توماس دجەففەرسون: "كوفە – وركەنيەتتى ەلدىڭ ەڭ سۇيىكتى سۋسىنى"،- دەگەن ەكەن. الەمدە ميلليونداعان ادامدار كۇنىنە ءبىر مارتە بولسىن، قويۋ كوفە ءىشۋدى ادەتكە اينالدىرعان. ءبىراق، ولاردىڭ كوپشىلىگى كوفەنىڭ دەنساۋلىققا پايداسىنا كۇمانمەن قاراپ جاتادى. Qamshy.kz اقپارات اگەنتتىگى وقىرمانداردى سۇيىكتى سۋسىنىنان باس تارتپاۋعا شاقىرادى. ەندەشە كوفەنىڭ دەنساۋلىققا، جالپى ءومىر سالتىنا قانشالىقتى پايداسى بار ەكەنىن بىلە ءجۇرىڭىز.

ەكىنشى ءتيپتى ديابەتتىڭ قاۋىپتىلىگىن ازايتادى

بۇل اۋرۋ ينسۋلين گارمونىنىڭ جەتىسپەۋشىلىگىنەن پايدا بولاتىن قانداعى قانت دەڭگەيىنىڭ ارتۋىمەن سيپاتتالادى. جارتى ميلليون ادام قاتىسقان 18 مەتا-تالداۋدىڭ قورىتىندىسى بويىنشا كوفە ديابەتتىڭ الدىن-الۋعا كومەكتەسەتىنى انىقتالعان. كۇنىنە 3-4 شىنى كوفە ءىشۋ اتالعان دەرتتىڭ قاۋىپتىلىگىن ازايتادى.

السگەيمەر اۋرۋىنىڭ الدىن الادى

بۇل — الەمدەگى ەڭ كەڭ تاراعان نەيرودەگەنەراتيۆتى اۋرۋ. عالىمدار وسى دەرتكە قارسى كوفەنىڭ تيىمدىلىگىن انىقتاۋ ماقساتىندا كوپتەگەن زەرتتەۋلەر جۇرگىزگەن. زەرتتەۋ قورىتىندىسى كوفە ءىشۋ وسى اۋرۋدىڭ ىقتيمالدىعىن 65%-عا ازايتاتىنىن كورسەتتى. بۇل ناتيجەگە قول جەتكىزۋ ءۇشىن كۇندەلىكتى 3-5 شىنىاياق كوفە ءىشۋ كەرەك.

باۋىر ىسىگىنىڭ قاتەرىن ازايتادى

كوفە ءبىزدىڭ باۋىرىمىزعا وتە جاقسى اسەر ەتەدى. زەرتتەۋلەر كورسەتكەندەي، كوفەنى ءجيى ىشەتىندەردىڭ 80 پايىزى باۋىر سيرروزىنا شالدىقپاعان. وسى سەبەپتەن، كوفە باۋىر وبىرىنا شالدىعۋ ءقاۋپىن دە تومەندەتەدى. 

پاركينسون اۋرۋىنا شالدىعۋ قاۋءىءپىن ازايتادى

بۇل – ەرەسەك ادامداردا بولاتىن سوزىلمالى اۋرۋ. ورتالىق جۇيكە جۇيەسىنىڭ نەمەسە ورتاڭعى ميدىڭ نەيروندارىنىڭ ءبۇلىنىپ نەمەسە ءولىپ قالۋىنان پايدا بولادى. جاڭا زەرتتەۋلەر كۇنىنە ءۇش كەسە كوفەنى ءىشۋ ارقىلى پاركينسون اۋرۋىنىڭ ءقاۋىپىن 29%-عا ازايتۋعا بولاتىنىن دالەلدەدى.

دەپرەسسيا مەن سۋيسيدقا بەيىمدىلىكتى جويادى

دەپرەسسيا – الەمدەگى ەڭ ءقاۋىپتى پسيحيكالىق اۋرۋلاردىڭ ءبىرى. زەرتتەۋ ناتيجەلەرىندە كوفەنى ءجيى ىشەتىندەردىڭ ىشىندە دەپرەسسياعا شالدىققانداردىڭ سانى وزگەلەرگە قاراعاندا 20 پايىزعا از بولعان. ال كوفە ىشكىشتەردىڭ سۋيسيدكە بارۋ ىقتيمالدىلىعى 55 پايىزعا تومەندەگەن.

كوفە ادام جاسىن ۇزارتادى

كوفە قۇرامىنداعى انتيوكسيدانتتاردىڭ اسەرىنەن اعزاداعى جاسۋشالاردىڭ قارتايۋىن باياۋلاتادى. كوفە ادام جاسىن ۇزارتىپ، قارتايعاندا بولاتىن ءارتۇرلى اۋرۋلاردىڭ الدىن الادى.

 ۇسىنعان: بالجان حالىق