كەشە الماتى قالاسىنىڭ
يننوۆاسيالىق تەحنولوگيالار پاركى ارنايى ەكونوميكالىق ايماعىندا (اەا «يتپ») 2030 جىلعا دەيىنگى ۋاقىت كاپسۋلاسىن سالتاناتتى تۇردە قويۋ ءراسىمى ءوتتى. بۇل ءىس-شارا قازاقستاننىڭ كرەمنيي كلاستەرىن دامىتۋ جوباسىنىڭ پراكتيكالىق كەزەڭگە وتكەنىن كورسەتەتىن ماڭىزدى تاريحي ءسات بولدى.
جوبا ەلىمىزدە جوعارى تەحنولوگيالىق ءوندىرىستىڭ تولىق سيكلىن قالىپتاستىرۋدى كوزدەيدى. اتاپ ايتقاندا، وندىرىستىك تىزبەك كەلەسى باعىتتاردى قامتيدى:
• جەلىلىك كۆارس ءوندىرۋ؛
• مەتاللۋرگيالىق كرەمنيي ءوندىرۋ؛
• پوليكريستالدىق كرەمنيي ءوندىرۋ؛
• مونوكريستالدىق كرەمنيي ءوسىرۋ؛
• جارتىلاي وتكىزگىش پلاستينالار (wafer) ءوندىرۋ؛
• فوتوەلەكترلىك ەلەمەنتتەر ءوندىرۋ؛
• كۇن پانەلدەرىن شىعارۋ.
2026 جىلدىڭ قازان ايىنا دەيىن اەا «يتپ» اۋماعىندا قۋاتتىلىعى جىلىنا 1 گۆت جارتىلاي وتكىزگىش پلاستينالار وندىرەتىن زاۋىت سالۋ جوسپارلانىپ وتىر. كەيىن ءوندىرىس كولەمىن 2 گۆت-قا دەيىن ۇلعايتۋ كوزدەلگەن. بۇل قازاقستاندى ورتالىق ازياداعى جوعارى تەحنولوگيالىق ماتەريالدار ءوندىرىسىنىڭ جەتەكشى ورتالىعىنا اينالدىرۋعا مۇمكىندىك بەرەدى.
قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسىمەن بىرلەسىپ كرەمنييدى 12N دەڭگەيىنە دەيىن (99،9999999999%) تەرەڭ تازارتۋ زەرتحاناسىن قۇرۋ جوسپارلانعان. مۇنداي جوعارى تازالىقتاعى كرەمنيي الەمدە سيرەك وندىرىلەدى جانە ستراتەگيالىق ماڭىزى زور سالالاردا قولدانىلادى:
• ميكروەلەكترونيكا جانە ينتەگرالدىق سحەمالار ءوندىرىسى؛
• كۆانتتىق تەحنولوگيالار؛
• فوتونيكا جانە وپتوەلەكترونيكا؛
• عارىش جانە قورعانىس ەلەكترونيكاسى.
بۇل باستاما قازاقستان عىلىمى مەن ءوندىرىسىنىڭ جاڭا ساپالىق دەڭگەيگە كوتەرىلگەنىن كورسەتەدى.
ۋاقىت كاپسۋلاسىن قويۋ راسىمىنە عىلىمي جانە وندىرىستىك سالانىڭ كورنەكتى وكىلدەرى قاتىستى:
• احىلبەك قاجى ۇلى كۇرىشبايەۆ — قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسىنىڭ پرەزيدەنتى؛
• اسقار سەرقۇل ۇلى جۇمادىلدايەۆ — اكادەميك، فيزيكا-ماتەماتيكا عىلىمدارىنىڭ دوكتورى؛
• الماس ۇسكەنباي ۇلى مادييەۆ — اەا «يتپ» باس ديرەكتورى؛
• مۇرات قۇسمان ۇلى راحيمجانوۆ — جوبانىڭ باستاماشىسى، «DOC Co. LTD» ج ش س باس ديرەكتورى.
بولاشاققا باعىتتالعان ستراتەگيالىق قادام
كرەمنيي كلاستەرىن دامىتۋ جوباسى – قازاقستاننىڭ تەحنولوگيالىق تاۋەلسىزدىگىن كۇشەيتۋگە باعىتتالعان اۋقىمدى باستاما. بۇل جوبا ارقىلى ەل ەكونوميكاسىندا جوعارى قوسىلعان قۇنى بار ءونىم ءوندىرىسى ارتىپ، عىلىمي-زەرتتەۋ الەۋەتى مەن ونەركاسىپتىك كووپەراسيا جاڭا دەڭگەيگە كوتەرىلەدى.
2030 جىلعا دەيىنگى ۋاقىت كاپسۋلاسى – بۇگىن باستالعان ءىرى يندۋستريالىق سەرپىلىستىڭ سيمۆولى. ول بولاشاق ۇرپاققا ەلىمىزدىڭ عىلىم مەن تەحنولوگيا سالاسىنداعى باتىل قادامدارىنىڭ كۋاسى بولماق.
