ۆلاديمير پۋتين نۇرسۇلتان نازاربايەۆقا جەمىستى ىنتىماقتاستىق ءۇشىن العىسىن ءبىلدىرىپ، ساتتىلىك تىلەدى، دەپ جازادى Qamshy.kz اقپارات اگەنتتىگى  Sputnik قازاقستان سايتىنىڭ دەرەگىنە سۇيەنىپ.

رەسەي پرەزيدەنتى ۆلاديمير پۋتين نۇرسۇلتان نازاربايەۆتىڭ پرەزيدەنتتىك وكىلەتتىگىن توقتاتۋ تۋرالى شەشىمىنە قاتىستى ويىن بۇگىن رف ۇكىمەتىنىڭ كەزەكتى وتىرىسىن اشۋ كەزىندە ايتتى.

"مۇراگەرلىك جاعىنان ماسەلە تۋىندامايدى دەپ ۇمىتتەنەمىز. قالاي دەگەنمەن دە، نازاربايەۆ جوعارى قىزمەتىن تاستاپ كەتىپ بارادى، سوندىقتان وعان ءوزارا ىنتىماقتاستىق ءۇشىن العىس ايتىپ، ساتتىلىك تىلەۋىمىزگە ابدەن نەگىز بار"، - دەدى پۋتين.

بۇل مالىمدەمەنى جينالعاندار ماقۇلداپ، دۋ قول شاپالاق سوقتى.

بۇدان بولەك، ول قازاقستانمەن اراداعى ىنتىماقتاستىقتى جوعارى دەڭگەيدە قولداۋ ءۇشىن رەسەي جاعى بارىن سالىپ، اتسالىساتىنىن اتاپ ءوتتى.

ايتا كەتسەك، 19 ناۋرىزدا قازاقستاننىڭ تۇڭعىش پرەزيدەنتى نۇرسۇلتان نازاربايەۆ حالقىنا جاساعان ۇندەۋىندە مەملەكەت باسشىسى رەتىندە وكىلەتتىگىن مەرزىمىنەن بۇرىن توقتاتىنىن مالىمدەدى.

ۇسىنعان: نازەركە لابيحان