قازاقستان مۇسىلماندارى ءدىني باسقارماسى مەشىت سالۋدىڭ ارنايى ەرەجەسىن بەكىتتى. بۇل تۋرالى باس ءمۇفتي سەرىكباي قاجى وراز استانادا وتكەن القالى ماجىلىستە مالىمدەدى دەپ جازادى Qamshy.kz اقپارات اگەنتتىگى. 

قمدب عۇلامالار كەڭەسى بەكىتكەن قۇجات «قازاقستان رەسپۋبليكاسىندا تيپتىك جوباداعى مەشىت عيماراتىن سالۋدىڭ ءتارتىپ ەرەجەسى» دەپ اتالادى.

بۇل – ەلىمىز بويىنشا تيپتىك جوباداعى مەشىت عيماراتىن سالۋدىڭ ءتارتىبىن قالىپتاستىراتىن نەگىزگى قۇجات. ەرەجە ق ر «ءدىني قىزمەت جانە ءدىني بىرلەستىكتەر تۋرالى» زاڭىنا، «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى» ق ر زاڭىنا، وزگە دە نورماتيۆتىك قۇقىقتىق اكتىلەرگە، سونىمەن قاتار قمدب جارعىسىنا سايكەس ازىرلەندى.

بۇدان بىلاي مەشىت عيماراتى جەرگىلىكتى جاماعاتتىڭ سانىنا وراي 3 دەڭگەيدە سالىنادى: اۋىلدىق (سىيىمدىلىعى 70-500 ادام)، اۋداندىق (سىيىمدىلىعى 500-1500 ادام)، وبلىستىق، قالالىق (سىيىمدىلىعى 1000-5000 ادام).  

قۇجاتقا سايكەس، بولاشاقتا جاڭادان سالىناتىن مەشىتتىڭ قۇرىلىسى زاماناۋي تالاپقا ساي جۇرگىزىلۋى ءتيىس. دەمەك، اللا ءۇيىن تۇرعىزۋعا شەشىم قابىلداعان ادام عيماراتتىڭ كورىكتى بولۋىنا كوڭىل ءبولۋى شارت. مەشىت سالۋدا زاماناۋي وزىق ۇلگىلەردى، يسلامنىڭ جانە جەرگىلىكتى ساۋلەت ونەرىن پايدالانۋ مىندەتتى. مەشىتتىڭ مۇناراسى، كۇمبەزى جانە ىشكى-سىرتقى بەزەندىرىلۋى جەرگىلىكتى داستۇرگە ساي بولۋى ءتيىس.

سونىمەن قاتار، قمدب قابىلداعان قۇجات بويىنشا، ەندى مەشىت جەرگىلىكتى جاماعاتتىڭ سانىنا لايىقتاپ سالىناتىن بولادى. بۇعان قوسا مەشىت اۋلاسىنا اۆتوتۇراق، ساياباق، ت.ب. قاجەتتى نىساندار تۇرعىزىلماق. مەشىت قۇرىلىسىنا ساپالى جانە ۇزاق مەرزىمگە جارايتىن ماتەريالداردى پايدالانۋ تالاپ ەتىلەدى. قاۋىپسىزدىك شارالارىن ساقتاۋ ماقساتىندا ارنايى قۇرىلعىلار دا ورناتىلادى. 

ايتا كەتەر جايت، 2018 جىلى ەلىمىز بويىنشا 38 مەشىت پايدالانۋعا بەرىلدى. بۇگىندە رەسپۋبليكا بويىنشا 2 626 مەشىت حالىققا قىزمەت ەتۋدە.