ۋكرايناداعى سايلاۋدا ۆلاديمير زەلەنسكيي 30،6 پايىز داۋىس الىپ، ءبىرىنشى ورىنعا شىقتى. ودان كەيىنگى ورىنداردا پەتر پوروشەنكو ، — 17،8، تيموشەنكو — 14،2، بويكو — 9،8 پايىزبەن حالىقتىڭ قولداۋىنا يە بولدى. سونىمەن، ۋكراينادا ءبىر ايدان كەيىن پرەزيدەنتتىك سايلاۋدىڭ ەكىنشى تۋرى وتەدى. شوۋمەن، ارتيست ۆلاديمير زەلەنسكيي مەن قازىرگى پرەزيدەنت پەتر پوروشەنكو ەكىنشى تۋردا باقتارىن سىنايتىن بولادى. سونىمەن كىمنىڭ مۇمكىندىگى جوعارى، پوروشەنكونىڭ بە، اكتەر زەلەنسكييدىڭ بە؟ ەندى ونى بىرەر ايدان سوڭ بىلەتىن بولامىز. دەسەك تە، قازىرگى پرەزيدەنت پوروشەنكو نەگە از داۋىس الىپ قالدى؟ سەبەبى نەدە؟

1. بىرىنشىدەن پوروشەنكو ءوزى باسقارعان ۋاقىتتا مەملەكەتتە سوڭعى بەس جىلدا تىنىشتىق بولعان جوق.
2. پوروشەنكونىڭ ماڭايىنداعىلار بايۋ ۇستىنە بايي ءتۇستى.
3. ەلدىڭ شىعىسىنداعى سوعىستىڭ سالدارىنان مىڭداعان ادام وپات بولدى.
4. حالىقتىڭ تۇرمىستىق جاعدايى قيىندادى.
5. ەكونوميكا السىرەدى.
6. ەلدىڭ سىرتقى قارىزى كۇرت ارتتى.
7. ۋكراينا قارىز العان الپاۋىت مەملەكەتتەرگە كىرىپتار بولا باستادى.
8. حالىقتىڭ پوروشەنكو كومانداسىنا سەنىمى ازايدى.
9. ەلدە ىشكى ساياسي تەكەتىرەس ءورشىدى.

ال ءبىرىنشى تۋردىڭ وزىندە قازىرگى پرەزيدەنت پوروشەنكودان ەكى ەسە ارتىق داۋىس جيناعان زەلەنسكييدى  حالىق نەگە كوبىرەك قولدادى؟ ونىڭ بىرنەشە سەبەپتەرى بار.

1. ول حالىقتىڭ اراسىنان شىققان قاراپايىم ادام.
2. مەملەكەت باسقارۋ ىسىنەن ادا بولعانىمەن، تانىمال تازا تۇلعا.
3. ءوز ويىن اشىق ايتادى.
4. "دونباسس ايماعىنداعى سوعىستى رەتتەۋ ءۇشىن رەسەيمەن تىكەلەي كەلىسسوز جاساۋ قاجەت" دەپ ەسەپتەيدى.
5. ول "بۇگىنگى بيلىك حالىقتىڭ جاعدايىن جاقسارتۋدىڭ ورنىنا جاعدايدى ۋشىقتىرىپ جىبەردى» دەپ ەسەپتەيدى.
6. حالىققا دا بۇرىن بيلىكتە بولماعان تازا، وسىنداي قاراپايىم ادام كەرەك بولدى.
7. سوندىقتان زەلەنسكيي جاستارعا، قارا بۇقاراعا سەنىم ارتتى.
8. ول سەنىمى ءسويتىپ اقتالدى جانە ءبىرىنشى تۋردا پەتر پوروشەنكودان ەكى ەسە ارتىق داۋىس جينادى.
9. زەلەنسكيي ەلدەگى جاعدايدى ۋشىقتىرىپ جىبەرگەنى ءۇشىن بۇگىنگى ەل باسقارىپ وتىرعاندار حالىقتىڭ الدىندا قارالانىپ، ولاردىڭ بىرەۋى سوتتالۋى ءتيىس دەپ ەسەپتەيدى (پەتر پوروشەنكو بولار).
10. پەتر پوروشەنكو قىرىمنان ايرىلىپ قالدى. دونباستاعى جاعداي رەتتەلمەدى.

مىنە اتالعان سەبەپتەر پرەزيدەنتتىككە كانديداتتاردىڭ اراسالماعىن الشاقتاتا ءتۇستى. ال ەكىنشى تۋردا پوروشەنكو مەن زەلەنسكييدىڭ قايسىسى جەڭەدى؟ ۋكراينادا ودەسسا وبلىسىن باسقارىپ، ارتىنان پوروشەنكونىڭ پارمەنىمەن ەلدەن قۋىلعان ميحايل ساكااشۆيليدىڭ ويىنشا،  ەكىنشى تۋردا ۆلاديمير زەلەنسكيي پرەزيدەنت بولادى. ەگەر مۇمكىندىك بولسا، ول ۋكرايناعا كەلىپ، زەلەنسكييگە  قولداۋ كورسەتەتىن ءمالىم ەتتى.

–شىن مانىندە ۆلاديمير زەلەنسكيي – ءوز ەلىنىڭ پاتريوتى. ول ەشنارسەنى بۇگىپ قالمايدى. ويىن اشىق ايتادى. حالىققا وتە جاقىن. ەشقانداي كلاندىق توپتارمەن ارالاسپايدى جانە ولاردىڭ مۇددەسىن كوزدەمەيدى. بۇعان دەيىن اينالاسىنا ادامدار دا جيناعان جوق. دەمەك حالىقتى دا ۇياتقا قالدىرمايدى. ەلدەگى حالىقتىڭ جاعدايىن تيتىقتاتقان پوروشەنكونىڭ ساياساتىنان كەيىن 5 ميلليون ۋكرايندىق شەتەلگە كەتتى. زەلەنسكيي جاعدايدى جاقسارتىپ، ولاردىڭ ءبارىن ەلگە قايتارامىن دەپ وتىر. زەلەنسكييدىڭ مەملەكەت باسقارۋ ىسىندە تاجىريبەسى جوق بولعانىنىڭ ءوزى جاقسى. ول سوندىقتان اينالاسىنا بيۋروكراتتىق ادەتتەن ادا تازا، ادال ادامداردى جينايدى. سوندىقتان مەن وعان بارىنشا كومەكتەسۋگە تىرىسامىن، –دەدى گرۋزيانىڭ ەكس-پرەزيدەنتى، ودەسسا وبلىسىنىڭ بۇرىنعى باسشىسى ميحايل ساكااشۆيلي.

كەيبىر اڭگىمەلەرگە قاراعاندا، "ءبىرىنشى تۋردا -اق سۋىرىلىپ العا شىققان ۆلاديمير زەلەنسكييدىڭ ارتىندا ەلدەگى بايلاردىڭ ءبىرى يگور كولومويسكيي تۇرعان" سياقتى. ول "بۇرىن مەملەكەتتىك قىزمەتتە ىستەمەگەن، كلاندىق توپقا قاتىسى جوق، قاراپايىم ءارى حالىققا جاقىن ۆلاپديمير زەلەنسكييدى ادەيى تاڭداعان جانە پرەزيدەنتتىككە كانديدات رەتىندە ۇسىنعان" دەگەن اقپار بار.