اقتوبەدە ەسەپشىلەر مەن قارجى سالاسىنىڭ ماماندارىنا ارنالعان اۋقىمدى شارا ءوتتى. تاجىريبەلى ماماندار ارىپتەستەرىنە بۋحگالتەرلىك ەسەپ جانە سالىق ماسەلەلەرى جونىندە تۇسىنىك بەردى.

كاسىپكەرلەر پالاتاسىندا وتكەن جيىنعا 100-گە جۋىق سالا ماماندارى قاتىستى. جيىندا رەسپۋبليكاعا بەلگىلى اۋديت جانە سالىق كەڭەسشىلەرى بايانداما جاسادى. ءماجىلىستى «اقتوبەدەگى ەسەپشىلەر مەن اۋديتورلار ءۇيى» ج ش س جانە اقتوبە وبلىسى كاسىپكەرلەر پالاتاسىنىڭ جانىنداعى ەسەپشىلەر كلۋبى ۇيىمداستىردى. قۇرامىنا 250 ەسەپشى مامان كىرەتىن بۋحگالتەرلەر كلۋبىنىڭ جۇمىس جاساعانىنا 2 جىل بولدى.

* بۇل شارا ارىپتەستەر اراسىندا تاجىريبە الماسۋ عانا ەمەس، اقتوبەنىڭ قارجى جانە ەسەپشى ماماندارىنىڭ بىلىكتىلىكتەرىن كوتەرۋگە جانە ءوزارا ىسكەرلىك قارىم-قاتىناس جاساۋعا مۇمكىندىك بەرەدى دەپ ەسەپتەيمىن. كلۋب مۇشەلەرى پالاتادا وتكىزىلەتىن بارلىق سەمينارلار مەن تالقىلاۋلارعا بەلسەندى قاتىسادى. جاڭا سالىق كودەكسى بيزنەستىڭ پىكىرىن ەسەپكە الا وتىرىپ جاسالعاندىقتان، قانداي دا ءبىر وزگەرتۋلەرگە ءوز ۇسىنىسىمىزدى ءبىلدىرىپ وتىرۋمىز –وتە ماڭىزدى. سالىق كودەكسىندەگى سالىق ورگاندارىنىڭ تەكسەرىسىنە نەگىز بولاتىن جاعدايلاردى 30 پايىزعا دەيىن قىسقارتۋ ۇلتتىق كاسىپكەرلەر پالاتاسىنىڭ باستاماسىمەن جۇزەگە اسىرىلعان بولاتىن،-دەپ اتاپ ءوتتى «اتامەكەن» وكپ ديرەكتورى نۇرلىبەك مۇقانوۆ.

اقتوبە وبلىسىنىڭ ەسەپشىلەرىنە ارنالعان جيىن «ق ر اۋديتورلىق قىزمەت تۋرالى» زاڭىنىڭ 20 جىلدىعىنا وراي وتكىزىلدى. ءماجىلىستىڭ تاقىرىبى: «21 عاسىرداعى ءاۋديتتىڭ دامۋ ۇدەرىسى، بۋحگالتەرلىك ەسەپ جانە سالىق سالۋ سالاسىنداعى زاڭنامالارداعى وزگەرىستەر» دەپ اتالدى. جيىننىڭ باستى ماقساتى سالىق سالۋداعى وزەكتى ماسەلەلەر جونىندە تۇسىنىك بەرۋ بولدى. 

* ءبىز ەسەپشىلەر مەن قارجى ديرەكتورلارىنا، بيزنەس باسشىلارىنا ارنالعان وسىنداي اۋقىمدى شارالاردى تەگىن وتكىزەمىز. جوعارى بىلىكتى ماماندار ارىپتەستەرىنە جاڭا جىلدا زاڭنامالارداعى وزگەرىستەرگە ساي جۇمىس ىستەۋدى ۇيرەتۋدە-دەيدى «اقتوبەدەگى ەسەپشىلەر مەن اۋديتورلار ءۇيى» ج ش س ديرەكتورى الىبەك شاماروۆ.

سونداي-اق، شاراعا قاتىسۋشىلار قازىرگى كەزدە كەز-كەلگەن ۇجىمدا قولدانىلۋى ءتيىس قارجىلىق ەسەپتىڭ جاڭا حالىقارالىق ستاندارتتارى، ەلەكتروندى شوت-فاكتۋرالار، ۆيرتۋالدى قويما، ققس باقىلاۋدا ونلاين كاسسالىق اپپاراتتاردى قولدانۋ سەكىلدى جاڭاشىلدىقتاردان حاباردار بولدى.

-بۇل كاسىپكەرلەر ءۇشىن وتە ىڭعايلى. بۇرىن فيسكالدى ورگاندار كامەرالىق باقىلاۋدى جۇرگىزۋ ءۇشىن كاسسالىق اپپاراتتاردى الىپ كەلۋدى سۇراتاتىن نەمەسە وزدەرى كەلۋگە ءماجبۇر بولسا، ونلاين كاسسالىق قۇرىلعىلاردى قولدانۋ ارقىلى ساۋدا ءتۇسىمى ءبىزدىڭ سەرۆەرگە تىكەلەي جولدانادى. سالىق تولەۋشىلەر ەش قينالمايدى. ولقىلىقتار ورىن العان جاعدايدا بىزدەر ونى كورىپ وتىرامىز دا سالىق تولەۋشىگە حابار بەرەمىز. ول ونى ورنىندا وتىرىپ-اق تۇزەتە الادى. بۇگىنگى كۇنى كاسىپكەرلىك قىزمەتتىڭ 60-70% ونلاين كاسسالىق اپپاراتتارمەن جابدىقتالعان. 2019 جىلدىڭ 1 قاڭتارىنان باستاپ، ونلاين باقىلاۋ كاسسالىق اپپاراتتارى بارلىق قالا بازارلارىنىڭ ساۋدا قاتارلارىنا قويىلاتىن بولادى. بۇرىن ولار قولدانبايتىن. 2020 جىلدان باستاپ، كاسسالىق اپپاراتتار بارلىق پاتەنتشىلەرگە مىندەتتەلەدى،-دەپ مالىمدەدى اقتوبە وبلىسى بويىنشا مەملەكەتتىك كىرىستەر دەپارتامەنتىنىڭ باسقارما باسشىسى گۇلميرا ارىسپايەۆا.

سونىمەن قاتار، كونفەرەنسياعا قاتىسۋشىلارعا بيزنەس وكىلدەرىنە تەگىن قىزمەت كورسەتەتىن «كاسىپكەرلەردىڭ جەكە كابينەتى» ەلەكتروندى پورتالى تانىستىرىلدى.

* كاسىپكەردىڭ جەكە كابينەتىن قولدانۋ وڭاي ءارى قولجەتىمدى. سabinet.atameken.kz سايتىنا كىرىپ، تىركەۋدەن وتكەن ءاربىر كاسىپكەردىڭ كۇندەلىكتى قاجەتتى اقپاراتتار مەن قىزمەتتەردى ۇزدىكسىز الۋىنا تولىق مۇمكىندىك بار. سونىڭ ىشىندە، جۇمىس بارىسىندا ءجيى قولدانىلاتىن قۇجاتتار ۇلگىسى دە ۇسىنىلادى. قازىرگى ۋاقىتتا بىرنەشە سەرۆيس

جۇمىس ىستەپ تۇر،-دەيدى «اتامەكەن» وكپ قارجىلاي ەمەس قولداۋ ءبولىمىنىڭ باسشىسى ەرجان نۇرعالييەۆ.

جيىن بارىسىندا تىڭداۋشىلارعا اقپاراتتىق ماتەريالدار تاراتىلىپ، ەسەپشىلەردىڭ قىزمەتىندە كەزدەسەتىن ماسەلەلەرگە بايلانىستى سۇراقتارعا جاۋاپ بەرىلدى. سونىمەن قاتار، قاتىسۋشىلارعا بىلىكتىلىكتى ارتتىرۋ تۋرالى سەرتيفيكاتتار بەرىلدى.