بۇگىن الماتىدا «تۇلپار ءمىنىپ، تۋ العان» ۇلتتىق بايقاۋىنىڭ قورىتىندى كەزەڭى ءوتتى. فينالعا مىقتى دەگەن 8 اۋداننىڭ 24 وقۋشىسى وتكەن. بۇل كۇنى ولار «الپامىس باتىر» جىرىن جاتقا ايتۋدان جارىستى.

بايقاۋدىڭ شارتى بويىنشا وقۋشىلار ەپوستى كەز كەلگەن جەرىنەن توقتاتىپ، ءبىر-بىرىن ءىلىپ اكەتۋى كەرەك. سونداي-اق، قازىلار القاسى قاتىسۋشىنىڭ وقيتىن سىنىبىنا قاراي سۇراقتار قويدى.

ەسكە سالا كەتەيىك، جىر دوداسىنىڭ جۇلدە قورى 3 ميلليون تەڭگەنى قۇرايدى. جەڭىسكە جەتكەن جەڭىمپازداردى سالتاناتتى ماراپاتتاۋ 2 قازان كۇنى «الاتاۋ» ءداستۇرلى ونەر تەاترىندا وتەدى.  

«ءبىز 6 بالاعا جۇلدە تاراتامىز. جەڭىمپازدارعا 3 ىنتالاندىرۋ سىيلىعى، 3 نەگىزگى سىيلىق بەرىلەدى. بالالار اراسىنداعى جەڭىس ءبىرىنشى، ەكىنشى جانە ءۇشىنشى ورىندارمەن بولىنەدى. ال جەڭىمپازدى انىقتاۋ ۋاقىتى قانشا ۋاقىتقا سوزىلسا، سوعان دەيىن كەدەرگىسىز جۇرگىزىلە بەرەدى. ويتكەنى، بالاعا قيانات جاساۋعا بولمايدى. قازىلار القاسى مىنا بالالار مىقتى ەكەن دەپ ۇسىنىپ جاتسا، ءبىز سول 6 بالا وزدەرىنىڭ مىقتى ەكەنىن دالەلدەگەن جاعدايدا عانا بايقاۋدى توقتاتاتىن بولامىز»، – دەدى اقىن، ۇلتتىق جوبا جەتەكشىسى سەرىك سەيىتمان.