3 جىل قاتارىنان ءوتىپ كەلە جاتقان «بالا داۋىسى» فەستيۆالىنە قاتىسۋعا بيىل 3 مىڭنان اسا جەتكىنشەك نيەت بىلدىرگەن. ويتكەنى، وتىنىمدەر جەڭىلدەتىلگەن جاڭا فورماتتا قابىلدانىپتى.

بايقاۋعا ىرىكتەۋ مامىردا باستالىپ، ودان كەلەسى كەزەڭگە تەك 80 بالا وتكەن. ال قازىلار القاسى فينالعا 8 بەن 12 جاس ارالىعىنداعى 19 ورىنداۋشىنى تاڭداپ العان. ەلىمىزدىڭ 16 وبلىسىنان جينالعان دارىندار ءقازىر الماتىداعى «بوبەك» وقۋ ورتالىعىندا تۇرىپ جاتىر. ولار 2 اپتا بويى بىلىكتى ماماندارداردان بي، ءان جانە اكتەرلىك شەبەرلىك بويىنشا ءدارىس الادى. بۇگىن ولاردىڭ الدىندا ەلىمىزدىڭ بەتكە ۇستار ونەر جۇلدىزدارى شەبەرلىك ساباعىن وتكىزىپ، اقىل-كەڭەستەرىن ايتتى.

«بيىلعى سايىستىڭ ەرەكشەلىگى – بالالار كوپ كەلدى. وسىمەن 3ء-شى ماۋسىم ءوتىپ جاتقان سايىسقا 11 مىڭنان استام بالا قاتىستى. بيىل بايقاۋعا بالالاردىڭ كوپ قاتىسۋىنا ىرىكتەۋدى ينتەرنەت ارقىلى وتكىزۋىمىز سەبەپ بولدى. ءبىز تەك بالالار اراسىندا بايقاۋ ۇيىمداستىرىپ قانا قويماي، ەلىمىزدىڭ تۇكپىر-تۇكپىرىندەگى دارىندى، تالانتتى بالالاردى تاۋىپ، ولاردى باپتاپ، بولاشاق جارقىن جۇلدىزدارعا اينالدىرساق دەيمىز»، – دەدى «بالا داۋىسى» بالالار ءان بايقاۋىنىڭ ۇيلەستىرۋشىسى ادىلبەك بولات.

«بۇل بايقاۋدان كوپ نارسە ۇيرەنىپ جاتىرمىن. مىسالى، حورەگرافيا، ۆوكال قىرلارىن مەڭگەرىپ، باسقا دا ويىندار وينايمىز. وسىنداي جۇلدىزدى بالالار ورتاسىنا كەلگەنىمە، فينالدان وتكەنىمە وتە قۋانىشتىمىن!»، – دەيدى «بالا داۋىسى» بالالار ءان بايقاۋىنا قاتىسۋشى اڭسار ءجۇسىپ.

ايتا كەتۋ كەرەك، ۇلتتىق ءان بايقاۋىندا تەك قازاق اۆتورلارىنىڭ شىعارمالارى ورىندالادى. سونىڭ ناتيجەسىندە، بالالاردىڭ ءان قورجىنى 50 شاقتى جاڭا تۋىندىمەن تولىققان. ال جەڭىمپاز داۋىس بەرۋ ارقىلى جانە قازىلار القاسىنىڭ باعاسى بويىنشا انىقتالادى. ەڭ مىقتى دەپ تانىلعان ونەرپاز پاريجدەگى ديسنەيلەندكە جولداما الادى.