جوعارى رادانىڭ ەكس-دەپۋتاتى: يرينا فابيون «ين تۆ» تەلەارناسىنا بەرگەن سۇحباتىندا ۋكراينادا تۇراتىن ءورىستىلدى تۇرعىنداردى «قۇلدار جانە وككۋپانتتار» دەپ اتادى.  YouTube -تە جاريالانعان سۇحباتىندا ول ءورىستىلدى ۋكرايندىقتاردى قالاي مەملەكەتتىك تىلدە سويلەتۋگە ۇيرەتەتىنىن ايتتى. ول ءۇشىن نە ىستەۋ كەرەك؟ ەكس-دەپۋتاتتىڭ ويىنشا، ول ءۇشىن ۋكراينادا ورىس تىلىندە سويلەۋگە مۇلدە تىيىم سالىنۋى كەرەك. سونىمەن قاتار، ءبىلىم سالاسى تولىقتاي ۋكراين تىلىندە وقىتىلۋى ءتيىس.

يرينا فابيون بۇل ورايدا مىنا ماسەلەنى تىلگە تيەك ەتتى.

–ءسىز اعىلشىن ءتىلىن بىلمەي، امەريكادا جۇمىسقا ورنالاسا المايسىز. ال فرانسۋز ءتىلىن  بىلمەي، فرانسياعا بارىپ تا، جۇمىسقا تۇرۋ  مۇمكىن ەمەس،– دەيدى ەكس-دەپۋتات.

 يرينا فابيوننىڭ ويىنشا، جەر بەتىندەگى وزگە حالىقپەن سالىستىرمالى تۇردە قاراعاندا،  «ۋكرايندىقتار ءالسىز ۇلت، وزدەرىن تومەن ساناۋعا ءماجبۇر».

–بىىزدە ورىستىلدىلەردىڭ قۇقى بۇزىلادى دەپ ءجيى مالىمدەمە جاسالادى. ال بىزدە ءورىستىلدى تۇرعىندار جوق، ولار –قۇلدار نەمەسە وككۋپانتتار. ەگەر ۋكراين ءتىلىن بىلمەسە، ولارعا ءبىلىم بەرىپ تە كەرەگى جوق. دەمەك، ولاردى جۇمىسقا ورنالاستىرۋدىڭ دا قاجەتى شامالى. مۇنىڭ بارلىعىن باس اۋىرتپاي، جەڭىل تۇردە عانا جۇزەگە اسىرعان ءجون،–دەيدى يرينا فابيون.

جالپى جوعارى رادانىڭ بۇرىنعى دەپۋتاتى ورىس تىلىندە سويلەيتىن ۋكراينداقتاردى جاقتىرمايدى، بۇعان دەيىن  دە رەسەي تىلىندە سويلەيتىندەرگە قاتىستى وتە قاتتى مالىمدەمەلەرىمەن بەلگىلى بولعان. ول قوعامدىق ورىندار مەن كەز كەلگەن جيىندار ۋكراين تىلىندە ءوتۋى دەرەك دەگەندى ءجيى ايتادى. ءتىپتى ءبىر كەزدە  «ورىس تىلىندە سويلەيتىن ازاماتتاردىڭ جاعىن سىندىرۋ كەرەك» دەپ مالىمدەمە جاساعانى دا بەلگىلى.

جاقىندا يرينا فابيون پرەزيدەنتتىك سايلاۋعا ءتۇسىپ جاتقان كانديدات ۆلاديمير زەلەنسكييدى ورىس تىلىندە سويلەگەنى ءۇشىن تۇرمەگە وتىرعىزۋعا شاقىرعان.