"تاقتا وتىرعان كەزدە جاقسىلىعىن جىرلاساق "جاعىمپازسىڭ" دەپ تىلدەۋشىلەر تابىلا كەتۋشى ەدى، ورىنىن بوساتتى عوي ەندى ايتا بەرسەك ايىپ جوق شىعار...
مەن بىلەتىن ەلباسىنىڭ جەتى قىرى.
بىرىنشىدەن: شەكاراڭدى شەگەندەپ تۇرىپ بەكىتتى مە، بەكىتتى. ءبىز تۇگىلى الپاۋىت يمپەريالار جۇڭگو مەن رەسەيدىڭ اراسىنداعى شەكارالار تولىق بەكىمەگەنىن ەسكەرسەك، ەلباسىمىزدىڭ بۇل ەڭبەگىنىڭ ولشەمى جوق دەۋگە بولادى.
ەكىنشىدەن: ابىلاي ارمانداعان استاناڭدى سالدى ما، سالدى. سالعاندا قانداي عىپ سالدى دەسەيشى؟... سەگىز سوتتىق جەرىمىزدىڭ قاي جەرىنە نە سالارىمىزدى بىلمەي، رەتىن كەلتىرىپ يگەرە الماي باسىمىز قاتىپ جۇرگەندە، سارىارقانىڭ قاق تورىنەن بەس قۇرلىققا ۇيالماي كورسەتە الاتىنداي عاجايىپ شاھار سالىپ بەردى.
ۇشىنشىدەن: قازاق-قازاق بولعالى بەسىنشى پارىزىن (قاجىلىعىن) وتەگەن العاشقى حانىمىز وسى كىسى. كەرەي مەن جانىبەكتەن بەرى قاراي 550 جىلىمىزدا ەل بيلەگەن قىرىققا جۋىق حاندارىمىز بەن بەكتەرىمىزدىڭ بىردە-بىرى قاجىلىق پارىزىن وتەي الماپتى. وتەمەيىن دەگەن جوق، الاساپىران زامانداردا ەلدى تاستاپ كەتەتىندەي مۇمكىنشىلىكتەرى بولمادى. سول حاندار مەن سۇلتاندارىمىزدىڭ ارمانىنا نۇر سۇلتان جەتتى.
تورتىنشىدەن: وتىز جىل بيلىك قۇرىپ، ەلىن سوعىسسىز باسقارعان جالعىز پاتشا دا وسى كىسى ەكەن. تاعى دا تاريحقا قاراڭىزدار. وتىز-قىرىق جىل ەل بيلەگەن حاق نازار، ءاز تاۋكە سىندى ايبارلى حاندارىمىز بولمادى ەمەس -بولدى. ءبىراق ولاردىڭ زاماندارى جاۋگەرشىلىكپەن، كەڭ بايتاق دالامىزدى قالاي قورعاپ قالساق دەگەن الاساپىران قان مايداندارمەن ءوتتى. اللا تاعالا قالاي دەگەندە دە نۇرسۇلتاننىڭ پاتشالىق ءداۋىرىن سوعىستان ادا، بەيبىت تە بەرەكەلى ەتتى.
بەسىنشىدەن: قازاق دالاسىنداعى يسلامنىڭ تۋى، يماننىڭ نۇرى بولعان مەشىتتەرىمىزدى كوبەيتتى. تاۋەلسىزدىك العان تۇستا ەلىمىز بويىنشا نەبارى 40-شاقتى مەشىت قانا جۇمىس ىستەپ تۇرعان بولسا، 25 جىلدا سول مەشىتتەرىمىزدىڭ سانى ەكى جارىم مىڭعا جۋىقتادى. بۇل دەگەنىمىز رەكوردتىق كورسەتكىش. ءتىپتى پاتشالىق ءداۋىرىنىڭ ەڭ سوڭعى ءىسى دە تمد مەن ورتالىق ازياداعى تەڭدەسى جوق مەشىتتىڭ ىرگەتاسىن قالاۋ بولدى.
التىنشىدان: قازاقتىڭ قارا دومالىق بالالارىن الەمنىڭ ەڭ وزىق دەگەن وقۋ ورىندارىندا ءبىلىم العىزىپ، وزا شاپقاندارىن ەل ىسىنە ارالاستىرىپ كەتتى. بۇل تۇسىنگەن ادامعا تاۋەلسىزدىكتىڭ ەڭ ءتاتتى جەمىستەرىنىڭ ءبىرى دەسە دە بولادى.
جەتىنشىدەن: قازاق تاريحىنداعى حان تاعىن ءوز ەركىمەن بوساتقان العاشقى حانىمىز دا وسى نۇرسۇلتان. تاريحتا ەشبىر حان-سۇلتاندارىمىز اجالى جەتپەيىنشە تاعىنان كەتپەگەنى بارىمىزگە ايان. ەندەشە ەل ءۇشىن تۋعان ەسىل ەردىڭ جاساعان شەشىمىن اللا تاعالا ەكى دۇنيەمىز ءۇشىن قايىرلى قىلعاي، ءامين."
اقىن، "دارىن" مەملەكەتتىك جاستار سىيلىعىنىڭ لاۋرەاتى
♦ءبىرجان بايتۋوۆتىڭ فەيسبۋكتەگى پاراقشاسىنان الىنعان
ۇسىنعان: ماقپال سەمباي
پىكىر قالدىرۋ