جازۋشى ولجاس سۇلەيمەنوۆ ماليكا مۇحيتوۆانى كەشىردى ءارى استانا سوتىنان بويجەتكەننىڭ بوستاندىعىن شەكتەمەۋدى سۇرادى.
ماليكا مۇحيتوۆا ولجاس سۇلەيمەنوۆتىڭ نەمەرەسى ەسكەندىر سۇلەيمەنوۆ قايتىس بولعان جول اپاتىنا كىنالى دەپ ايىپتالىپ، 2 جىلعا باس بوستاندىعىنان ايىرىلعان.
«ەسكەندىر سۇلەيمەنوۆتىڭ قايتىس بولعانىنا 6 اي ءوتتى. الايدا تۋعاندارىنىڭ جاراسى ەشقاشان جازىلمايدى. نەمەرەم موتوسيكلدىڭ جولىن بوگەگەن ولاق جۇرگىزۋشىنىڭ كەسىرىنەن قازا تاپتى. بىرنەشە ايعا سوزىلعان تەرگەۋ وسى فاكتىنى ناقتىلاپ كەلدى. اۋداندىق سوت تەرگەۋ قورىتىندىسىنا سايكەس شەشىم شىعاردى.
2018 جىلدىڭ 26 جەلتوقسانىندا ءىستى استانا قالالىق سوتى قارايتىن بولادى. سۇلەيمەنوۆتەر وتباسىنىڭ ۇلكەنى رەتىندە جوعارى سوتقا كىنالىنىڭ بوستاندىعىن شەكتەمەي-اق جازالاۋىن سۇرايمىن. جاسى 30-دا. تۇرمىس قۇرىپ، انا اتانسىن. سول كەزدە ماليكا مۇحيتوۆا ءبىزدىڭ قانداي سەزىمدە ەكەنىمىزدى تۇسىنەتىن بولار»، - دەپ جازدى ءوز حاتىندا ولجاس سۇلەيمەنوۆ.
ايتۋىنشا، قىزدىڭ ءومىرىن تاس تالقان ەتكەننەن ەسكەندىر قايتىپ كەلمەيدى.
ەسكە سالا كەتسەك، بەلگىلى اقىن، جازۋشى ولجاس سۇلەيمەنوۆتىڭ نەمەرەسى 27 جاستاعى ەسكەندىر سۇلەيمەنوۆ استانادا جول اپاتىنان كوز جۇمعان ەدى. جول اپاتى ماڭگىلىك ەل – كەرەي جانىبەك حاندار كوشەلەرىنىڭ قيىلىسىندا بولعان. جاس جىگىت موتوسيكل جۇرگىزىپ كەلە جاتقان. ەسكەندىر سۇلەيمەنوۆتى قىزىلوردا وبلىسى ىشكى ىستەر دەپارتامەنتىنىڭ باستىعى، پوليسيا پولكوۆنيگى قايرات ءمۇحيتوۆتىڭ قىزى ماليكا مۇحيتوۆا قاعىپ كەتكەن. 29 جاستاعى ماليكا مۇحيتوۆا سوت وتىرىسىندا مارقۇمنىڭ اتا-اناسىنان جىلاپ كەشىرىم سۇرادى. ءوزىنىڭ كىناسىن تولىعىمەن مويىنداپ، زارداپ شەككەن تاراپقا ماتەريالدىق شىعىندى تولەۋگە دايىن ەكەنىن مالىمدەدى.
24 قازاندا وتكەن سوت وتىرىسىندا زارداپ شەككەن تاراپ سوتتالۋشىدان 14 ميلليون تەڭگە مولشەرىندە ماتەريالدىق شىعىن ءوندىرۋدى تالاپ ەتكەن ەدى. الايدا كەيىن مارقۇمنىڭ وتباسى ول تالاپ-ارىزدى قايتارىپ الدى.
9 قاراشادا وتكەن ءجارىسسوز بارىسىندا مەملەكەتتىك ايىپتاۋشى الىشەر بارايەۆ ايىپتالۋشى ماليكا مۇحيتوۆانى ەكى جىلعا باس بوستاندىعىنان ايىرۋدى جانە ءۇش جىل كولىك جۇرگىزۋگە تىيىم سالۋدى سۇراعان ەدى.
مارقۇمنىڭ اتا-اناسى قازاقستاندىقتارعا ۇندەۋ جاساپ، سوتتالۋشىنىڭ شىن وكىنگەنىنە سەنبەيتىنىن ايتتى.
