بۇگىن «قازپوشتا» اق باسقارما ءتوراعاسى ساكەن سارسەنوۆ كومپانيانىڭ بىلتىرعى جىلعى جەتىستىكتەرى مەن بيىلعى جوسپارلارى تۋرالى باياندادى. مالىمدەمە «سامۇرىق-قازىنا» ۇلتتىق ءال-اۋقات قورى» اق-نىڭ باسپا ءسوز كونفەرەنسياسىندا ءوتتى.

2018 جىل ۇلتتىق پوشتا وپەراتورى ءۇشىن وتە تابىستى جىل بولدى. اتاپ ايتقاندا، كىرىس كولەمى 11 پايىزعا ءوسىپ، تازا پايدا - 272 ملن. تەڭگە قۇرادى. وسى رەتتە، جاڭا تەحنولوگيالاردىڭ دا الار ورنى زور. نەگە دەسەڭىز، ۇشقىشسىز ۇشاقتار پوشتا جەتكىزىلىمىن 10 ەسەگە ارتتىرىپتى.

«2018 جىلى «قازپوشتا» ۇشقىشسىز ۇشاقتارمەن پوشتانىڭ جەتكىزىلىمىنىڭ 10 ەسە ارتتىردى. وتكەن جىلى دروندار كومەگىمەن 11 000 كگ مەرزىمدىك بىسىلىم تاسىمالداندى. باسپا باسىلىمدىرىن اۋىلدارعا جەتكىزۋ كەزىندە دروندار  460 ساعات ىشىندە 74 مىڭ كم ۇشىپ ءوتتى. بۇل جوبا الماتى، جامبىل، قاراعاندى، تۇركىستان، شىعىس قازاقستان، قوستاناي وبلىستارىنداعى 150 ەلدى مەكەندى قامتيدى. 4 كگ-عا دەيىن جۇك كوتەرە الاتىن 20 درون ىسكە قوسىلدى»، – دەيدى س. سارسەنوۆ. 

سونداي-اق، كومپانيا «سيفرلىق قازاقستان» مەملەكەتتىك باعدارلاماسىن ىسكە اسىرۋ اياسىندا ءبىرقاتار جۇمىستار اتقارىپ جاتىر. ماسەلەن، 2018 جىلى سيفرلىق وفيستەردىڭ قىزمەتتەرىن 22 400-دەن استام ادام پايدالانعان. بۇعان قوسا، ۇلتتىق پوشتا وپەراتورىنىڭ كومەگىمەن 763 مىڭ 524 قازاقستاندىق سيفرلىق ساۋاتتىلىق كۋرسىنان وتكەن.

كومپانيا ەل تۇرعىندارىنا ساپالى قىزمەت كورسەتۋ ماقساتىندا جاقىندا ەسەپكە الۋ پوشتا جۇيەسىن ىسكە قوستى ءارى 160 فرانچايزي كاسىپكەرلەرىن سەرىكتەستىككە تارتتى.

«2018 جىلى «قازپوشتا» اق post.kz ونلاين-قىزمەتتەرىنىڭ گيپەرماركەتىن دامىتۋعا جەكە نازار اۋداردى. پورتالداعى جەكە تۇلعالار ءۇشىن پيك، بالاباقشالار، كولىك جانە الەۋمەتتىك كارتالار نەمەسە كەز-كەلگەن باسقا بۇقارالىق قىزمەتتەر سياقتى 6 مىڭ ءتۇرلى قىزمەت تۇرلەرىن  تولەۋ مۇمكىندىگى ىسكە قوسىلدى. ناتيجەسى - كۇنىنە 500-1000 جاڭا تىركەلىم جانە بۇگىنگى كۇنى پورتالدىڭ 620 مىڭ بىرەگەي پايدالانۋشىسى بار. ۇلتتىق كومپانيانىڭ 60 مىڭ كليەنتى كۇندەلىكتى پورتالدى، ال 21 مىڭ كليەنتى موبيلدىك قوسىمشانى پايدالانادى»، – دەپ اتاپ ءوتتى باسقارما ءتوراعاسى.

ال پوشتا وپەراتورىنىڭ 2019 جىلعا ارنالعان جوسپارلارى دا از ەمەس. ءىرى جوبالاردى ىسكە اسىرۋ مەن كوپ ناتيجەلەرگە قول جەتكىزۋ كوزدەلىپ وتىر. ماسەلەن، «قورعاس» شىحو-داعى كەدەن قويماسى اشىلماق. قىتايدان ەۋروپاعا جانە ورتالىق ازياعا پوشتالىق جونەلتىلىمدەردىڭ ترانزيتىنە دە كوپ كوڭىل بولىنبەك. بۇدان بولەك، ەلەكتروندىق كوممەرسيا مەن فرانچايزينگتىق جەلىسى دامي تۇسەدى. وسىلايشا، سيفرلىق جوبالاردى دامىتۋ سىندى باعىتتار كۇن تارتىبىندە بولماق.

ايتا كەتەرلىگى، قازپوشتانىڭ سيفرلىق تەحنولوگيالاردى قولدانىپ، بارلىق پروسەستەردى اۆتوماتتاندىرۋىنىڭ ناتيجەسىندە 2018 جىلى جەتكىزىلىم ۋاقىتى 10-نان 6 كۇنگە دەيىن قىسقاردى. ال بۇل كورسەتكىش 2019 جىلى نەبارى 3 كۇندى قۇرايتىن بولادى.

بيىل جۇزەگە اساتىن جاعىمدى جاڭالىق رەتىندە 15ء-شى ساۋىردە شىمكەنت قالاسىندا اشىلاتىن العاشقى ە-commerce ورتالىعىن ايتساق بولادى. بۇعان قوسا، تۇركىستان وبلىسىندا تاعى دا فۋلفيلمەنت-ورتالىعى اشىلىپ، ول وزبەكستانمەن جۇك تاسىمالداۋ كولەمىن ۇلعايتۋعا اتسالىساتىن بولادى.