تالدىقورعان وبلىستىق اۋرۋحاناسىندا ەمدەلگەن ايەلدىڭ تۋىستارى ونىڭ ولىمىنە دارىگەرلەردى كىنالاپ وتىر. "دارىگەرلەر انامىزعا باسقا توپتىڭ قانىن قۇيعاننان سوڭ جاعدايى كۇرت تومەندەپ كەتتى"، دەيدى جاقىندارى. سوراقىسى اۋرۋحاناعا ءوز اياعىمەن كەلگەن ناۋقاس ءبىر ايدان سوڭ قايتىس بولعان.

بۇل تۋرالى Qamshy.kz اقپارات اگەنتتىگى 31 ارنانىڭ دەرەگىن نەگىزگە الا وتىرىپ حابارلايدى. 

تالدىقورعاندا وبلىستىق اۋرۋحانادا دارىگەرلەر ناۋقاسقا باسقا توپتىڭ قانىن قۇيىپ جاتقانىن بىلمەگەن. ويتكەنى دارىگەرلەر 4ء-شى توپتىڭ قانى كورسەتىلدى، سول بويىنشا قان قۇيىلدى دەپ اقتالىپ وتىر. ال شىن مانىسىندە ناۋقاستىڭ قان توبى 4ء-ىنشى ەمەس، 3ء-ىنشى توپ بولىپ شىققان. ال گەموگلابينى 50ء-دى كورسەتىپ تۇرعان ناۋقاسقا باسقا توپتىڭ قانىن اۋرۋحانانىڭ دارىگەرلەرى 4 رەت قۇيعان.

«ەكى رەت قۇيعاندا ەكى بۇيرەگى ىستەن شىققان، پنيەۆمونيا بولعان. سودان 3، 4-رەت قۇيعاننان كەيىن جاعدايى مۇلدە ناشارلاعان. 4 مارتە قۇيىپ تاستاعاننان كەيىن قان توبىن انىقتاعان»، – دەيدى مارقۇمنىڭ قىزى قارلىعاش قايىپبەكوۆا.

ەڭ سوراقىسى، دارىگەرلەر ناۋقاسقا باسقا توپتاعى قان قۇيىلعانى تۋرالى ءتىس جارماعان. اينالاسى ءبىر ايدىڭ ىشىندە انارحان قىرعىزبايەۆاعا 3-توپتىڭ دا، 4-توپتىڭ دا قانىن قۇيىپ تاستاعان.

«قان توبىن دۇرىس انىقتاماعانىمىزدى مويىنداپ وتىرمىز. سونىمەن قاتار اۋىر دەرت بولعاننان كەيىن، ونى سۇيىنشىلەپ ايتپايمىز عوي. ءۇشىنشى، ءتورتىنشى رەت قان قۇيىلعاننان كەيىن بۇل اۋرۋدىڭ دامۋىن قوزدىرىپ جىبەردى دەپ ايتۋعا بولادى»، – دەيدى الماتى وبلىستىق اۋرۋحانانىڭ باس دارىگەرى مۇرات راحمەتوۆ.

ال ناۋقاستىڭ قان اۋرۋىنا شالدىققانىن بىلە تۇرا وبلىستىق اۋرۋحانانىڭ دارىگەرلەرى قان توبىن بىردەن دۇرىستاپ انىقتامادى دەپ كىنالايدى اناسىنان ايىرىلعان قىزى.

«قان اۋرۋى ەكەنىن بىلە تۇرا تەرەڭ زەرتتەۋى قاجەت ەدى. مەن دارىگەر ەمەسپىن. دەسە دە تەرەڭ زەرتتەگەن جاعدايدا، قان توبى 4ء-ىنشى ەمەس، 3ء-ىنشى توپ ەكەنى انىقتالادى. وكپەسى، بۇيرەگى، بارلىق اعزاسى ىستەن شىققانشا قينادى. انام سولاي ءولدى»، – دەيدى مارقۇمنىڭ قىزى.

قارلىعاش قايىپبەكوۆانىڭ سوزىنشە، دارىگەرلەر جالعان قۇجاتتى دا جاساپ ۇلگەرگەن. اناسىن ون كۇن بۇرىن عانا جەر قوينىنا تاپسىرعان بالالارى ەندىگى پروكۋراتۋراعا، ءتيىستى مەكەمەلەرگە ارىزدارىن ۇلگەردى. قايعىدان قان جۇتقان وتباسى ەلىمىزدىڭ باس پروكۋراتۋراسى ءدال وسى ءىستى باقىلاۋىنا السا دەيدى.

ۇسىنعان: اسەل بولات قىزى