ق ر مادەنيەت جانە سپورت مينيسترلىگىنە قاراستى «ازىرەت سۇلتان» مەملەكەتتىك تاريحي-مادەني قورىق-مۋزەيى ۇلىستىڭ ۇلى كۇنى - ناۋرىز مەرەكەسىن ەرەكشە فورماتتا اتاپ ءوتتى. قوجا احمەت ياساۋي كەسەنەسىنە كەلۋشىلەرگە باۋىرساق جانە 500 ليتر ناۋرىز كوجە دايىنداپ تاراتقان قورىق-مۋزەي ۇجىمى اتا-بابا ءارۋاعىنا ارناپ قۇران باعىشتادى. جەتى ءتۇرلى تاعامنان دايىندالعان بەرەكە مەن مولشىلىقتىڭ سيمۆولى سانالاتىن كوجەدەن گەرمانيا، وزبەكستان ەلدەرىنەن كەلگەن تۋريستەر مەن ەلىمىزدىڭ تۇكپىر-تۇكپىرىنەن كەلگەن زياراتشىلار ءدام تاتىپ، العىستارىن ءبىلدىردى، دەپ جازادى Qamshy.kz اقپارات اگەنتتىگى.

-«حاندارىمىز بەن بيلەرىمىز جاتقان قاسيەتتى جەردە ناۋرىزدىڭ ەرەكشە لەبى سەزىلەدى. قۇران باعىشتاپ كەلگەن ءبىز ارنايى ۇسىنىلعان ناۋرىزكوجەدەن ءدام تاتىپ، اللانىڭ نەسىبەسى جاۋىپ جاتقانداي سەزىمگە بولەندىك. ەلىمىز امان، جۇرتىمىز توقشىلىقتا بولسىن. گۇلدەنىپ كەلە جاتقان تۇركىستاننىڭ تامىرى تەرەڭدەي بەرسىن. بارشاڭىزدى ۇلىستىڭ ۇلى كۇنىمەن قۇتتىقتاي وتىرىپ، ءوز العىسىمدى بىلدىرەمىن!»،-دەدى  الماتى قالاسىنان كەلگەن زاريپا قىدىروۆا.

مەرەكەلىك شارا كەسەنە اۋماعىنداعى ارداگەرلەر ساياباعىندا جالعاسىن تاپتى.  اتالار مەن اجەلەر بىر-بىرىمەن كورىسىپ، ناۋرىز مەرەكەسىمەن قۇتتىقتاسا، اق تۇيەگە مىنگەن قىدىر اتا اق باتاسىن بەرىپ، ەلىمىزگە اماندىق، جۇرتىمىزعا تىنىشتىق تىلەدى.

جۋىردا عانا ق ر مادەنيەت جانە سپورت ءمينيسترى ارىستانبەك مۇحامەدي ۇلى: «ەندى زامان تالابىنا ساي ناۋرىزدىڭ فورماتىن تۇبەگەيلى وزگەرتۋ قاجەت. ناۋرىزدىڭ ايرىقشا تالىم-تاربيە، قادىر-قاسيەت بەرەتىن تۇرلەرى وتە ەرەكشە. سوندىقتان، ناۋرىز مەيرامىنا جاڭا رەڭك بەرۋ ءۇشىن، ادامنىڭ ۇلتىنا، ءدىني باعىنىستىلىعىنا قاراماستان، ادامگەرشىلىك قۇندىلىقتارعا ءمان بەرە وتىرىپ، قازاقستان حالقى تۇگەل قامتىلاتىنداي مازمۇنىن جاساۋ كەرەك»،- دەپ، ناۋرىز مەيرامىن جاڭاشا اتاپ ءوتۋدىڭ جولىن كورسەتكەنى بەلگىلى.

وسى ورايدا، مەرەكەلەۋدىڭ جاڭا قىرىنا باسا ءمان بەرگەن قورىق-مۋزەي ۇجىمى ەلباسى نۇرسۇلتان ءابىش ۇلى نازاربايەۆتىڭ «ۇلى دالانىڭ جەتى قىرى» ماقالاسىنا وراي «اڭ ءستيلى» اتتى ۇلتتىق كيىم ءسان ۇلگىلەرىن، تازى جۇگىرتىپ، قىران باپتاعان قازاق ساياتشىلارىنىڭ شەرۋىن ۇيىمداستىرسا، ۇلتتىق اسپاپتارمەن قازاقتىڭ حالىق اندەرى ورىندالىپ، جازبا اقىنداردىڭ تۇركىستان جانە ياساۋي تاقىرىبىنداعى ءوز شىعارماشىلىقتارى ەل ىقىلاسىنا بولەندى.

سونداي-اق، بەلگىلى ايتىسكەر اقىن بەكارىس شويبەكوۆ پەن ونىڭ شاكىرتى تۇرار تىلەۋلييەۆتىڭ «ناۋرىز» ايتىسى جىر سۇيەر كورەرمەنگە ەرەكشە سەرپىلىس سىيلادى. ايتىس بارىسىندا حانداردىڭ ەسىمدەرى، باتىرلاردىڭ داڭقى، بي-شەشەندەردىڭ ابىرويى مەن سۇلتانداردىڭ سارا جولى ولەڭ بولىپ ءورىلىپ، حالىقتىڭ زور قوشەمەتىنە بولەندى.

مەرەكەلىك جيىن بارىسىندا شاراعا قاتىسقان اجەلەرگە اق ورامال جابىلىپ، بالالارعا ارنايى سىيلىقتار بەرىلدى.

سونىمەن قاتار،  «تۇساۋ كەسەر» ءراسىمى جاسالىپ، ءۇش ءسابيدىڭ تۇساۋى كەسىلدى. مە،رەكەلىك جيىن ۇلتتىق سپورت ويىندارىنا ۇلاستى. جەڭىمپازدارعا ارنايى سىي-سياپاتتار بەرىلدى.

ۇسىنعان: نازەركە لابيحان