارىنىڭ جارتىسىندا IT-سىنىپتارى پايدا بولادى.

«2014 جىلى تۇڭعىش رەت جارىس ۇيىمداستىرعاندا 15 كوماندا قاتىستى. ال وسى جىلى «حالىق ارەنادا» وتكەن سايىستا 315 كوماندا 2000 مىڭنان استام سايىسكەر باعىن سىنادى. بايقاۋدا بالالار اقىلدى ءۇي جانە جىلىجاي سىندى ەرەكشە جوبالار ۇسىندى»، – دەيدى الماتى قالاسى ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعىنىڭ ديرەكتورى اندرەي دۋپيك.

الماتىدا تۇڭعىش رەت روبوتوتەحنيكا بويىنشا جارىستارعا قاتىسۋ ءۇشىن ارنايى كوماندالار دايىندالىپ جاتىر. جاسوسپىرىمدەردى شەتەلدەن كەلگەن IT سالاسىنىڭ مامانى وقىتادى. كەيىننەن جەتكىنشەكتەر ىرىكتەلىپ، ۇزدىكتەرى اقش-تا وتەتىن حالىقارالىق سايىستا ەل ناماسىن قورعايتىن بولادى.