قورعانىس مينيسترلىگى جالاعاش اۋدانىندا مي-8 تىكۇشاعىنىڭ قۇلاۋىنا قاتىستى بولجام جاسادى.

قازاقستاننىڭ اسكەري-اۋە كۇشتەرىنىڭ قولباسشىسى، اۆياسيا گەنەرال-مايورى داۋرەن قوسانوۆ تىكۇشاقتىڭ قۇلاۋىنا سەبەپ بولعان 3 نەگىزگى فاكتوردى اتادى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

اۆياسيا گەنەرال-مايورىنىڭ ايتۋىنشا، اپاتقا ۇشىراعان مي-8 تىكۇشاعى 1988 جىلى قۇراستىلىپتى.

"ول الماتى قالاسىنداعى №405 اۆياجوندەۋ زاۋىتىندا كۇردەلى جوندەۋدەن ءوتتى. زاۋىتتان شىققاننان كەيىن تىكۇشاققا اۋەدە 2000 ساعات نەمەسە 8 جىل ۇشۋ مۇمكىندىگى بەرىلەدى. بۇگىنگە دەيىن تىكۇشاق اۋەدە 773 ساعات ۇشقان. تىكۇشاقتا تەحنيكالىق اقاۋ بولماعان. مەملەكەتتىك كوميسسيا تەرگەۋ جۇرگىپ جاتقانىنا بايلانىستى قازاقستاننىڭ قارۋلى كۇشتەرىنە تيەسىلى مي-8 تىكۇشاقتارىنىڭ ۇشۋى توقتاتىلدى. اپتا بويى ولار تەحنيكالىق تەكسەرىستەن وتەدى"، - دەدى داۋرەن قوسانوۆ ورتالىق كوممۋنيكاسيالار قىزمەتىندە وتكەن بريفينگتە.

بۇدان بولەك، قازاقستاننىڭ اسكەري-اۋە كۇشتەرىنىڭ قولباسشىسى ايتقانداي، مي-8 - پوستكەڭەستىك ەلدەردە عانا ەمەس، بۇكىل الەمدە ادام ەڭ كوپ سياتىن تىكۇشاق.

"بۇل – سەنىمدى تىكۇشاق. ءقازىر مي-17 جانە مي-171 تىكۇشاعىمەن بىرگە مي-35 جاۋىنگەرلىك تىكۇشاعىن ساتىپ الىپ جاتىرمىز"، - دەدى اۆياسيا گەنەرال-مايورى.

ءسوز سوڭىندا ول مەملەكەتتىك كوميسسيا تەرگەۋ جۇرگىزىپ جاتقانىن اتاپ ءوتتى.

"بارلىق سەبەپ سارالانىپ جاتىر: تەحنيكانىڭ ىستەمەي قالۋى، ادامي فاكتور جانە مەتەو جاعداي. مەن كوميسسيا مۇشەسى ەمەسپىن. سول سەبەپتى پىكىر بىلدىرۋگە قۇقىعىم جوق. قارا جاشىك مەملەكەتتىك كوميسسيادا. ونى ءبىز تەكسەرە المايمىز. تەرگەۋدىڭ ناتيجەسى رەسمي تۇردە حابارلانادى"، - دەپ تۇيىندەدى ءسوزىن داۋرەن قوسانوۆ.

ەسكە سالا كەتسەك، 27 ناۋرىزدا كەشكە قىزىلوردا وبلىسى جالاعاش اۋدانىندا مي-8 تىكۇشاعى اپاتقا ۇشىرادى. اۋە كەمەسى بەلگىسىز سەبەپتەرمەن قۇلاپ، تۇگى قالماي جانىپ كەتكەن. اسكەري تىكۇشاقتىڭ بورتىندا 13 ادام بولدى، ولاردىڭ ءبارى قازا تاپتى.

ۇسىنعان: نازەركە لابيحان