ەلىمىزدىڭ اتا زاڭىنا اۋقىمدى ينستيتۋسيونالدىق ترانسفورماسيا جاسالىپ جاتىر. كونستيتۋسيالىق رەفورما اياسىندا رەسپۋبليكادا 30 جىل بويى ەتنوسارالىق كەلىسىمنىڭ نەگىزى بولىپ كەلگەن قازاقستان حالقى اسسامبلەياسى (قحا) جاڭا مەملەكەتتىك ينستيتۋت – حالىق كەڭەسىنە اينالادى.
كونستيتۋسيانىڭ VI ءبولىمى قازاقستان حالىق كەڭەسى دەپ اتالىپ، 70-باپ، 1-تارماعىندا «قازاقستان حالىق كەڭەسى – قازاقستان رەسپۋبليكاسى حالقىنىڭ مۇددەسىن بىلدىرەتىن جوعارى كونسۋلتاتيۆتىك ورگان»، – دەگەن مارتەبەسى ناقتى كورسەتىلدى.
سوندىمەن قاتار، اتالعان قۇرىلىم جاي عانا كونسۋلتاتيۆتىك، فورمالدى ورگانعا اينالماس ءۇشىن، 71-باپتىڭ 2-تارماعىنا ونىڭ قۇرىلتايعا زاڭ جوبالارىن ەنگىزە الاتىنى دا ايقىن جازىلدى.
«رەفورمانىڭ باستى جاڭالىعى – «حالىق كەڭەسى» ۇكىمەتپەن تەڭ دارەجەدە پارلامەنتكە (قۇرىلتايعا) زاڭ جوبالارىن تىكەلەي ەنگىزۋ جونىندەگى كونستيتۋسيالىق قۇقىققا يە بولادى. بۇل قوعامدىق ورگاننىڭ مارتەبەسى كەڭەسشى سيپاتتان زاڭ شىعارۋ ۇدەرىسىنە ناقتى ىقپال ەتەتىن سۋبەكت دەڭگەيىنە كوتەرىلەدى»، – دەپ ءتۇسىندىردى ق ر پرەزيدەنتى جانىنداعى قسزي ستراتەگيالىق تالداۋ ءبولىمىنىڭ باس ساراپشىسى ايدانا اكەسينا.
ساراپشىنىڭ ايتۋىنشا، ەگەر بۇرىن اسسامبلەيا پارلامەنتتەگى كۆوتالار ارقىلى شەكتەۋلى وكىلدىككە يە بولسا، جاڭا ينستيتۋت ءتۇرلى ەتنيكالىق توپتاردىڭ وكىلدەرىن زاڭ شىعارۋ ۇدەرىسىنە جۇيەلى تۇردە قاتىستىرۋدى كوزدەيدى جانە مەملەكەتتىك ورگانداردىڭ جاڭارتىلعان ارحيتەكتۋراسىنا كىرىكتىرىلەدى.
«حالىق كەڭەسىنىڭ» قۇرامى 126 مۇشەدەن جاساقتالىپ، ەتنومادەني بىرلەستىكتەردەن، ءماسليحاتتاردان جانە ازاماتتىق سەكتوردان (ءارقايسىسى 42 ادامنان) تەڭ كۆوتا قاعيداتى بويىنشا قۇرالادى. مۇنداي قۇرىلىم وڭىرلەردىڭ، ءتۇرلى ەتنوستاردىڭ جانە ازاماتتىق قوعامنىڭ بەلسەندى وكىلدەرىنىڭ مۇددەلەرىن تەڭگەرىمدى تۇردە قامتۋعا مۇمكىندىك بەرەدى.
ءماجىلىس دەپۋتاتى ماقسات تولىقباي رەفورمانىڭ وزەگى – بيلىكتى نىعايتۋ ەمەس، كەرىسىنشە ازاماتتىق قوعامنىڭ ءرولىن كۇشەيتۋ ەكەنىن ايتادى. سونىمەن قاتار، حالىق كەڭەسىنە رەسپۋبليكالىق رەفەرەندۋم تاعايىنداۋ تۋرالى باستاماشىلىق جاساۋ قۇقىعى بەرىلەدى.
«جالپى، «حالىق كەڭەسى» جاڭا ساياسي الاڭعا، مەملەكەتتىك شەشىمدەرگە ىقپال ەتەتىن ىقپالدى ورتالىققا اينالادى. ەڭ باستىسى – «حالىق كەڭەسى» تولىقتاي اشىق قۇرىلىم بولادى جانە وعان كەز كەلگەن ازاماتتىڭ، بارلىق ەتنوستاردىڭ، كاسىپكەرلەردىڭ قاتىسۋىنا مۇمكىندىك بەرىلەدى. ۇسىنىلىپ وتىرعان وزگەرىستەردىڭ تۇپكى ماقساتى – كۇشتى تۇلعالارعا ەمەس، مىقتى ينستيتۋتتارعا سۇيەنەتىن مەملەكەت قالىپتاستىرۋ»، – دەدى دەپۋتات.
