جاننا كالينا - ەكى بىردەي ەرەكشە كۇتىمدى قاجەت ەتەتىن بالالاردىڭ اناسى. 3 بالاسى بار وتباسى پاتەر جالداپ تۇرسا دا، تاپقان-تايانعاندارىن ناۋقاس بالالاردىڭ ەمىنە جۇمساپ، ارنايى كۇتىم شارالارىنىڭ بارلىعىن جاساتۋعا تىرىسادى. مۇگەدەك بالالارى بار وتباسى رەتىندە پاتەر كەزەگىنە 8 جىل بۇرىن تۇرعانىمەن، ءالى كۇنگە ناتيجە بولماپتى.

وسى قيىندىقتاردىڭ بارلىعى جاننانى مويىتا المادى. اۋرۋ بالاسىنىڭ جانىنان ءبىر ەلى شىعا المايتىن ول وسىدان 2 جىل بۇرىن ۇيدە وتىرىپ، ءتاتتى تورتتار ازىرلەپ، ساتۋمەن اينالىسا باستادى. بىردەن تابىس تاۋىپ كەتپەگەنىمەن، الەۋمەتتىك جەلى ارقىلى تۇراقتى ساتىپ الۋشىلار تابۋدىڭ ءساتى تۇسەدى.

* تورت ازىرلەۋدى ۇلكەن تابىس اكەلەتىن بيزنەس دەي المايمىن، دەگەنمەن، بالالاردىڭ ەم-دومىنا جەتەدى. ءتاتتى تاعام ازىرلەۋدى جاقسى كورەمىن جانە بار ىنتا-شىنتاممەن دايىندايمىن. ونى ساتىپ الۋشىلار دا سەزەتىن بولۋ كەرەك، قايتا اينالىپ كەلىپ جاتادى. ەندى وسى كاسىبىمدى ءارى قاراي دامىتىپ، شەبەرلىك ساباقتارىن وتكىزىپ، مۇگەدەك جاندارعا ارنالعان كافە اشقىم كەلەدى،-دەيدى قايسار انا.

جاقىندا عانا ول ورتالىقتاعى «ءاليا» بازارىنان ءوز ساۋدا ورنىن اشتى. وندا ول ءوز قولىنان شىققان ءتۇرلى تاتتى-دامدىلەردى ساتادى. ونىڭ بۇل باستاماسىنا اقتوبە وبلىسى «اتامەكەن» كاسىپكەرلەر پالاتاسى جانىنداعى ىسكەر ايەلدەر قاۋىمداستىعى مۇرىندىق بولدى. كەڭەس مۇشەلەرى جانناعا جەكە كاسىپكەر رەتىندە تىركەلىپ، بيزنەستى قالاي جۇرگىزۋ كەرەكتىگى جونىندە كەڭەس بەردى.

* جاننا كالينا بىزگە بيىل كوكتەمدە كومەك سۇراپ كەلگەن بولاتىن. ءبىز وعان جەكە كاسىپكەرلىككە ارنالعان باعدارلامالار تەتىكتەرىن پايدالانۋ تۋرالى كەڭەس بەردىك. ساۋدا ورنىن اشۋعا كومەك كورسەتتىك. سونداي-اق، شەبەرلىك ساباقتارىن وتكىزۋگە ارنالعان سەرتيفيكات الۋعا سەپتىگىمىزدى تيگىزبەكپىز. جاننانىڭ ينۆاكافە اشۋ ءۇشىن نەسيە الۋعا كەپىلگە قوياتىن مۇلكى بولماعاندىقتان، مەملەكەت بولەتىن قايتارىمسىز گرانت الۋعا قاتىسۋىنا سۇيەمەلدەۋ جاساماقپىز. جاننا سەكىلدى قولىنان ءىس كەلەتىن ايەل ازاماتشالارعا قولداۋ كورسەتۋ-بىزدىڭ نەگىزىگى مىندەتىمىز،-دەيدى ىسكەر ايەلدەر كەڭەسىنىڭ ءتورايىمى جانار ەلەۋسىزوۆا.

جاننا كالينانىڭ قولىنان شىققان تورتتار تەك تابيعي ونىمدەردەن دايىندالاتىندىعىمەن ەرەكشەلەنەدى. ءاردايىم شەبەرلىگىن شىڭداپ وتىراتىن ول ءوز جۇمىسىن ادال اتقارۋعا تىرىسادى. كۇندىز بالالاردىڭ ەم-دومىمەن شاپقىلاپ، تۇندە ءتىل ۇيىرەر تورت ءپىسىرىپ، كاسىپكەرلىكپەن اينالىسۋعا تىرىسىپ جۇرگەن كەيىپكەرىمىزدى بۇگىنگى كۇننىڭ باتىرىنا تەڭەۋگە بولادى.

قازىرگى كەزدە تۋعان كۇن، توي، مەرەكەلىك كەشتەردى ءدامدى تورتسىز ەلەستەتۋ مۇمكىن ەمەس.