بەسىنشى كۇن قاتارىنان وڭتۇستىك كورەيانى قويۋ ءتۇتىن باستى. تۇماندى ءتۇتىن جول قوزعالىسىنا كەدەرگى بولىپ، اۋانىڭ لاستانۋ دەڭگەيى كۇننەن كۇنگە ارتتى. 15 قاڭتار كۇنى لاستانۋ كورسەتكىشى ەكى ەسەگە ءوسىپ، ءبىر تەكشەمەتر اۋماققا 153 ميكروگراممدى قۇرادى. ايتا كەتەيىك، لاستانۋدىڭ ءقاۋىپتى كورسەتكىشى تەكشەمەترىنە 76 ميكروگرامدى قۇرايدى.

ال سەۋلدە اۋانىڭ لاستانۋ دەڭگەيىنىڭ تاۋلىكتىك نورماسى 118 ميكروگرامعا دەيىن جەتكەن. بۇل 2015 جىلدان بەرى تىركەلگەن ەڭ جوعارعى كورسەتكىش بولىپ وتىر.

وسىعان بايلانىستى وڭتۇستىك كورەيانىڭ 10 ۇلكەن مەگاپوليسىنىڭ باسشىلىعى قاۋىپتىلىكتى سەيىلتۋ شارالارىن قولعا الدى. باسشىلىق قالالارداعى كولىك قوزعالىسىنا شەكتەۋ قويىپ، ءوندىرىس ورىندارىنىڭ جۇمىسىن ۋاقىتشا توقتاتتى.

تۇرعىندار ءقازىر ءتۇتىندى اۋانىڭ سالدارىنان دەنساۋلىعى ناشارلاعانىن ايتىپ شاعىمدانۋدا، ولار ءتىپتى كۇنى بويى كوشەگە شىقپاي، ۇيدە قالۋدى ءجون ساناپ وتىر.

ەكولوگيالىق زەرتتەۋ ينستيتۋتىنىڭ ماماندارى مۇنداي شاڭدى تۇماننىڭ پايدا بولۋىنا اۋا-رايىنىڭ وزگەرۋى اسەر ەتكەن دەپ بولجام جاسادى. ولاردىڭ ايتۋىنشا، قىتايدان كەلگەن اۋا اعىنى لاس شاڭ-توزاڭمەن ۇلاسقان بولۋى كەرەك.

سەۋل قالاسىنىڭ مەرى پارك ۆونسۋن وڭتۇستىك كورەياعا كەلگەن لاس اۋانىڭ 50-60%-عا جۋىق مولشەرى قىتايدان كەلگەنىن دالەلدەيتىن لابوراتوريالىق زەرتتەۋ قورىتىندىسى بارىن ايتتى.

سينوپتيكتەر ءالى دە بىرنەشە كۇن ءتۇتىن بۇكىل ەل بويىنشا ساقتالادى دەپ حابارلادى.

اۋانىڭ لاستانۋى بۇگىنگى تاڭدا ەشكىمدى تاڭقالدىرمايتىنى راس. ەندى  وڭتۇستىك كورەيادان ءوزىمىزدىڭ وڭتۇسىك استاناعا اۋىسساق. قاراشا ايىندا الماتىداعى اۋانىڭ لاستانۋ دەڭگەيى 344 ميكروگرامعا جەتكەن. بۇل – سەۋلدەگى كورسەتكىشتەن ءۇش ەسە، قاۋىپتىلىك دەڭگەيىنەن 5 ەسە جوعارى. سول كەزدەگى قالا بەلسەندىلەرى قاققان دابىل جوعارىداعىلارعا ءالى جەتپەگەن سياقتى. ال حالىقتىڭ قويۋ ءتۇتىندى جۇتىپ، تۇك بولماعانداي جۇرە بەرەتىن يممۋنيتەتى قالىپتاسىپ ۇلگەرگەندەي. سەۋل بيلىگى باس-اياعى بەس كۇندە ءىرى ونەركاسىپتەردىڭ جۇمىسىن ۋاقىتشا توقتاتىپ، لابوراتوريالىق زەرتتەۋ جۇرگىزىپ، ءتىپتى لاس اۋانىڭ وشاعىن دا انىقتاپ قويعان. 

اirkaz.org سايتىنا كىرىپ، الماتى اۋاسىنىڭ لاستانۋ كارتاسىن كورۋگە بولادى.

سايتتىڭ دەرەكتەرىنە كوز جۇگىرتسەك، بۇگىنگى كۇننىڭ وزىندە سەيفۋللين، دۋلاتوۆ كوشەلەرىندەگى اۋانىڭ لاستانۋ دەڭگەيى 235 ميكروگرامعا جەتكەن.

ال سەۋلدى سەرگەلدەڭگە سالعان 118 ميكروگرام ەكەنىن تاعى دا ەستەرىڭىزگە سالايىق.