كەشە Nur.kz پورتالىندا "قازاقستان ۋكرايناعا 1 ملن ەۆرو كومەك رەتىندە بەرەدى" دەگەن ماقالا جارىق كورگەن بولاتىن. ماقالا اۆتورىنىڭ سوزىنە سۇيەنسەك، جاقىندا قازاقستان ۇكىمەتى "ۋكرىتيە" چەرنوبلدىق قورىنا قارجىلاي كومەك رەتىندە جانە ۋكرايناعا قولداۋ ءبىلدىرۋ ماقساتىندا 1 ملن. ەۆرو اۋدارۋ تۋرالى شەشىمگە كەلگەن. بۇل تۋرالى ق ر ەكونوميكالىق ينتەگراسيالىق ىستەرى ءمينيسترى جانار ايتجانوۆا مالىمدەگەن. الايدا بۇگىن بەلگىلى سايت رەداكسياسى بەلگىسىز سەبەپتەرمەن اتالمىش ماقالانى الىپ تاستاعان. جاقسى، ول جاعىن قازبالاپ جاتۋدىڭ قاجەتى شامالى. ءبىراق، ايتا كەتەتىنى، قازاقستان ءدال وسى چەرنوبل قورىنا 2011 جىلى 2 ملن.ەۆرو كومەك رەتىندە اۋدارعان بولاتىن.
ەندى وسىنىڭ بارلىعىن ءبىر ەلەكتەن وتكىزىپ كورەيىك. وسى ۋاقىتقا دەيىن تاۋەلسىز قازاقستان كىمگە، نە بەرمەدى؟! "ءوزىم جەمەسەم دە، سەن جە"، دەيتىن قازاقپىز عوي.
سوڭعى 15 جىلدا ءبىزدىڭ رەسپۋبليكا 13 مەملەكەتكە گۋمانيتارلىق كومەك رەتىندە قارجى بەرگەن، تاماق، ازىق-تۇلىك، دارى-دارمەك ت.ب. سوندىقتان بولار، قازاقستاندى الەمنىڭ كوپتەگەن مەملەكەتتەرى ناعىز "دوس" حالىق دەپ تانيدى. ءبىزدىڭ ۇكىمەت وسى ماقساتقا مەملەكەتتىڭ قازىناسىنان بارلىعى 29 ميلليون تەڭگە، 1 ملرد. استام دوللار جانە 1،7 ميلليون ەۆرو شىعىن شىعارعان.
- مىڭداعان اۋعان بالالارى ءبىزدىڭ ەلدە وقىپ، ستۋدەنتتەر ءبىزدىڭ جوو-دا، ءبىزدىڭ قارجىعا جوعارعى ءبىلىم الۋدا. ءتىپتى، ۇكىمەتتە وسى ماقساتتا 50 ميلليون دوللار ءبولۋ دە كوزدەلگەن. جاقسى، بۇل سوعىستان كوز اشپاي كەلە جاتقان ەلگە جاساعان جاقسىلىعىمىز شىعار. مىسالى، 2014 جىلى ق ر ۇكىمەتى اۋعانىستانعا گۋمانيتارلىق كومەك رەتىندە 2 ميلليون دوللار بەرگەن.
- 2013 جىلى قازاقستان، گۆاتەمالە جانە شري-لانكا رەسپۋبليكالارىنا 1 ملن. دوللاردىڭ كولەمىندە ماتەريالدىق جاردەم بەرگەن.
- 2008 جىلى 12 مامىر كۇنگى قىتايدىڭ سىچۋان پروۆينسياسىندا بولعان قاتتى جەر سىلكىنىسىنەن زارداپ شەككەندەرگە گۋمانيتارلىق كومەك رەتىندە قازاقستان 2،6 ملن. دوللار اۋدارعان.
- 2008 جىلى قازاقستاننىڭ گۋمانيتارلىق جاردەمىن شالعاي جاتقان گايتي بيلىگى العان بولاتىن. ءدال وسى جىلى قاتتى جەر سىلكىنىسىنەن ەلدىڭ استاناسى پورت-و-پرەنس قالاسى تۇگەل قيراپ قالعان جانە 270 مىڭداي ادام قازا بولعان. وسى كەزدە قازاقستان بيلىگى توتەنشە جينالىس جاساپ، 100 مىڭ دوللاردىڭ ازىق-تۇلىگىن جىبەرگەن.
- يتالياداعى تابيعي اپات سالدارىنان قيراپ قالعان ەجەلگى مادەني مۇرالاردى قايتا قالپىنا كەلتىرۋگە اتسالىسۋ ماقساتىندا قازاقستان "كيەلى بيادجو" مۇراجايىنىڭ قۇرىلىسىنا 1 ملن 700 مىڭ ەۆرونى مەملەكەت قازىناسىنان بولگەن بولاتىن.
- قازاقستان سونداي-اق، الەمنىڭ بىرنەشە مەملەكەتىندەگى تاريحي ەسكەرتكىشتەردى قايتا قالپىنا كەلتىرۋ، ساقتاۋ ءىش-شارالارىنا بەلسەندى ارالاسىپ كەلەدى. مىسالى، ەگيپەتتەگى سۇلتان بەيبارىس مەشىتىنىڭ ريەۆتاۆراسيالىق جۇمىستارىنا 4،5 ملن دوللار بولگەن.
- داماسكىدەگى سۇلتان ءاز-زاريحا ماۆزولەيىنىڭ جۇمىسىنا 54،2 ملن تەڭگە بولىنگەن.
- تاعى 29،6 ملن تەڭگە سيرياداعى ءال-فارابي تاريحي-مادەني ورتالىعى مەن ماۆزولەيىنىڭ رەستاۆراسيالىق جۇمىستارىنا بولىنگەن.
- كورشى قىرعىزدار دا قازاقستاننىڭ اشىققولدىلىعىنان قۇرالاقان قالمادى. پرەزيدەنت نۇرسۇلتان نازاربايەۆ قىرعىزستانعا ەكونوميكالىق كومەك رەتىندە باقانداي 100 ملن دوللاردى سىيعا تارتتى. اتالاپ كەلگەن اتامبايەۆ نۇراعا بەرگەن 100 ميلليوندى قالتاسىنا باسىپ، العىسىن جاۋدىرىپ كەتتى. ءيا، 2014 جىلى بولدى.
- رەسەيدىڭ بلاگوۆەششەنسكا قالاسىندا تاسقىن جۇرگەندە قازاقستان تاراپى دوستىق كومەك رەتىندە 240 ورىندىق بالاباقشا سالىپ بەرگەن بولاتىن. اتالمىش بالاباقشا قۇرىلىسىنا مەملەكەت قازىناسىنان 379،3 ملن تەڭگە بولىنگەن بولاتىن.
سونداي-اق، قازاقستان سوڭعى ون بەس جىلدا گرۋزيا، تاجىكستان، تۇركيا، سومالي، ليۆيا، جاپونياعا دا قارجىلار جانە مارتيالدىق كومەك قولىن سوزعان. سوندىقتان بولار، الەم ەلدەرى قازاقستاندى ورتالىق ازياداعى ءىرى دونورلىق ەلگە تەڭەيدى. تەڭەمەي ءقايتسىن؟ وسى كەزەڭگە دەيىن قازاقستان بۇۇ-نىڭ ءتۇرلى اگەنتتىكتەرىنە كومەك رەتىندە 2006 جىلى 275 مىڭ دوللار بولگەن بولسا، ءازىربايجان 60 مىڭ، ارمەنيا 30 مىڭ، تاجىكستان 4000، گرۋزيا 2000 دوللار عانا بەرىپتى. ءتىپتى، قازاقستاننىڭ بۇۇ-نا بەرىپ وتىراتىن كومەك سوماسى ارتپاسا، كەمىمەگەن. بۇگىندە بۇل كورسەتكىش 1 ملن دوللارعا شامالاس.
مىنە، وزگە ءۇشىن ءبىز كەڭبىز، جومارتپىز، بايمىز. ال ءوزىمىز ءۇشىن شە؟
نۇرگەلدى ءابدىعاني ۇلى
