مەملەكەت باسشىسى نۇرسۇلتان نازاربايەۆ استاناداعى EXPO-2017 كورمە ورتالىعىنداعى "نۇر الەم" پاۆيلونىندا ءوتىپ جاتقان جاستار جىلىنىڭ اشىلۋ سالتاناتىنا قاتىستى، دەپ حابارلايدى Qamshy.kz اقپارات اگەنتتىگى.

جاستاردىڭ جەتىستىگىن تىڭداعان نازاربايەۆ ءوز اقىلىن ايتتى. اسىرەسە، قارتتار مەن جەتىم بالالارعا قاتىستى ايتقانى جاستاردىڭ، ەرىكتىلەردىڭ جۇرەگىنە جەتتى.

"قارتتار ۇيىنە بارعاندا قابىرعام قايىسادى. بالاسىن جەتىمدەر ۇيىنە اپارۋ، اتا-اناسىن قارتتار ۇيىندە قالدىرۋ دەگەن قازاقتا بولماعان. بۇگىنگى جاستارعا ءومىر شەكسىز، بىتپەيتىندەي كورىنەدى. مەنىڭ جاسىما كەلگەندە كورەسىڭدەر. ءومىر دەگەن زۋ ەتىپ ءوتىپ كەتەدى. جاستاردىڭ جۇرەگىندە قامقورلىق بولسا... قارتتار ۇيىندەگى ءبىر اتاعا بارىپ، جاي عانا قال-جاعدايىن سۇراساڭ، سول دا جەتكىلىكتى. قۋانىپ، ريزا بولىپ، باتاسىن بەرەدى. جەتىمدى اسىراپ الساڭ، ادامعا دا، اللاعا دا جاعاسىڭ"، - دەدى ەلباسى. 

ايتا كەتەيىك، نۇرسۇلتان نازاربايەۆ جاستاردى كەشەندى قولداۋ ماقساتىندا 2019 جىلدى جاستار جىلى دەپ جاريالاعان بولاتىن. كەيىنىرەك جاستار جىلىنىڭ لوگوتيپى بەكىتىلگەن ەدى. اۆتورلار لوگوتيپتىڭ تۇستىك گامماسىنا ەرەكشە كوڭىل بولگەن. مىسالعا سارى ءتۇس - ءپوزيتيۆتى ەنەرگەتيكانى، مەرەكەنى، كۇننىڭ نۇرىن، كوگىلدىر ءتۇس - كەڭشىلدىكتى، شىعارماشىلىق الەۋەت پەن دوستىق قارىم-قاتىناستى بىلدىرەدى. كوك ءتۇس- رۋحاني تازالىق مەن كەمەلدىكتى، قىزعىلت-سارى ءتۇس - تۇراقتىلىقتىڭ، قۋانىشتىڭ، دوستىق قارىم-قاتىناستىڭ سيمۆولى دەپ بەينەلەنگەن.