قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ جانە قوعامدىق دامۋ ءمينيسترى دارحان قالەتايەۆتىڭ نازارىنا!
بۇگىن استانادا «تاۋەلسىزدىكتىڭ ۇرپاقتارى» اتتى جاستار جىلىنىڭ اشىلۋ سالتاناتى ءوتتى. وعان پرەزيدەنت نازاربايەۆ قاتىسىپ، ءوزىنىڭ جاڭاشىل باستامالارىن ايتتى. جاستاردىڭ الدىندا تۇرعان ماسەلەلەردى ءسوز ەتتى. تاپسىرمالار بەردى. پرەزيدەنت جالىنداپ سويلەگەن جاستاردى تىڭدادى. ءبىز دە تىڭدادىق.
بۇل فورۋمدى ۇيىمداستىرۋشى كىم؟ قوعامدىق دامۋ مينيسترلىگى جانە ونىڭ باسشىسى دارحان قالەتايەۆ. جاستار جىلىنىڭ وسىلاي جوعارى لەپپەن باستالعانى دۇرىس-اق دەلىك. ءبىراق...
پرەزيدەنتكە دەيىن سويلەگەن 13 جاستىڭ 5-ەۋى عانا فورۋمدا مەملەكەتتىك ءتىلدىڭ مارتەبەسىن اسقاقتاتتى. وسىعان قاتىستى قالەتايەۆقا سۇراق...
- جاڭادان قۇرىلعان قوعامدىق دامۋ مينيسترلىگى اتازاڭدا جازىلعان مەملەكەتتىك ءتىلدىڭ مارتەبەسىن مويىنداماي ما؟
- جاستار ءبىزدىڭ بولاشاعىمىز، ولار تاۋەلسىز ەلدىڭ ۇرپاقتارى ەمەس پە؟
- بۇگىن مەملەكەتتىك تىلدە سويلەمەگەن جاس ەرتەڭ اناسىنىڭ ءتىلىن اياقاستى ەتپەي مە؟
- ءبىر جيىندى باستان اياق قازاق تىلىندە وتكىزۋگە قالەتايەۆتىڭ قاۋقارى نەگە جەتپەدى؟
- قوعامدىق دامۋ مينيسترلىگى وسى ارەكەتى ارقىلى مەملەكەتتىك ءتىلدى مەنسىنبەيتىن جاس ۇرپاقتى تاربيەلەپ جاتقان جوق پا؟
- ءسوزدىڭ جارتىسىن قازاقشا، قالعانىن ورىس تىلىندە جالعاستىراتىن اعا بۋىننىڭ ابىرويسىز ارەكەتىن جاستارعا ادەيى جۇقتىرىپ جاتقان جوقپىز با؟
- جيىندا باسقا ۇلت وكىلدەرى دە اكسەنتسىز، قازاق تىلىندە تازا سويلەدى. ماسەلە جاستاردا ەمەس، وزىمىزدە ەكەنىن قالەتايەۆ سىندى مينيسترلەر نەگە تۇسىنبەيدى؟
- «جيىندا وتىرعان باسقا ۇلتتىڭ جاستارى ۇقپاي قالادى» دەگەن كوڭىلجىقپاستىق ارەكەتتەن قالەتايەۆ مينيسترلىگى قاشان ارىلادى؟
جاستار جىلىنا وراي تىكەلەي ەفيردەن بەرىلگەن جيىندى كورىپ وتىرىپ، وسىلاي ءارى - ءسارى ويعا قالدىق. جالىنداپ تۇرعان جاستاردى بۇگىننەن باستاپ مەملەكەتتىك ءتىلدى قادىرلەۋگە ۇيرەتپەسەك، ەرتەڭ ءتىلىڭدى مەنسىنبەيتىن تولقىن ءوزى-اق ءوسىپ شىعادى.
راس، ءبىز جيىندا جەتىستىككە جەتكەن جاستاردى ەلباسىنىڭ الدىندا ۇرانداتىپ سويلەتتىك. ال جەتىستىككە جەتە الماي جۇرگەندەردى قالەتايەۆ مينيسترلىگى قاشان قولدايدى؟
...مينيستر دارحاننىڭ دۇنيەتانىمىنا وي سالار دەگەن تۇرعىدا ءبىزدى الاڭداتقان ساۋالدار وسى ەدى.
پىكىر قالدىرۋ