دەپۋتاتتار كونستيتۋسياعا ەلوردانىڭ اتاۋىن وزگەرتۋ تۋرالى تۇزەتۋ ەنگىزدى، دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىنە سۇيەنىپ.

ءۇش جىل بۇرىن قازاقستاننىڭ تۇڭعىش پرەزيدەنتى نۇرسۇلتان نازاربايەۆ ەلورداعا ءوزىنىڭ ەسىمىن بەرۋ تۋرالى ۇسىنىستان باس تارتتى.

2016 جىلدىڭ قاراشا ايىندا پارلامەنت دەپۋتاتتارى استانانى نۇرسۇلتان دەپ اتاۋ باستاماسىن كوتەرگەن بولاتىن.

"بۇل تۋرالى تالاي ايتقانمىن. مەن ايتقىزىپ وتىر دەپ ويلايتىن شىعارسىزدار. نۇر، نۇرلى دەپ جازىپ جاتىر. كەشە پارلامەنت استانانى مەنىڭ اتىممەن اتاۋدى ۇسىندى. ءوز باسىم مۇنداي باستاما كوتەرگەن دە، ايتقان دا ەمەسپىن"، - دەدى ەلباسى وسىدان ءۇش جىل بۇرىن.

سول كەزدە نۇرسۇلتان نازاربايەۆ وزىنە رەفورما جۇرگىزۋگە كومەكتەسكەن ارىپتەستەرى مەن جاقتاستارىنا العىسىن بىلدىرگەن ەدى.

"ادام رەتىندە ريزا بولدىم. پارلامەنت – بيلىكتىڭ جەكە تارماعى. ولاردىڭ شەشىم قابىلداۋعا، پىكىرىن بىلدىرۋگە قۇقىعى بار. قالالاردىڭ، ەلدى مەكەندەردىڭ اتاۋىن وزگەرتۋدى جانە تاعى باسقا كەز كەلگەن ماسەلەنى ءبارىمىز اقىلداسىپ، مەملەكەت ءۇشىن، ەل ءۇشىن نە ماڭىزدى دەگەن كوزقاراس تۇرعىسىنان قاراستىرىپ، شەشىم قابىلدايمىز"، - دەپ ەلباسى استانا اتاۋىن نازاربايەۆ دەپ وزگەرتۋگە قارسىلىق ءبىلدىردى.

بۇدان بۇرىن استانا قالاسىنا قازاقستاننىڭ تۇڭعىش پرەزيدەنتىنىڭ ەسىمىن بەرۋ تۋرالى ۇسىنىس قازاقستان تاۋەلسىزدىگىنىڭ 25 جىلدىعىنا وراي دەكلاراسيا قابىلداۋ بويىنشا وتكەن پارلامەنت پالاتالارىنىڭ بىرلەسكەن وتىرىسى كەزىندە جاسالعان بولاتىن.

ايتا كەتسەك، بۇگىن 20 ناۋرىزدا وتكەن بىرلەسكەن وتىرىستا پارلامەنت مۇشەلەرى ءبىراۋىزدان قابىلداعان قازاقستان كونستيتۋسياسىنا ەنگىزىلەتىن تۇزەتۋلەرگە سايكەس ەلوردا اتاۋىن وزگەرتۋ رەفەرەندۋمسىز جۇرگىزىلەتىن بولدى.

نۇرسۇلتان نازاربايەۆتىڭ قۇرمەتىنە استانادا ءبىرقاتار نىساندار اتالعان. حالىقارالىق اۋەجايعا نۇرسۇلتان نازاربايەۆتىڭ ەسىمى بەرىلگەن، 2017 جىلى الماتىداعى بۇرىنعى فۋرمانوۆ كوشەسىنىڭ اتاۋى دا نازاربايەۆ داڭعىلى بولىپ وزگەرتىلدى.

ۇسىنعان: نازەركە لابيحان