اقتوبە وكىلدىگى «يسلام جانە وتباسى» جىلى اياسىندا كەزەكتى شارا ۇيىمداستىردى.

تاۋەلسىزدىك مەرەكەسىنىڭ تۇسىندا «جاستىق» كافەسىندە وتباسىلىق وتىرىس ءوتتى. وعان اقتوبەلىك ءدىن قىزمەتكەرلەرى، قالا، اۋدان مەشىتتەرىنىڭ باس يمامدارى مەن مەدرەسە ۇستازدارى جانۇيالارىمەن بىرگە قاتىستى. بالالارعا دەيىن بولەك داستارحان جايىلىپ، مەرەكەلىك كوڭىل-كۇي ەسكەن بەرەكەلى باسقوسۋ بولدى.

وكىل يمام تولەبي وسپان بارشاسىن تاۋەلسىزدىك كۇنىمەن قۇتتىقتاپ، ءار شاڭىراققا اللادان اماندىق، بەرەكە مەن تاتۋلىق تىلەپ، دۇعا ەتتى. بارشا اقتوبەلىك ءدىن قىزمەتكەرلەرىنە بيىلعى بىرلەسىپ اتقارعان جەمىستى جۇمىستارعا راحمەت ايتىپ، ريزاشىلىعىن جەتكىزدى.

- 2018 جىل اقتوبەلىكتەر ءۇشىن باس ءمۇفتي سەرىكباي قاجى ساتىبالدى ۇلى حازرەتتىڭ اقتوبەگە جاساعان ساپارىمەن ايشىقتالدى. ساپاردىڭ ناتيجەسىندە وبلىس اكىمدىگى مەن قازاقستان مۇسىلماندارى ءدىني باسقارماسى، «ۋاقىپ» كورپوراتيۆتىك قورى اراسىندا ءۇش جاقتى مەموراندۋمعا قول قويىلىپ، بىرلەسكەن جوبالارعا جول اشىلدى. سونىڭ ىشىندە، اقتوبەلىك ءدىن قىزمەتكەرلەرىنە الەۋمەتتىك قولداۋ كورسەتۋ ماسەلەسىنە ەرەكشە ءمان ارتىلدى. قازىرگى تاڭدا جەرگىلىكتى 26 يمامعا «ۋاقىپ» قورىنان، 8 يمامعا ءدىني باسقارمانىڭ قاجىلىق قورىنان قايىرىمدىلىق كومەك بەرىلەدى. اقتوبەلىك 34 يمامنىڭ قوسىمشا جالاقىلارعا تاعايىندالۋى – ءسىز بەن ءبىزدىڭ بىرلەسىپ اتقارعان جۇمىسىمىزدىڭ جەمىسى، - دەدى وكىل يمام تولەبي ءدادىل ۇلى. ءسوزىنىڭ جالعاسىندا وكىل يمام اتقارىلعان ءبىرقاتار اۋقىمدى شارالاردى اتاپ ءوتتى. سونىڭ ىشىندە، بيىل اقتوبە مەشىتتەرى 20 ملن تەڭگەدەن استام قاراجاتقا قايىرىمدىلىق كومەك كورسەتىپ، مۇقتاج وتباسىلارعا 18 تونناعا جۋىق ازىق-تۇلىك تاراتقان. 680 بالانى جاڭا وقۋ جىلىنا دايىندادى. ءدىني باسقارما جاريالاعان «يسلام جانە وتباسى» جىلى اياسىندا وبلىستا 30-عا جۋىق ءار ءتۇرلى ءىس-شارالار ۇيىمداستىرىلدى.

- بۇگىنگى وتباسىلىق باسقوسۋدىڭ ءبىر سەبەبى – ۇجىم اراسىنداعى ۇيىمشىلدىقتى عانا ەمەس، جانۇيالار اراسىنداعى جاراسىمدىلىقتى، تاتۋلىق پەن دوستىقتى نىعايتۋ. ءسىز بەن ءبىزدىڭ جۇمىستا جەمىستى، تابىستى بولۋىمىزدىڭ ءبىر ۇلەسى – ءۇي ىشىندەگى بەرەكە مەن بىرلىكتە جاتىر. ەندەشە، سول وتباسى قۇندىلىقتارىنىڭ قادىرىنە جەتە بىلەيىك. كەلەر جىل دا جىل جاقسى دا جاڭا باستامالارعا تولى، جەمىستى جىل بولعاي دەپ تىلەيمىن، - دەي وتىرىپ، وكىل يمام مەشىت قىزمەتكەرلەرىنە العىس حاتتار تابىس ەتتى. سونداي-اق، مەشىتتەگى يگى ىستەرگە جاردەمشى بولىپ جۇرگەن جاناشىر جاندار مەشىت القاسىنىڭ مۇشەسى قانىبەك جاقسىلىق ۇلى مەن كاسىپكەر رۇستەم امانگەلدىۇلىنا دا ارنايى العىس جاريالاپ، كاسىپتەرىنە بەرەكەت تىلەدى.

وتىرىس بارىسىندا ۇلتتىق ويىندار دا ۇلىقتالىپ، يمامدار گىر كوتەرۋدەن كۇش جارىستىردى. بال ءتىلدى بالعىندار دا بار بىلىمدەرىن

ورتاعا سالىپ، سۇراقتارعا جاۋاپ بەرىپ، سىيلىق الدى. ءداستۇرلى ان-كۇيدەن شاشۋ شاشىلىپ، دومبىرانىڭ قوڭىر ءۇنى كۇمبىرلەگەن كەرەمەت كەش بولدى. بارلىق جانۇيالارعا ەستەلىك سىيلىقتار تاراتىلدى.