ديماشتى رەسەيلىك وپەراتورلار ەشكىگە تەڭەپ، بالاعاتتادى دەپ جازادى Qamshy.kz اقپارات اگەنتتىگى. 24 ناۋرىزدا ديماش "نە؟ قايدا؟ قاشان؟"  رەسەيلىك تەلەباعدارلاماسىندا ونەر كورسەتتى. اتالمىش باعدارلامادا ديماش "Mademoiselle Hyde" ءانىن ايتىپ، رەسەيلىكتەردى ءتانتى ەتكەن بولاتىن. 

ال كەلەسى كۇنى، ياعني 25 ناۋرىزدا ديماش ءان ايتقان كەزدەگى وپەراتورلاردىڭ جۇمىس ىستەپ جاتقان ۆيدەوسى كوپشىلىكتىڭ قىزۋ تالقىسىنا ءتۇستى. نەگىزى وپەراتورلاردىڭ جۇمىسىن جانكۇيەرلەر جوعارى باعالادى. الايدا  وپەراتوردىڭ  ديماشتى بالاعاتتاۋى جانكۇيەرلەردىڭ اشۋىنا ءتيدى. 

ديماش ءان ايتىپ جاتقان كەزدە ونىڭ كولەڭكەسى يگور كرۋتويعا  ءتۇسىپ تۇرادى. سول ساتتە وپەراتورلاردىڭ ءبىرى "مىنا ەشكىنىڭ وعان كولەڭكەسى ءتۇسىپ تۇر" (تەمنيت ەتوت كوزول نا نەگو — رەد.) دەپ ايتىپ قالدى. 

ۆيدەونى 40 مىڭنان استام ادام كورىپ، 200-دەن استام پىكىر جازعان. كوپشىلىك ازاماتتار تەلەوپەراتوردىڭ كەشىرىم سۇراۋ كەرەكتىگىن تالاپ ەتۋدە.

"بارلىعى كەرەمەت، ارينە. الايدا ديماشتى ەشكىگە تەڭەۋ – سوراقىلىق. ءوتىنىش، قىزمەتكەرلەرىڭىزدى دۇرىستاپ تاربيەلەڭىزدەر. ميلليونداعان ادامنىڭ كۋميرىنە اينالعان ادام تۋرالى وسىلاي دەۋگە بولا ما؟"،- دەپ پىكىر ءبىلدىردى ديماشتىڭ پيتەردەگى جانكۇيەرى سونيا ابراميام.

– اشۋىمدى باسا الماي وتىرمىن. باعدارلامانى تاعى دا قاراپ شىقتىم. ديماشتىڭ كولەڭكەسى يگور كرۋتويعا ءتۇسىپ تۇر. تەلەارنا اكىمشىلىگىنە ارىز جازۋ كەرەك. وپەراتور ايتقان ءسوزى ءۇشىن جاۋاپ بەرسىن، - دەپ جازدى گۇلنار ەسىمدى الەۋمەتتىك جەلى قولدانۋشىسى. 

جالپى جۇڭگو ەلىندە كونسەرتتىك باعدارلامالاردىڭ تىنىش وتەتىنى بەلگىلى. ولار ديماشتى بالاعاتتاماق تۇگىلى، ءبىر اۋىز جامان پىكىر ايتقانىن دا ەستىمەپپىز. ال رەسەيدە ءبارى كەرىسىنشە. ديماش ءان ايتقان كەزدە ميكروفون ىستەن شىعادى نەمەسە تاعى سوعان ۇقساس ىڭعايسىز جايتتار ورىن الادى. جارايدى، تەحنيكا بولعان سوڭ ونىڭ ىستەمەي قالۋى قالىپتى جايت. بۇعان بەلگىلى ءبىر ادامدى ايىپتاپ، سىناي الماسپىز. ال "نە؟ قايدا؟ قاشان؟" باعدارلاماسىندا بولعان تاربيەسىز ءارى جاعىمسىز وقيعاعا  بەلگىلى ءبىر ادامدار جاۋاپ بەرۋى قاجەت. ارينە پاراساتتى ازامات  ديماشتىڭ داۋ شىعارىپ، "كەشىرىم سۇرا" دەپ تالاپ ەتپەيتىنى بەلگىلى. سەبەبى ديماش — تاربيە كورگەن  قازاقتىڭ  بالاسى. قانشاما ميللياردتاعان كورەرمەننىڭ كۋميرىنە اينالسا دا "مەن  قاراپايىم اداممىن" دەۋدەن جالىققان ەمەس. ونىڭ ورنىندا باسقا ءانشى بولسا باياعىدا-اق تەلەارنا باسشىلارىنا تالاپ ارىز تۇسىرەر ەدى. ديماش تۋرالى قانداي دا ءبىر جاعىمسىز پىكىر ايتقان ادام ميللياردتاعان ادامنىڭ تالقىسىنا ءتۇسىپ، "جاۋىنا" اينالادى.  سوندىقتان ديماش ارىزدانباسا دا، ونىڭ جانكۇيەرلەرى تەلەارنا قىزمەتكەرلەرىنەن اتالعان جاعىمسىز جايتقا قاتىستى جاۋاپ كۇتەدى. 

ءيا، رەسەيلىك تەلەوپەراتورلار دا ميللياردتاعان ادامنىڭ كۋميرىنە اينالعان ديماشتى سىيلاۋى كەرەك. مۇمكىن ولار بۇل جايتتى قالىپتى دەپ تۇسىنەر. ءبىراق  ديماش الەم باعالاعان قازاقتىڭ تالانتتى ءانشىسى. سوندىقتان رەسەيلىك تەلەوپەراتورلار  ديماشتى دا، ونىڭ شىنايى جانكۇيەرلەرىن دە سىيلاعانى ءجون.