تمد كەڭىستىگى اندا-ساندا تولقىپ قويادى. كەشە ازەربايجاندا نارازىلىق شاراسى ءوتتى. 10 مىڭداعان ادام كوشەگە شىقتى. تالاپ – بىرەۋ، بيلىكتى سىناعان بلوگەر 26 جاستاعى مەحمان گۋسەينوۆتى بوستاندىققا شىعارۋ. وسىعان قاتىستى  26 قاڭتار كۇنى ازەربايجاندار تاعى دا الاڭعا شىقپاق. بۇگىن..

بەلارۋس وپپوزيسياسى كوشەگە شىقپاسا دا، ەل پرەزيدەنتى الەكساندر لۋكاشەنكوعا تالاپ قويدى. «گرامادا» وپپوزيسيالىق دەموكراتيالىق پارتياسىنىڭ ءتوراعاسى يگور بوريسوۆ رەسەيمەن وداقتىق كەلىسىمشارتتى ءبىرجولا ءۇزۋدى تالاپ ەتتى. مۇنىڭ سەبەبى نەدە؟ وپپوزيسيا ليدەرىنىڭ ايتۋىنشا، "مۇنداي قادام ورىن العان جاعدايدا رەسەي ءبىزدى جۇتىپ قويادى".

"رەسەيمەن بىرىكسەك، تاۋەلسىزدىگىمىزدى جويامىز" دەپ جۇرگەن وپپوزيسيا ليدەرى يگور بوريسوۆ "ورىستارمەن وداقتىق كەلىسىمشارتتىڭ تۇككە كەرەگى جوق" دەپ ەسەپتەيدى.

–جەر اۋماعى جاعىنان بەلورۋسسيادان 82 ەسە ۇلكەن، حالقىنىڭ سانى جونىنەن 15 ەسە، ال جالپى ىشكى ءونىمى تۇرعىسىنان 27 ەسە ۇلكەن رەسەيمەن وداقتىق كەلىسىمشارت جاساۋ مۇمكىن ەمەس. مۇنداي جاعدايدا ءبىز ەگەمەندىگىمىز بەن تاۋەلسىزدىگىمىزدەن مۇلدە ايرىلامىز،–دەيدى «گرامادا» وپپوزيسيالىق دەموكراتيالىق پارتياسىنىڭ ءتوراعاسى يگور بوريسوۆ.

يگور بوريسوۆتىڭ پىكىرىنە سەنسەك، وداقتىق كەلىسىمشارت بەلارۋس ۇلتىنىڭ مۇددەسىنە، ەل كونستيتۋسياسىنىڭ ءبىرقاتار باپتارىنا قايشى كەلەدى. مۇنداي جاعدايدا بىرىككەن مەملەكەتتىك باسقارۋ قۇرىلىمدارىن، ءبىرىڭعاي اسكەري قارۋلى كۇشتەر مەن ورتاق ۆاليۋتا قۇرۋ مۇمكىن ەمەس.  ونىڭ ۇستىنە بەلارۋس پەن رەسەي اراسىندا داۋلى تەرريتوريالار بار. مۇنىڭ بارلىعى ءتۇيىندى كۇيىندە قالىپ وتىر. ونى دا تەزىرەك شەشۋ كەرەك، ايتپەسە، ۋكرايناداعىداي جاعداي ورىن الادى».

اقيقاتىن ايتار بولساق، ەلدىڭ ءبىرقاتار وپپوزيسيالىق بەلسەندىلەرى بەلارۋس مەملەكەتىنىڭ رەسەيمەن ەمەس، ەۋروپالىق باعىت العانىن قالاپ وتىر. ءبىراق ولار ەۋرووداققا كىرۋدى ۋكرايناداعىداي ءبىرجاقتى سيپاتتا ەمەس، ەۆوليۋسيالىق  جولمەن بىرتىندەپ شەشۋدى قاراستىرىپ جاتقان سەكىلدى.